LE ISRAELITAʼOB maʼalob kaʼansaʼaniloʼoboʼ bisaʼaboʼob tumen rey Nabucodonosor tu luʼumil Babilonia. Letiʼeʼ tu yéeyaj le táankelmoʼob maas kiʼichkelmoʼob yéetel maas yaan u naʼatoʼoboʼ. Teʼelaʼ jeʼel u páajtal a wilik kantúuleʼ. Le yáax utúuloʼ Daniel, uláakʼ óoxtúuloʼoboʼ Sadrac, Mesac yéetel Abed-nego tsʼaʼabik u kʼaabaʼob tumen le babilonioʼoboʼ.

Nabucodonosoreʼ u kʼáat u maas kaʼansoʼob utiaʼal ka meyajnakoʼob tu palacio. Yaan u kaʼanskoʼob ichil óoxpʼéel jaʼab, ku tsʼoʼoleʼ, yaan u yéeyik le maas yaan u naʼatoʼob utiaʼal ka áantaʼak u yutskíint le talmiloʼoboʼ. Nabucodonosoreʼ u kʼáat ka muʼukʼaʼanchajak le xiʼipalaloʼobaʼ, le oʼolal tiaʼalaj maʼ u tsʼaʼabal yaanal janal tiʼob tiʼ le ku jaantik letiʼ yéetel u familiaoʼ.

Ilawil Daniel. ¿A wojel wa baʼax kiaʼalik tiʼ Aspenaz, u noojoch u j-meyajoʼob Nabucodonosor? Táan yaʼalik tiʼ maʼ u kʼáat u jaant le kiʼikiʼ janal ku jaantik le reyoʼ. Baʼaleʼ Aspenazeʼ chiʼichnakchaji. Ka tiaʼalaj: Le reyoʼ tsʼoʼok u yaʼalik baʼax ken a jaanteʼex yéetel baʼax ken a wukʼeʼex, wa maʼ tʼaʼaj ken u yileʼex jeʼex uláakʼ xiʼipalaloʼoboʼ, yaan u kíimsken.

Daniel túuneʼ tiaʼalaj tiʼe máax tsʼaʼab utiaʼal kanáantkoʼob tumen Aspenazoʼ: Tsʼáatoʼon janalbeʼen xíiwoʼob k-jaante yéetel chéen jaʼ utiaʼal k-ukʼ chéen ichil diez kʼiinoʼob, ken tsʼoʼokokeʼ ka ketkoʼon yéetel le xiʼipalaloʼob ku jantkoʼob u yoʼoch le reyoʼ ka wil máax maas tʼaʼaj.

Le máax kanáantkoʼoboʼ tu beetaj le baʼax tu kʼáataj Danieloʼ. Ka máan le diez kʼiinoʼoboʼ, Daniel yéetel uláakʼ óoxtúul xiʼipalaloʼoboʼ maas tʼaʼajtak ilaʼabikoʼob tiʼ u maasiloʼoboʼ, ka tsʼoʼokeʼ maʼ tsʼaʼab u yoʼoch le rey u jaantoʼoboʼ, chaʼab u jaantkoʼob chéen janalbeʼen xíiwoʼob.

Ka máan le óoxpʼéel jaʼaboʼ, tuláakal le xiʼipalaloʼoboʼ bisaʼaboʼob tu táan rey Nabucodonosor. Ka tsʼoʼok u tsikbal yéeteloʼobeʼ, letiʼeʼ tu yilaj maas jach yaan u naʼat Daniel yéetel uláakʼ óoxtúul u yéet máanoʼoboʼ. Le oʼolal tu tsʼáaj meyaj u beetoʼob teʼ palaciooʼ. Ken yanak talmiloʼob tiʼe reyoʼ ku kʼáatik áantaj tiʼ Daniel, Sadrac, Mesac yéetel Abed-nego, tumen letiʼobeʼ diez u téenel maas yanil u naʼatoʼob tiʼ le j-kʼiinoʼob yéetel le j-naʼatoʼob ku meyajoʼob tiʼe reyoʼ.