REY Nabucodonosorqa Israel castakunamanta allin yachaq hinaspa allin entiendeqkunatam aparqa Babiloniaman. Hinaspam akllarurqa sumaq qawapasllaña yachayniyoq mozokunata. Chay dibujopim kachkan tawa mozokuna. Hukninpa sutinmi Daniel wakin kimsa mozokunatañataqmi Babilonia runakunaqa suticharqaku Sadrac, Mesac, hinaspa Abed-nego nispa.

Palacionpi servinankupaqmi rey Nabucodonosorqa kamachirqa mozokunata yachachinankupaq. Kimsa wata yachachiptinku allin yachayniyoqkunallata akllanqa sasachakuykunata allichaypi yanapananpaq. Chay mozokuna kallpayoq kanankupaqmi reyqa kamachirqa kikinpa chaynataq ayllunpa mikunanmanta qonankupaq chaynataq tomanan vinota qonankupaqpas.

Danielta qaway. ¿Yachankichu imatataq rey Nabucodonosorpa palacionpi serviqninkunapa jefen Aspenazta nichkan? Reypa mikuynin qosqanta mana mikunankupaqmi nichkan. Chaymi Aspenazqa mancharikuspa nirqa: ‘Reymi kamachiwarqa imam qamkunapa mikunaykichiktawan tomanaykichikta. Uyaykichik wakin wiñaymasikichikpa uyanmanta hukmanyasqata rey rikuruspanqa wañurachiwanqa’ nispa.

Chaymi Danielmanta hinaspa kimsan amigonkunamanta cuentallikunanpaq chay Aspenaz sutiyoq jefepa churasqan mayordomota Danielqa rimapayarqa kaynata: ‘Ñoqaykutayá pruebawayku, chunka punchawyá mikuchiwayku verdurakunallata hinaspayá yakullatataq tomasaqkupas. Chaymantayá rikchayniykuta tupanachiy reypa mikunan mikuq mozokunawan hinaspañayá tanteay pikunataq aswan allinraq kanman’ nispa.

Chaynapimá mayordomoqa imam mañakusqankuta uyariykurqa. Hinaspa 10 punchaw pasaruptinmi Danielpa chaynataq kimsa amigonkunapa rikchayninqa wakin mozokunapa rikchayninmantapas aswan allinraq karqa hinaspam verdurallataña mikurqaku reypa qosqan mikunamantaqa.

Hinaptinmi kimsa wataña cumplikuruptin llapallan mozokunata rey Nabucodonosorpa ñawpaqninman pusarqaku. Paykunawanmi reyqa rimarqa, ichaqa chay llapallan mozokunapiqa manam hukllatapas tarirqachu Danielta chaynataq kimsa amigonkunata hinaqa. Chaynapim paykunataqa akllarqaku reypa serviqninña kanankupaq. Imapas yachay kaqkunamantawan entiendena kaqkunamanta rey tapuspanmi Danielta, Sadracta, Mesacta hinaspa Abed-negota tarirqa nacionninpi brujokunamantapas hinaspa espiritistakunamantapas 10 kuti yachayniyoqtaraq.