ALATÜSÜ 10 juya süchikijee nümaain Nabucodonosor Babiloniamüin na israeliita kekiikana maʼin. ¡Piirakaa sümüin Jerusalén aʼajünüsü! Na israeliita nnojoliikana ouktuin püreesainjana Babiloniamüin.

Soto paaʼin sülatüinjatüin tia naashin na nünüikimaajanakana Maleiwa nnojorüle neeʼiranajaain nakuwaʼipa na israeliitakana. Ayatüshii naya aʼwaajüin tü maleiwayaasükat. Makalaka süsalainjanain naya naainjala. Nüküjüin wamüin Ezequiel tü kasa mojusü naainjaka na israeliitakana.

¿Jarai chi wayuu kanüliakai Ezequiel? Nia wanee jimaʼai nümaaka Nabucodonosor Babiloniamüin 10 juya süpülapünaa saʼajünüin Jerusalén. Daniel, Sadrac, Mesac otta Abednego oʼunushii nümaa Babiloniamüin.

Chaiwaʼaya Ezequiel Babilonia niiʼiyatüin Jeʼwaa nümüin tü kasa mojusü aainjünakat suluʼu tü aʼwaajüleekat chaaʼaya Jerusalén. ¡Mojusü maʼin tü niʼrakat!

Müshi Jeʼwaa nümüin: ‹Piirakaa sümüin tü kasa yarüttüsü naainjakat na wayuukana suluʼu tü aʼwaajüleekat. ¡Piirakaa sümüin tü shiyaakuakat wüi otta waneeirua mürüt sünainka süsepü tü piichikat! Naʼwaajüin shia na israeliitakana›. Niʼrüin otta nüshajüin Ezequiel süpüshuaʼa tia.

Nümaka Jeʼwaa: ‹¿Piʼrüin tü naainjakat nekiipuʼu na israeliitakana?› Niʼrüin Ezequiel 70 wayuu naʼwaajüin tü maleiwayaasükat sümaa namüin: ‹Nnojoishii waya niʼrüin Jeʼwaa, nnojoluichipa wamaain nia›.

Niiʼiyataka Jeʼwaa nümüin Ezequiel wanee jieyuu joyotushii soʼuluʼu tü aʼwaajüleekat sünain aʼwaajaa chi maleiwayaashikai Tamuz. ¡Piirakaa namüin 25 wayuu naʼwaajüin chi Kaʼikai soʼuluʼu tü aʼwaajüleekat! Niʼrüin naya Ezequiel.

Nümaka Jeʼwaa: ‹Nnojoishi kojutuin taya namüin na wayuukana. Aainjüshi kasa mojusü suluʼu tü aʼwaajüleekat. Makalaka süsaleenain naya tatuma otta nnojoleerü mojuin taaʼin ouktapa naya›.

3 juya süchikijee tia, eʼrüliijaashii wayumüin na israeliitakana nümüin Nabucodonosor. Makalaka nütkaain namaa. Wanee juya shiatapünaamüin najuttitka na babiloniajeʼewaliikana süsepü Jerusalén otta naʼajaka shia. Kojuya na ouktakana jee oʼunakana püreesain Babiloniamüin.

¿Jamüsü nuuʼulaaka Jeʼwaa sülatüin tia? Shia süka nnojoluin noonooin na israeliitakana nümüin. Tia shikirajüin waya anain maʼin oonowaa waneepia nümüin Jeʼwaa.

Palitchon israeliita nüpütaka Nabucodonosor chaaʼaya Israel, naaʼinmajirüin naya Guedalías. Nuʼutunaka aaʼin Guedalías natuma na israeliitakana. Mmotka naya seema noʼutunuin aaʼin natuma na babiloniajeʼewaliikana. Noʼunaka Egiptomüin, namaaka Jeremías.

Nnojotsü wayuu suluʼu tü mmakat Israel soʼu 70 juya. Naashin Jeʼwaa nüleʼejirüinjana nachikuaʼa na israeliitakana sülatapa 70 juya. ¿Kasa alataka namüin na israeliitakana Babilonia? Wekirajaa sünain.