MAPAKGSINA Nabucodonosor kalin kBabilonia lakgkgawasan xalak Israel tiku tlakg kgalhikgoy takgalhtawakga. Chu antiya kBabilonia kalaksakka wantiku tlakg xalakstlan chu tlakg xalakgskgalala. Anta unu kdibujo akxilhpat kgalhtati. Chatum xtukuwani Daniel, chu amakgapitsi li Babilonia kalimapakuwikgoy Sadrac, Mesac chu Abednego.

Nabucodonosor kamakgalhtawakgaputun xlakata anta naskujnikgoy kxchik. Akxni kamakgalhtawakgakanita nawan akgtutu kata nakalaksakan wantiku tlakg xalakgskgalalan xlakata namakgtayakgoy mapakgsina nalakkaxtlaway taʼakglhuwit. Lakaskin pi tama lakgkgawasan lu lakgtliwakga kawankgolh wa xlakata mapakgsinalh pi kakamaxkika na watiya taway chu na watiya vino nema way mapakgsina chu xfamilia.

Kaʼakxilhti Daniel. ¿Katsiya wix tuku wanima Aspenaz, xapuxku kskujni Nabucodonosor? Waniy pi niwaputun wantuku lakgkgama nema wi kxchik mapakgsina. Pero Aspenaz lu lilakgaputsalh, chu kawaniy: Wa mapakgsina wanit pi nawayatit liway nema xla way chu nalikgotnanatit wa nema likgotnan mapakgsina chu komo ni lakgtliwakga natasiyayatit chuna la amakgapitsin lakgkgawasan max nakimakgniy.

Wa xlakata Daniel tachuwinalh chixku wantiku Aspenaz xliyawanit nakakuentajtlawa. Daniel wan: Kakilaliʼakxilhwi akgkaw kilhtamku. Wakg atanu tuku kakilamaxkiw pero ni kakilamaxkiw liway nipara vino, kaj chuchut kakilamaxkiw naklikgotnanaw. Chu alistalh nakilatamalakxtumiyaw amakgapitsi lakgkgawasan wantiku na wakgoy xtaway mapakgsina chu naʼakxilha tiku tlakg tlan tasiyay.

Xkuentajtlawanakan kawaniy pi tlan. Chu akxni takgatsilh akgkaw kilhtamaku, Daniel chu kgalhtutu xʼamigos tlakg tliwakga xtasiyakgoy chu ni la amakgapitsi tiku wakgoy tuku way mapakgsina, chu kamaxkika talakaskin ninawakgoy xliwat mapakgsina.

Akxni ay sputli akgtutu kata putum lakgkgawasan kalinka anta kxlakatin mapakgsina Nabucodonosor. Akxni katachuwinalh, mapakgsina akxilhli pi Daniel chu kgalhtutu xʼamigos tlakg lakgskgalalan nixawa amakgapitsi. Wa xlakata anta kamakgxtakgli kxchik xlakata namakgtayakgoy. Chu akxni mapakgsina kawani xtaʼakglhuwit chu takgalhskinin nema kgalhiy, Daniel, Sadrac, Mesac chu Abednego, mapakgsina akxilha pi pulakaw tlakg lakgskgalalan nixtachuna sacerdotes chu amakgapitsi xalakgskgalalan lakchixkuwin nema kgalhi.