DOY MARI tripantu rupalu ti rey Nafukodonosor yefilu Babilonia mew pu Israel che doy kümeke kimün-ngelu. ¡Adkintufinge chem rupamekey fewla! Jerusalen lupümtükumekengey, welu tati pu Israel che ñi langümngenon presuyeniengey Babilonia mu.

Tukulpange, tati pu pelon wentru kimeltuyngün ñi rupayal tüfachi dungu kangenole engün ñi wedake femün. Welu pu Israel che allkütulafingün tati pu pelon wentru. Amuley ñi poyemekefiel tati pu koylake dio, welu Jewba femlafi engün. Fey mew müley ñi kastigangeal engün. Kimiyiñ tüfa, tati Ngünechen ñi pelon wentru Esekiel feypieiñmew ti wedake dungu tati pu Israel che femkeyngün.

¿Kimimi iney ngen Esekiel? Fey kiñe tati pu pichike wentru yeeyew Nafukodonosor ta Babilonia, doy mari tripantu petu akunon ñi apümngeam Jerusalen. Daniel ka tañi küla weni, Sadrak, Mesak ka Abednego, trür yengey engün Babilonia mew feychi mu.

Petu mülelu Esekiel Babilonia mew, Jewba pengeleyew ti wedake dungu rupamekelu ti ngillatuwe ruka Jerusalen mew. Jewba femi tüfa, kiñe afmatun dungu mu. Esekiel rüf petu müley Babilonia mew, welu Jewba eluñmafi ñi peafiel kom dungu rupamekelu ngillatuwe ruka mu. ¡Rume weda dungu pey!

‘Adkintufinge tüfachi ünufalchi wedake dungu femmekeyngün tati pu che ti ngillatuwe ruka mu,’ Jewba pifi ta Esekiel. ‘Adkintufinge ti pu trafruka takuley fillke adentun filu ka kakelu kulliñ. ¡Ka adkintufinge tati pu Israel che poyemekefi!’ Esekiel pepi pey kom tüfachi dungu, ka wirintükuy chem dungu ñi rupalen.

‘¿Pefimi eymi kom pu longkolelu Israel mu llumkechi (ellkakechi) femmekeyngün?’ Ramtufi Jewba ta Esekiel. May, kidu ka peniey tüfa. Müley regle mari wentru, ka kom poyemekefingün koylake dio. Feypikeyngün: ‘Jewba penielaeiñmew. Kisu elkünutuy mapu.’

Feymu Jewba pengelelfi ta Esekiel kiñeke domo ti pikun wülngiñ ngillatuwe ruka mu. Fey engün anülepuyngün ñi poyemekefiel ti koyla dio Tamus pingelu. ¡Ka adkintufi feychi pu wentru müleyelu Jewba ñi wülngiñ ngillatuwe ruka mu! ‘Epu mari kechu wentru müley chi,’ pi. Esekiel pefi engün. ¡Pochongnagküleyngün puelmapu püle, ka poyemekefingün chi Antü!

‘Tüfachi pu che yamlaenew engün’ pi Jewba. ‘¡Re wedake dungu müten femkelayngün, welu ka küpakeyngün tañi ngillatuwe ruka mew, ka femkeyngün!’ Feymu lle Jewba feypikünuy: ‘Kimürpuayngün tañi fütra newen tañi lladkün mu. Ka ngünayewlayafiñ apümngele engün.’

Küla tripantu rupalu wüla Jewba pengelelfi Esekiel tüfachi dungu, pu Israel che wentruwfi ti rey Nafukodonosor. Feymu tripay kewameafilu Israel che. Rupalu kiñe rangiñ tripantu, tati pu Babilonia che wicharfi engün ti Jerusalen ñi alüpürachi kura malal, ka lüpümfi engün kom ti waria. Epe kom che lay, ka kakelu che presuyengey Babilonia mew.

¿Chumngelu (chemu) eluñmay Jewba tüfachi rume weda apümkangen rupangey tati pu Israel che? Allkütukenofilu engün am Jewba, ka feyentulafingün (müngeltulafingün) tañi feypin. Tüfa pengeli doy falin-ngen taiñ femmekeal Ngünechen ñi chem pin.

Ellaka mu eluñmangey ta kiñe pichi (püchü) trokiñ che ñi müleweal Israel ñi mapu mu. Ti rey Nafukodonosor elkünuy kiñe Judio che Gedalia pingelu, ka elfalkünulelfi tüfachi pu che. Welu feychi mu kiñeke pu Israel che langümfingün Gedalia. Fewla llükaniefingün tati pu Babilonia che ñi küpayal, ka kom apümngepayal engün feychi weda dungu ñi rupan mew. Feymu lle dikümtükufingün Jeremia ñi amutual engün, ka lefmaw amuyngün Egipto mapu mu.

Tüfa mülewelay kiñe che no rume Israel ñi mapu mu. Regle mari tripantu mu kiñe che no rume mülewelay tüfachi mapu mu. Itrokom wellilewey. Welu Jewba feypikünuy ta kidu femay ñi pu che ñi wiñotual tüfachi mapu mu rupale regle mari tripantu wüla. Petu rupalelu tüfachi dungu, ¿chem dungu mu rupalekey Ngünechen ñi pu che Babilonia mapu mu? Peafiyiñ.