TOR Nebukadinesar kôr Mbaiserael mba hemban lun a mfe mbara cii yem a ve ken Babilon. Ken hemen yô tor la tsua mbayevikaior ken atô ve mba ve hemba doonashe shi ve hemba lun tseva tseva kpaa la. Mba unyiin ken mbayevikaior mban ka ve je ú nenge ave heen ne. U môm ka Daniel, man mbautar mbagenev mbara yô ior i Babilon yila ve er Shaderaki, Meshaki man Abedinego.

Nebukadinesar wa ken ishima er una tese mbayevikaior mban sha u ve eren tom ken iyou na yô. Una tese ve zan zan anyom atar aa been yô una tsua mba ve hembe lun a mfe mbara tseegh sha u ve̱ wasen un u sôron mbamzeiyol yô. Tor soo er mbayevnomso mban ve̱ lu gbang gbang shi ve̱ lu a agee iyol kpaa hen shighe u á lu tesen ve la. Nahan a kaa a mbatomov nav er ve̱ naan ve kwar u kwaghyan man u wain u dedoo u un kua tsombor na kpaa ve ye la.

Nenge ase wanyekwaor Daniel. Ú fa kwagh u á lu ôron a Ashipenashi orvesen u mbatomov mba Nebukadinesar kpa? Daniel ngu kaan a na er un soo u yan akaa a dedoo a sha tebur u tor la ga. Kpa ishima za Ashipenashi iyol. ‘Tor ver kwaghyan u ne yaan shi kwagh u ne maan kpaa yô,’ a kaa nahan. ‘Man aluer ne kera doo iyol er mbayevikaior mbagenev mbara ga yô, alaghga una wuam.’

Tsô Daniel za hen wanakiriki u Ashipenashi ver er a̱ nengen sha a na man ahuraior a na a atar la. ‘Wea lumun yô shi kar se ayange 10 tsô,’ akaa a na nahan. ‘Naan se ikaiue se yaan man mngerem se maan. Nahan nenge mlu wase man mlu u mbayevikaior mba ve ye kwaghyan u tor la, nahan nenge mba vea hemba doonashe la.’

Wanakirki la lumun u eren kwagh ne. Man shighe u ayange a 10 la nga ivin yô, Daniel kua ahuraior a na a atar la hemba doon ayol a mbayevikaior mbagenev mbara cii. Nahan wanakiriki la de ve sha u ve̱ za hemen u yan ikaiue tseegh a u ma ve lu yan kwaghyan u tor á né la.

Sha m-bee u anyom atar la yô i tôô mbayevikaior mbara cii í za a ve hen Nebukadinesar. Er á lam a ve cii yô, a nenge Daniel man ahuraior a na a atar la ve hemba lun a mfe. Nahan a ver ve sha u ve̱ wasen un ken iyou na. Man hanma shighe u tor una pine Daniel, Shaderaki, Meshaki man Abedinego mbampin shin una na ve ma kwagh u zan un iyol sha u ve̱ pase yô, ve fa i hemba hanmô ken upristi shin mbafankwagh mbara cii kwa 10 je.