TE HI kwapalika 10 lia miaka chize muze Mwanangana Nabukanezore anakatwala A-Izalele waze akufumba kanawa mu Babilonia. Haliapwila tala yize yapwako! Yerusaleme hayocha. Nawa A-Izalele waze anakasala ni mwono kanakaambata ngwe funge mu Babilonia.

Euluka ngwo, aprofeta ja Yehova te kakutoweza atu ngwo yino te ye muyipwako nyi ayo kalumwine yitanga yo yipi. Alioze A-Izalele kakapanjikile maliji ja aprofeta. Ayo yanunga ni kuwayila tuzambi a mahuza shimbu te awayile Yehova ka. Kashika atu jacho te kanatela kwamwesa lamba. Yetwe tunanyingika yuma yino mumu Ezekiele ­profeta wa Zambi, kanatulweze yuma yeswe yipi yize A-Izalele anakalinga.

Yena unanyingika Ezekiele te iya? Iye kali umwe wa kuli akweze waze Mwanangana Nabukanezore ambachile mu Babilonia, chize muze ayile no yikupalika 10 lia miaka mba Yerusaleme yeswe yayinongesa. Daniele ni masepa jenyi atatu, Shadrake, Meshake ni Abedenego, ni noo kanakaambata ku Babilonia ha mashimbu wowene.

Kuzekwene ku Babilonia, Yehova yasolwela Ezekiele yuma yipi yize te akulinga mu tembele ku Yerusaleme. Yehova yamusolwelayo mu chimwe chikomokeso. Ezekiele te uchili mu Babilonia, alioze Yehova yamusolwela yuma yeswe yize te atu akulinga mu tembele. Yuma yize Ezekiele amwene yili ya yinyengo!

Yehova yamba kuli Ezekiele ngwenyi: ‘Tala yuma ya lwaji yize atu analinga mu tembele. Tala kuyikalakala kwa to ni yizulie ya tupela nawa ni tushitu akwo. Tala nawa, A-Izalele kanawayila tushitu jacho!’ Ezekiele yamona yuma yacho, nawa iye yasoneka hakutwala ku yize te yinapuko.

Mba Yehova yahula Ezekiele. ‘Yena muhasa kumona yize tusongwelo A-Izalele analinga ku tenga?’ Mba, iye yahasa kuyimona. Te 70 a malunga, ayo eswe te kanawayila tuzambi a mahuza. Ayo yamba ngwo: ‘Yehova kaso kutumona. Iye hanahichika chifuchi.’

Chocho Yehova yasolwela nawa Ezekiele amwe mapwo ku chikolo cha tembele cha kusango. Ayo eswe te kanatwama ni kuwayila zambi wa mahuza Tamuze. Yamona nawa amwe malunga te kali ku unjililo wa tembele ya Yehova! Malunga jacho te kali mu unji wa 25. Chocho Ezekiele yaamona. Ayo yatala ku chivumbuko nawa yaputuka kuwayila tangwa!

Yehova yamba ngwenyi: ‘Atu wano keshi vumbi hali yami. Ayo hi yuma yipi wika ko analingi, alioze yuma yacho kanayilingila mu tembele yami!’ Kashika Yehova yalakenya ngwenyi: ‘Ayo makevwa lundunjila wa uli wami. Nawa Yami nguchi keevwila keke muze ayo makaanongesa.’

Te hikwapalika miaka yitatu wika, chize muze Yehova asolwele yuma yino kuli Ezekiele, hohene A-Izalele yehuka kuli Mwanangana Nabukanezore. Kashika iye anakaya ni kuliasa no jita. Kulutwe lia mwaka umuwika ni chipinji, A-Babilonia yanjila mu yipanga ya Yerusaleme nawa yocha mbonge yeswe. Atu anji yaashaha akwo yaambata ngwe funge mu Babilonia.

Mumu liaka Yehova echele kunongesa chino chipi chize chilingiwe hali A-Izalele? Mumu ayo kakapanjikile Yehova nawa kakononokene ku shimbi jenyi. Yino yinasolola ngwo chili chilemu chinji kulinga yuma yize Zambi akutuma.

Ku uputukilo amwe atu yeecha hanga atwame mu chifuchi cha Izalele. Mwanangana Nabukanezore yasela atu jacho umwe Ka-Yunda hanga aasongwele, jina lienyi te Gedalia. Mba alioze amwe akuli A-Izalele yashaha Gedalia. Hi atu yevwa woma ngwo A-Babilonia meza hanga aanongese ha mukunda wa upi wacho. Kashika ayo yashinjila Jeremia hanga achine nenyi hamuwika mu Engitu.

Mu chifuchi cha Izalele mwakasalile niumwe mutu. Mu unji wa miaka 70 mwakatungile niumwe mutu. Yimupwa mu yikulu. Mba Yehova yalakenya ngwo iye makafunyisa atu jenyi mu chifuchi muze mukupalika 70 a miaka. Ha chino, yika yinakapwa kuli atu ja Zambi mu chifuchi cha Babilonia, kuze anakaatwala? Tutalenu.