Babiloniapi tawa maqtʼitas
75 yachachiy
Babiloniapi tawa maqtʼitas
NABUCODONOSORQA Israelmanta maqtʼitasta aswan sumaq yachayniyuqta, kʼachasta, allin umayuqkunata ima akllaspa Babiloniaman apakapurqa. Chaykunamanta kay urapi tawa rikhurinku. Juknin Daniel sutikun, chay kimsatataq babiloniosqa Sadrac, Mesac, Abednego nispa sutichanku.
Nabucodonosorqa wasinpi llamkʼanankupaq, yachachiyta munan. Kimsa watamantataq, aswan sumaq yuyaniyuqkunallata akllanqa sinchi chʼampaykunata allinchayta yanapanankupaq. Payqa maqtʼakuna kallpayuq kanankuta munan. Chayrayku, reypa familianwan allin mikhunata mikhunankupaq kamachirqa.
Danielta qhaway, ¿imatachus Nabucodonosorpa sumaq kamachin Azpenasman nichkasqanta yachankichu? Danielqa reypa miskʼi mikhunanta mana mikhuyta munasqanta nichkan. Azpenastaq chayta uyarispa llakikun. ‘Reyqa imatachus, mikhunaykichikta, ukyanaykichiktapis parlanña. Sichus jukkuna maqtʼasmanta aswan tulluyasqaman tukunkichik chayqa, ñuqata wañuchiwanqa’, nispa nirqa.
Chayrayku, Danielqa Azpenaspa kamachinman nirqa: ‘Rikunaykipaq, chunka pʼunchayta quwayku. Qʼumirkunallata mikhuchiwayku, ukyanaykupaqtaq yakullata quwayku. Chaymanta reypa mikhunanta mikhuqkunawan kikinchawasqayku. Jinamanta pikunachus aswan allin kasqankuta qhawanki’, nispa.
Kamachiqa ajina kachun nirqa. Chay 10 pʼunchay tukukuptintaq, wak maqtʼasmanta, Daniel kimsa masisninwanqa, aswan sumaq rikukunku. Chayrayku reyjina mikhunankumantaqa, qʼumirkunata mikhunankuta saqirqanku.
Kimsa wata tukukuptin, tukuy waynasta Nabucodonosorpa ñawpaqiman apanku. Waynaswan parlaytawan, reyqa Danielta kimsa masisnintawan tukuy waynasmanta aswan yuyayniyuqta reparan. Chayrayku, reypa wasinpi yanapanankupaq qhipakurqanku. Rey ima tapuykunawanpis Danielman, Sadracman, Mesacman, Abednegoman jamuptin, mayqin sacerdotemantapis chayri mayqin umachasqa runamantapis, paykunaqa 10 kutita astawan yacharqanku.
