CIPATURO 75
Ŵasepuka Ŵanayi Awo Ŵakaŵa mu Babulone
FUMU Nebukadinezara yikatora Ŵaisrayeli wose ŵa masambiro ghapacanya kuluta nawo ku Babulone. Pamanyuma pake fumu yikasankhamo ŵasepuka ŵakutowa comene na ŵamahara. Ŵanayi mwa ŵasepuka aŵa ni awo ukuŵawona apa. Yumoza wa iwo ni Daniyele, ndipo ŵanyake ŵatatu awo Ŵababulone ŵakaŵathya Shadiraki, Meshaki na Abedinego.
Nebukadinezara wakakhumba kusambizga ŵasepuka aŵa kuti ŵateŵeterenge mu nyumba yake. Pamanyuma pa vilimika vitatu wakakhumbanga kusanga awo ŵakaŵa ŵamahara comene kuti ŵamovwirenge kumazga masuzgo. Fumu yikakhumba kuti ŵasepuka aŵa ŵaŵe ŵankhongono na ŵambura kulwaralwara peneapo ŵakasambizgikanga. Ntheura yikatuma ŵateŵeti ŵake kuti ŵaŵapenge vyakurya na vinyo ivyo iye na mbumba yake ŵakaryanga na kumwa.
Awona Daniyele muwukirano. Kasi ukumanya ivyo wakuyowoya kwa Ashipenazi, muteŵeti mulara wa Nebukadinezara? Daniyele wakumuphalira kuti wakukhumba yayi kurya vyakurya vyakunona vya fumu. Kweni Ashipenazi wakasuzgika comene mu mtima. Iye wakati: ‘Fumu yasankha ivyo mukwenera kurya na kumwa. Ndipo usange mukuwoneka ŵakughanda kuluska ŵasepuka ŵanyake, mbwenu yinikomenge.’
Cifukwa ca ici Daniyele wakuluta kwa muteŵeti uyo Ashipenazi wakamwimika kuti walaŵilirenge iye na mabwezi ghake ghatatu. ‘Tiyezgani kwa mazuŵa 10,’ iye wakayowoya ntheura. ‘Tipani mphangwe na maji. Pamanyuma pake mupime kawonekero kithu na ka awo ŵakurya vyakurya vya fumu, na kuwona awo ŵakuwoneka makora.’
Muteŵeti uyo wakalaŵiliranga Daniyele na ŵanyake wakazomerezga fundo iyi. Ndipo mazuŵa 10 ghakati ghamara, Daniyele na mabwezi ghake ghatatu ŵakawoneka makora kuluska ŵanyawo wose. Mwantheura wakaŵazomerezga kulutirizga kurya mphangwe m’malo mwa ivyo fumu yikapelekanga.
Paumaliro pa vilimika vitatu ŵasepuka wose ŵakatolekera kwa Nebukadinezara. Wati wayowoya nawo, Nebukadinezara wakawona kuti Daniyele na mabwezi ghake ghatatu ŵakaŵa na mahara comene kuluska ŵanyawo wose. Ntheura wakaŵasunga kuti ŵamovwirenge pa nyumba yake. Ndipo palipose apo fumu yikafumbanga Daniyele, Shadiraki, Meshaki na Abedinego mafumbo panji kuŵaphalira suzgo yikuru, iwo ŵakamanya comene kuluska ŵasofi ŵake wose na ŵanalume ŵamahara.
Panji Mungatemwa Kuŵerengaso Nkhani Izi
Sangwani na nkhani 116 za mu Baibolo. Ni zaunenesko, zambura kusuzga kupulikiska, ndipo zalongosoleka makora chomene.
Daniyele mu Cikhululu ca Nkharamu
Daniyeli ŵakamupa chilango cha nyifwa, kweni kasi wakapona?
Sangwani na nkhani 116 za mu Baibolo. Ni zaunenesko, zambura kusuzga kupulikiska, ndipo zalongosoleka makora chomene.
Ŵakakana Kujikama
Kasi Chiuta wakaŵaponoska ŵanalume ŵatatu ŵakugomezgeka aŵa ku ng’anjo ya moto?
