MWENYE Nebukadinesala akujigala Ayisalayeli wosope ŵakulijiganya mnope kwawula nawo ku Babelo. Kaneko mwenye akusagula mwa Ayisalayeliwo acanda ŵakusalala, soni ŵalunda mnope. Ŵane mwa ŵeleŵa ali acanda mcece ŵakwawona pelepaŵa. Jumojo ali Daniyele, soni ŵane ŵatatuwo Ababeloni akwakolanga kuti Sadileki, Misake ni Abedinego.

Nebukadinesala akulinganya yakwajiganya acacandaŵa kuti atumicileje m’nyumba ja ucimwene. Pambesi pa yaka yitatu ya majiganyo jwalakwe cacisagula acacanda ŵalunda mnope kuti amkamucisyeje kumalana ni yakusawusya. Mwenye akusaka kuti acanda pakwajiganya aŵe ŵamacili, soni ŵacilu cambone. M’yoyo akulamula kuti ŵakutumicila ŵakwe ŵapeje wosopewo yakulya yambone, soni finyo jwambone yakusalya jwalakwe ni liŵasa lyakwe.

Amlole mcandaju Daniyele. Ana akumanyilila yakuŵeceta kwa Asipenasi jwamkulungwa jwa ŵakutumicila ŵa Nebukadinesala? Daniyele akumsalila kuti ngakusaka kuti alyeje yakulya yambone ya patebulo ja mwenye. Nambo Asipenasi akudandawula. Jwalakwe akuŵeceta kuti: ‘Mwenye asagwile kala yakulya yacalyeje ni yacamweje. Soni naga ngakuwoneka kuŵa ŵacilu cambone mpela acanda ŵaneŵa, cacimbulaga une.’

Sambano Daniyele akwawula kwa mundu jwaŵam’sagwile Asipenasi kuti amloleleje jwalakwe ni acimjakwe ŵatatu ŵala. Daniyele akuŵeceta kuti: ‘Conde atulinje kwa masiku 10. Atupeje yakulya yaliponda ni mesi gakumwa. Kaneko atulandanye ni acanda ŵane ŵakulya yakulya ya mwenye, kuti alole ŵakuwoneka cenene.’

Jwakwalolelajo akukamulana nayo yeleyi. Sambano masiku 10 gala gali gamasile, Daniyele ni acimjakwe ŵatatu ŵala akuwoneka ŵa cilu cambone mnope kulekangana ni acanda ŵanewo. M’yoyo jwakwalolela jula akumkunda Daniyele ni acimjakwe kuti ajendelecele kulya yaliponda mmalo mwa yakulya ya mwenye.

Kumbesi kwa yaka yitatu acanda wosope akwajigala kukuwonecela kwa Nebukadinesala. Ali aŵecetene ni acanda wosope, mwenye akuyiwona kuti Daniyele ni acimjakwe ŵatatu ŵala ali ŵalunda mnope. Sambano akwaleka panyumba ja ucimwene kuti akamucisyeje. Soni ndema jilijose jele mwenye jakwawusya yiwusyo Daniyele, Sadileki, Mesaki ni Abedinego kapena kwasalila ngani jakusawusya mnope, jemanjaji akola umanyilisi mnope kupundana ni ŵambopesi ŵakwe kapena acalume ŵakwe ŵalunda.