JA MANDARANUM Nabucodonosor yiʼaj och bʼa Babilonia ja israʼelenyo mas chapaniki. Tsaʼan, ja bʼa janekʼ ayeʼi stsaʼa ja keremtik bʼa mas tsamaleʼi sok ja bʼa jel biboʼe. Ja bʼa dibujo waxa wila chanwane. Jaʼa Daniel sok jaxa tuk oxwaneʼi wa x-aji sbʼiʼiluke yuja swinkil Babilonia Sadrac, Mesac sok Abednego.

Nabucodonosor wa skʼana oj yaʼ yile jun xchapjel bʼa oj ya aʼtijuke bʼa niwan snaj. Tsaʼan, ja bʼa oxe jabʼil xchapjel ajiyileʼi, ja mandaranumi kechan oj stsaʼ ja bʼa jel snaʼawe bʼa oj koltajuk yuj stojbʼesel kʼumalik. Ja yeʼn wa skʼana ja keremtiki tsatsal winik aʼajyuke, ja yuj yala aʼajuk yile ja waʼelal sok yalel tsʼusubʼ wa xyabʼ ja yeʼn soka spamilya.

Kʼela ja Daniel. ¿Wan maʼ xa naʼa jas wan yaljel yabʼ ja Aspenaz, ja yaʼtum jel tʼilan ja Nabucodonosor? Wan yaljel yabʼ mi skʼana oj yabʼ ja waʼelal jumasaʼ jel x-ajbʼani tey bʼa smesa ja mandaranumi. Aspenaz wa xchamskʼujol ja jaw, ja yuj yala: «Ja mandaranumi yeʼn yalunej ja jasa oj awabʼyexi soka jasa oj awuʼexi, sok ta mikʼa tsamal akʼeljelex jastal ja tuk keremtiki, ojni miljukona».

Ja yuj ja Daniel sjeka spayjel ja talnanum wa xtalnaji soka oxe yamigoʼiki. Ja talnanum it jaʼ yaʼunej ja Aspenaz. Ti yala ja Daniel: «Aʼawa pabor, kʼulanotikon probar. Bʼa lajune kʼakʼu akitikon jaʼ bʼa oj jkutikon sok waʼelal wa xkʼi bʼa luʼum. Anto tixa wa jlajbʼajtikon soka tuk keremtik wa xwaʼye bʼa smesa ja mandaranumi sok tixa kʼela matik ja mas tsamal ayeʼi».

Ja maʼ wa stalnay ja keremtiki ochni akwerdoʼa. Yajni tsʼikwi ja lajune kʼakʼu, ja Daniel soka oxe yamigo masni lekik skʼeljele yuja tuk keremtiki, ja yuj ajinikan yile ayabʼye ja jasa skʼanawe sok mi jaʼuk ja bʼa smesa ja mandaranumi

Yajni tsʼikwi ja oxe jabʼili, ja keremtiki chʼak ijuke och ja bʼay ja mandaranum Nabucodonosor. Tsaʼan yajni chʼak kʼumanuk, ja mandaranumi yila ja Daniel soka oxe yamigoʼik masni jel biboʼeʼa. Ja yuj tsajiye bʼa oj skoltaye ja mandaranum bʼa stojbʼesel kʼumalik. Yajni ay jun wokol ma jun sjobʼjel wa xyaʼa ja mandaranumi, ja Daniel, Sadrac, Mesac soka Abednego lajune ekʼele mas wa snaʼawe yuja kʼintanum jumasaʼ.