MAMBO Nebukadinezara akwata Aisrayeli onsene ale adapfunza mwadidi kupiringana anango kuenda nawo ku Babiloni. Buluka penepo mambo asankhula nkati mwawo aphale akubalika na akucenjera kakamwe. Anai a iwo ndi aphale anaonemwe pano. Mbodzi ndi Danyeli, na anango atatu Ababiloni akhaacemera Sadrake, Mesake na Abedinego.

Nebukadinezara anyerezera kupfunzisa aphale anewa towera atumikire pa nyumba pace. Nduli mwa piaka pitatu pyakupfunziswa iye mbadadzasankhula ale akucenjera basi kuti amphedze kutonga miseru. Mambo akhafuna kuti aphale akhale akuwanga na aungumi mukapfunziswa iwo. Natenepa iye apasa matongero kuti anzakazi ace apase onsene ale pyakudya pibodzi pene pyadidi na vinyu pikhatambira iye na banjace.

Yang’anani mphale Danyeli. Kodi musadziwa kuti akulonganji kwa nzakazi wankulu wa Nebukadinezara, Asipenazi? Danyeli akumpanga kuti iye nkhabe funa kudya pinthu pyadidi pya pa meza ya mambo. Mbwenye Asipenazi anenseka. Iye alonga: ‘Mambo atonga pinafuna kudya imwe na kumwa. Mukakhonda khala na maonekero adidi kakamwe ninga aphale anango, iye angakwanise kundipha.’

Natenepa Danyeli aenda kwa muyang’aniri adaikhwa na Asipenazi kuti ayang’anire iye na axamwali ace atatu. Iye alonga: ‘Ndaphata mwendo, tiyesereni m’ntsiku 10. Tipaseni pyakulimwa pingasi kuti tidye na madzi kuti timwe. Mphapo, tilandaniseni na aphale anango ale anadya pyakudya pya mambo, mbumuona kuti mbani anaoneka mwadidi.’

Muyang’aniri atawira kucita pyenepi. Mudakwana ntsiku 10, Danyeli na axamwali ace atatu akhaoneka mwadidi kupiringana aphale anango onsene. Natenepa muyang’aniri aasiya kuti apitirize na kudya pyakulimwa mbuto mwa pinthu pikhaperekwa na mambo.

Pakumala piaka pitatu, aphale onsene aendeswa kwa Nebukadinezara. Pakumala kulonga nawo, mambo aona kuti Danyeli na axamwali ace atatu ali akucenjera kakamwe. Natenepa iye aakwata towera amphedze pa nyumba pace. Nzidzi onsene mukabvunza mambo Danyeli, Sadrake, Mesake na Abedinego peno kuapasa miseru yakunensa, iwo akhadziwa maulendo 10 kupiringana anyantsembe ace onsene peno anyaluso.