RI AJAWINEL Nabucodonosor xeʼukʼam bʼi ri täq israelitas nim kinoʼj pa Babilonia. Tekʼuriʼ, xeʼuchaʼ ri alabʼom ri qas e jeʼlik xuqujeʼ nim kinoʼj. Pa ri wachbʼäl kawil kajibʼ. Jun chike are Daniel, tekʼuriʼ ri nikʼaj chik oxibʼ alabʼom, ri täq babilonios xkebʼij Sadrac, Mesac xuqujeʼ Abednego chike.

Nabucodonosor xraj xuya nikʼaj chik ketaʼmbʼäl rech kechakun pa ri rachoch. Chiʼ qʼaxnäq chi oxibʼ junabʼ che tijan kkʼut che kiwäch, xaq keʼuchaʼ ri qas nim ketaʼmbʼäl rech kekitoʼ che uresaxik chʼoj. Are kraj che ri alabʼom nim kichoqʼabʼ, rumal laʼ xutaq ri rajpatinel che uyaʼik vino xuqujeʼ ronojel ri kutij areʼ (re) xuqujeʼ ri ufamilia chike ri alabʼom.

Chawilampeʼ ri ala Daniel. ¿La awetaʼm su tijan kubʼij che ri Aspenaz, ri rajpatinel ri Nabucodonosor? Kubʼij che, che kraj täj kutij ri täq utzalaj täq ktijowik kʼo pa rachoch ri ajawinel. Rumal laʼ Aspenaz xpax ukʼuʼx, o xpe ranimaʼ. ‹Ri ajawinel xubʼij che rajawaxik kixwaʼik›, xchaʼ. ‹We utz ta kixkaʼyik junam kukʼ ri nikʼaj chik alabʼom, xa kinkamsaxik.›

Rumal laʼ Daniel xchʼaw rukʼ ri ajchajinel ukojom Aspenaz chike. ‹Chaya 10 qʼij chaqe rech kojawilo›, xchaʼ. ‹Chaya jaljoj uwäch täq ichaj xuqujeʼ jaʼ rech kqatijo. Tekʼuriʼ chojajunamisaj kukʼ ri nikʼaj chik alabʼom che xketij ri xuya ri ajawinel chike, kawil kʼut jachin laʼ qas utz kkaʼyik.›

Utz laʼ, xchaʼ ri ajchajinel chike. Chiʼ xkʼis ri 10 qʼij, Daniel rukʼ ri oxibʼ rachiʼl are qas utz kekaʼy che kiwäch ri nikʼaj chik alabʼom, rumal waʼ xyaʼ chike che xkeya ta kan utijowik ri täq jaljoj uwäch ichaj, are ta xketij ri kuya ri ajawinel chike.

Chiʼ xkʼis ri oxibʼ junabʼ, xekʼam bʼi konojel ri alabʼom chuwäch ri ajawinel Nabucodonosor. Chiʼ xukʼis kichʼabʼexik, ri ajawinel xrilo che ri Daniel xuqujeʼ ri oxibʼ rachiʼl, are kʼo nim ketaʼmbʼäl. Rumal laʼ, xeʼukoj che tobʼanel pa ri rachoch. Ri ajawinel kuta chike ri Daniel, Sadrac, Mesac xuqujeʼ ri Abednego su kubʼano chiʼ kʼo jun chʼoj, wa täq alabʼom ketaʼm 10 mul che kiwäch ri ajqʼij rech ri ajawinel.