NA‘E ‘ave ‘e he Tu‘i ko Nepukanesá ‘a e kau ‘Isileli ako lelei tahá ki Pāpilone. ‘I he ‘osi iá na‘e fili ‘e he tu‘í meiate kinautolu ‘a e kau tangata talavou mo poto tahá. Ko e toko fā ‘o kinautolu ko e tamaiki tangata ‘okú ke sio ki ai ‘i hení. Ko e taha ko Tāniela, pea ko e toko tolu kehé na‘e ui ia ‘e he kau Pāpiloné ko Setaleki, Mēsake mo ‘Apitenikō.

Na‘e fa‘ufa‘u ‘e Nepukanesa ke ako‘i ‘a e kau tangata talavoú ke nau ngāue ‘i hono palasí. ‘I ha ‘osi ‘a e akó ‘i he ta‘u ‘e tolu na‘á ne fili pē ‘a e fa‘ahinga poto tahá ke tokoni kiate ia ke fakalelei‘i ‘a e ngaahi palopalemá. Na‘e fiema‘u ‘e he tu‘í ‘a e tamaiki tangatá ke nau mālohi mo mo‘ui lelei lolotonga hono ako‘i kinautolú. Ko ia na‘á ne fai ha fekau ki he‘ene kau sevānití ke nau ‘oatu ki he kau tangata talavoú hono kotoa ‘a e me‘akai lelei mo e uaine ‘o tatau pē mo ia ‘oku ma‘u ‘e he tu‘í mo hono fāmilí.

Sio ki he talavou ko Tānielá. ‘Okú ke ‘ilo ‘a e me‘a ‘okú ne lea‘aki ki he sevāniti pule ‘a Nepukanesa ko Asipenasí? Na‘e tala ‘e Tāniela kiate ia ‘oku ‘ikai te ne fie kai ‘i he ngaahi me‘akai lelei mei he tēpile ‘a e tu‘í. Ka na‘e hoha‘a ‘a Asipenasi. Na‘á ne pehē: ‘⁠Kuo ‘osi fili ‘e he tu‘í ‘a e me‘a ke mou kai mo inú, pea kapau ‘e ‘ikai te mou hā mo‘ui lelei ‘o hangē ko e kau tangata talavou ko ē, te ne tāmate‘i nai au.’

Ko ia na‘e ‘alu ‘a Tāniela ki he le‘o na‘e vahe‘i ‘e Asipenasí ke ne tokanga‘i ia mo hono kaungāme‘a ‘e toko tolú. Na‘á ne pehē kiate ia: ‘⁠Kātaki hanga ‘o ‘ahi‘ahi‘i kimautolu ‘i ha ‘aho ‘e 10. ‘Omai pē kiate kimautolu ha vesitapolo ke mau kai mo ha vai ke mau inu. Pea hili ia fakahoa kimautolu mo e kau talavou kehé ‘a ia ‘oku nau kai ‘a e me‘akai ‘a e tu‘í, pea vakai pe ko hai ‘oku hā lelei angé.’

Na‘e loto ‘a e tokotaha le‘ó ke ne fai ‘a e me‘a ko ‘ení. Pea ‘i he ‘osi ‘a e ‘aho ‘e 10, na‘e hā mo‘ui lelei ange ‘a Tāniela mo hono kaungāme‘a ‘e toko tolú ‘i he kau talavou kehé. Ko ia na‘e hokohoko atu ‘a e le‘ó ke faka‘atā ke nau kai vesitapolo pē kae ‘ikai ko ia na‘e tokonaki mai ‘e he tu‘í.

‘I he ‘osi ‘a e ta‘u ‘e tolu na‘e ‘ave ‘a e kau tangata talavou kotoa pē kia Nepukanesa. ‘I he ‘osi ‘ene talanoa mo kinautolu hono kotoa, na‘e ‘ilo ai ‘e he tu‘í ko Tāniela mo hono kaungāme‘a ‘e toko tolú ko e kau poto tahá ia. Ko ia na‘á ne tuku kinautolu ke tokoni kiate ia ‘i he palasí. Pea ‘i hano ‘eke ‘e he tu‘í kia Tāniela, Setaleki, Mēsake, mo ‘Apitenikō ha ngaahi fehu‘i pe ‘oange kiate kinautolu ha ngaahi palopalema faingata‘a, na‘e liunga 10 ‘enau ‘iló ‘i ha taha ‘o ‘ene kau taula‘eikí pe kau tangata potó.