BUÑGUIEEU ni rony mandary ni laa Nabucodonosor rinébu a Babilonia tipnés israelitas ni nap más galnann. Radudy dzú, rabúbu lad buñreʼ a tipnés mbioxhlasien ni más móz ni nap más galnann. Ló dibuj reʼ labúu rabilo tapyibu. Toibbu laa Daniel, né tzón mbioxhlasien ni noʼ né láabu babilonios goleʼ laayibu Sadrac, Mesac né Abednego.

Nabucodonosor nainy láabu guisuidy tzaaybu a mbioxhlasien reʼ par labúu gonyibu dxiin lagary ro rony mandarybu. Ralox tzón íz de goló ma bisuidyibu, ór cú Nabucodonosor sabúbu ni más naní guic par gacné láabu cuéxa galnagan. Nabucodonosor nainy láabu que guirá mbioxhlasien gac nadip, por ngú rony mandarybu que non guáyibu galrro né gueʼyibu vino ni xhomilbu racaʼ.

Bibiʼ mbioxhlasien ni laa Daniel. ¿Nanlo xí cayaibybu a Aspenaz, toib mós ni racné Nabucodonosor la? Daniel cayaiby láabu que diti nainy guábu galrro naníx ni ro Nabucodonosor. Per Aspenaz rioʼ ló xcalrrasani. Nabucodonosor ma goníbu xí non guáto né gueʼto, ná Aspenaz. Né pal diti nasacto xomod stipnés mbioxhlasien, labúu guigaitybu naʼ xtolni.

Por ngú Daniel raiby a soldad ni Aspenaz goléschin par gann láabu né guionca ximigbu. Goloʼ prueby lóodo por chii govitz. Biduidy cuánnyaʼ par guádo, né niis par gueedo, ná Daniel. Ór cú bibiʼ stipnés mbioxhlasien ni ro xcalrro Nabucodonosor, né bibiʼ lóodo, né stip looy biduidy cuent chú layibu más nasac.

Soldad reʼ rasaguelbu. Né dzú ni riaʼ chii govitz de prueby, Daniel né guionca ximig más nasac rienyibu que stipnés mbioxhlasien cú, por ngú raduidyibu lagary que guáyibu cuánnyaʼ, né ma diti rooyibu galrro ni Nabucodonosor raduidy layibu.

Órni riaʼ tzón íz, rinéyibu guirá mbioxhlasien reʼ nisló Nabucodonosor. Ralox raninébu guirá mbioxhlasien reʼ, Nabucodonosor raduidy cuent que Daniel né guionca ximig más naní guic. Por ngú, raduidybu lagary tap biinreʼ guiaʼan gacné láabu lagary ro rony mandarybu. Né órni Nabucodonosor ranabdiitzbu né rinébu cós nagann a Daniel, Sadrac, Mesac né Abednego, layibu chii buelt nanyibu más que stipnés buñnan ni nap Nabucodonosor.