Tantara 75

Ajà Lahilahy Efatse Ta-Babylona Tany

NALÀN’I Nebokadnezara mpanjaka ho a-Babylona ane iaby, ze Israelita mahay raha. Bakeo nifìly ze tovolahy nahay raha biby tamin-droze reo ie. Ty efatse amin-droze hitanao amy sary eto io. Daniela ty raike, voho Sadraka, Mesaka, noho Abednego aze telo hafa reo. Reo ty anara nikaìha’ty Babyloniana an-droze.

Tean’i Nebokadnezara hampianary soa ajà lahilahy reo, soa ho afake hanompo amy trano-mpanjaka ao. Laha fa vita fianara io, le ze mahay raha amin-droze avao ro hofilỳ hanampy ty mpanjaka, laha fa misy raha mampanahìra. Tea mpanjaka io ho salama noho hatanjake soa iaby ajà lahilahy reo tanaty fotoa nianaran-droze. Ka nanafatsafatse ty mpanompone Nebokadnezara, fa tokone hamea hany soa, noho divay soa fihàni’ty mpanjaka noho ty fianakaviane, ajà lahilahy reo.

Henteo Daniela eto. Hainao va raha volànine amin’i Aspenaza, sefo’ty mpanompo mpanjaka io? Nivòla tamine Daniela fa tsy hihina ty hany matavy baka amy latàbo-mpanjaka eo. Fe navàka Aspenaza, ka hoy ty asane tamin’i Daniela: ‘Mpanjaka io ro nanapa-kevitse ze raha hohaninareo noho hinominareo. Ka laha tsy salama manahake ajà lahilahy sasane reo nareo, le hamono ahy ty mpanjaka.’

Nandeha tamy mpiamby nampikarakaràn’i Aspenaza an-droze efa-dahy zay Daniela, laha fa bakeo. Hoy ty asane: ‘Mba mangatake aminao lahy zahay, hany maìnty noho rano avao ro ameo anay hohaninay noho hinominay anaty folo andro. Le henteo vasa hanao akore zahay. Ampitovìo amin’ajà lahilahy sasane mihina hani-mpanjaka reo zahay, ka henteo hoe ia ty soasoa aminay.’

Naneke safàn’i Daniela io, mpiamby iny. Ka laha fa tampitse ty folo andro, le nihita fa mbo salama soa avao Daniela noho ajà lahilahy telo namane reny, laha nampitovỳ tamin’ajà lahilahy hafa. Ka nengà mpiamby iny hihina hany maike avao roze, fa tsy nameane ty hany fihàni-mpanjaka.

Laha fa tampitse ty telo tao, le nandesy tamin’i Nebokadnezara teo iaby ajà lahilahy reny. Laha fa baka niresaka tamin’ajà lahilahy reny iaby ty mpanjaka, le nihitane fa nahay raha mihoatse ty ajà lahilahy hafa, Daniela noho namane telo lahy reny. Ka notanjahine hiasa noho hanampy aze tan-tranone tao roze efatse. Laha fa nana fahasahiràna bevata Nebokadnezara na nisy raha teane hanontanea an-droze efatse, le hain’i Daniela, Sadraka, Mesaka noho Abednego ty namaly aze soa. Manatombo impolo amy fahaìza’ty mpisoro na ty mpanome torohevitse ty mpanjaka ty fahaìzan-droze efatse.

Daniela 1:1-21.