KOLO ha troa 10 lao macatre, qaan lo kola xom la itretre Isaraela ka inamacan hnei Nebukaneza a tro Babulona eë. Nge enehila, hanawang la ewekë ka traqa! Hna manith e Ierusalema. Nge ame pë hë la itretre Isaraela ka mele pe, tre, hna xomi angatr troa lapa trehnyiwa e Babulona.

Atre hi së lo laka, hna thuemacanyi angatre hë hnene la itre perofeta i Iehova, hna qaja lo ka hape, maine thaa tro kö angatr a ujë qa ngöne la itre thiina i angatr ka ngazo, pune hi lai koi angatr. Ngo thaa hna drenge kö la itre perofeta hnei angetre Isaraela. Hnei angatr hna catre thili kowe la itre haze ka thoi, ngo thaa thili pe koi Iehova. Haawe, ijij troa nyithupene kowe la nöj la ngazo i angatr. Easë a atrepengöne lai, pine laka, hna thuemacanyi së fe hnei Ezekiela perofeta i Akötresie, la itre ewekë ka ngazo hna kuca hnei angetre Isaraela.

Atre Ezekiela hi nyipunie? Angeice lo ketre nekö trahmany hna theng hnei Nebukaneza a tro Babulona, 10 lao macatre qëmeken troa lepe apaatren e Ierusalema. Ce ijine xomi Ezekiela hi me Daniela memine la itre sina tro i angeic, ene Saderaka, me Mesaka, me Abedenego.

Ezekiela petre kö e Babulona, nge Iehova a amaman koi angeic la itre ewekë ka ngazo hna kuca hnine la ēnē e Ierusalema. Iehova a kuca lai jën la ketre iamamanyikeu. Ezekiela pala kö ngöne la nöj e Babulona, nge hnei Iehova hna fe la lue meke i angeic, matre ijiji angeice jë troa goeën e gaa nany, ene la itre ewekë hna kuca hnine la ēnē. Thaa fene ewekë ka sisi kö la hnei Ezekiela hna goeën!

Kola qaja hnei Iehova koi Ezekiela ka hape: ‘Hanawange la itre ewekë ka sisi atraqatr hna kuca hnene la nöj hnine la ēnē. Pane hane ju wange caha ngöne uma, itre un me itre xaa öni ju kö hna siji iatrën. Nge goeëne la itretre Isaraela, angatr a thili kowe itre ej!’ Öhne hë Ezekiela la itre ewekë cili, nge angeic a cinyihane ju fe itre ej.

Kola hnying hnei Iehova koi Ezekiela ka hape: ‘Öhne hi eö la itre hna kuca juetrën, hnene la itre tane i angetre Isaraela?’ Nyipici, öhne hnyawa fe hi angeice lai. Hetrenyi la 70 lao trahmany, nge angatr a hmi kowe la itre haze ka thoi. Angatr a qaja ka hape: ‘Thaa öhnyi së kö hnei Iehova. Paatre hë Nyidrëti qa ngöne la nöj.’

Thupene lai, Iehova a amamane koi Ezekiela la itre xaa föe ngöne la thingene qanahag, götrane ailopi ne la ēnē. Angatr a lapa e cili, me hmi kowe la haze ka thoi, ene Tamuza. Nge itre trahmanyi fe, a kola cile ngöne la qëhnelö ne la ēnē i Iehova! Ala 25 angatr. Kola goeë angatr hnei Ezekiela. Angatr a qëmek hmekeië, a kola thil kowe la jö!

Öni Iehova ka hape: ‘Pëkö metrötre ne la itre atr celë koi ni. Thaa angatr hmekuje kö a kuca la itre ewekë ka sis, ngo goi tro fe angatr kowe la eneng me kuca itre eje e hnin!’ Haawe, Iehova a thingehnaeane ju ka hape: ‘Tro angatr a atre la etrune la elëhning. Nge thaa tro kö ni a utipin, ngöne la ijin kola troa lep apaatrenyi angatr.’

Köni macatre hi thupen la Iehova a amaman koi Ezekiela la itre ewekë cili, nge kola icilekeu hnei angetre Isaraela me Nebukaneza joxu. Haawe, nyidrëti a tro pi troa isi me angatr. Thupene la caa macatre nge sin, angetre Babulona hi lai a thë la ketre götran ne la hna xupi etine la lapa e Ierusalema, me dreuth la traon. Ala nyimu la itre atr hna humuth, nge ame itre xan hna xome matre nyihluën e Babulona

Pine nemen matre Iehova a nue angetre Babulona, troa lep apaatren e Ierusalema? Pine laka, thaa hnei angatre kö hna drei Iehova, nge thaa hnei angatre kö hna drengethenge la itre wathebo i Nyidrë. Kolo hi lai a amamane laka, nyipi ewekë tro pala hi së a kuca la hna qaja hnei Akötresie.

Ala xalaithe hi la itre atr hna pane nue pe troa mel e Isaraela. Hna acili Gedalia atre Iudra, matre troa tane la itre lapa i angatr. Ngo hna humuthi Gedalia hnene la itre xaa atr ne Isaraela. Ene pe xou hë la itre atr, e traqa pi angetre Babulona troa humuthi angatr, pine la hna traqa la ewekë ka ngazo celë. Haawe, angatr a kötre jë Aigupito eë, me hane fe huli Ieremia.

Celë hi matre pë hnyawa ha atren e Isaraela. Kola e la 70 lao macatre ne pë atren la nöj. Pë hnyawa ha aliene ej. Ngo Iehova a thingehnaean ka hape, tro Nyidrëti a abëekëne hmaca la nöje i Nyidrë Isaraela eë, thupene la 70 lao macatre. Ngo nemen la itre ewekë ka traqa kowe la nöje i Akötresie, ngöne la angatr a lapa trehnyiwa e Babulona? Tro sa ce wang hmaca pe.