Kukwe kira 76

Jerusalén ganinte

REI Nabucodonosor nikani nitre Israel bäri töbätä ngwena Babilonia ye bitikäre kä nikani kwäjätä biti bäri ta. ¡Ye biti, mike ñärärä! Jerusalén kukwata, aune nitre Israel ñaka ngatani ye jänikani ngite Babilonia.

Ngwen törö jai, nitre Israel ñaka kukwe käme tuainmetre angwane, kukwe ye rabai barebätä nitre profeta käkwe niebare. Akwa nitre Israel ñaka profeta kukwei mikani täte. Namani jankunu ngöbö ngwarbe mike täte aune ñaka Jehová mikani täte kwetre. Yebätä mikani ja ngie nuin. Nitre Israel nämene kukwe käme nuainne ye profeta Ezequiel tä mike gare nie.

¿Ezequiel ye nire gare mäi? Ye monso iti abokän Nabucodonosor nikani ngwena Babilonia, kä kwäjätä biti bäri Jerusalén gate jämi ye känenkri. Daniel bätä ja ketamuko nimä kwe Sadrac, Mesac bätä Abednego, ye jänikani bengwaire Babilonia arato.

Ezequiel nämene Babilonia angwane, kukwe käme nuain nämene templo Jerusalén yete, ye Jehovakwe mikani gare ie. Jehová jondron ye mikani tuare köböre ie. Ezequiel nämene metre Babilonia, akwa jondron nuain nämene templo yete ye jökrä Jehová mikani tuare ie. ¡Jondron käme krubäte tuabare kwe!

‘Nitre tä jondron käme krubäte nuainne templo yete mike ñärärä,’ Jehová niebare Ezequiel ie. ‘Kulebra bätä jondron mada bämikani kibätä mike ñärärä. ¡Aune nitre Israel tuin mike ngöböre jai!’ Jondron nuain nämene ye jutuabare Ezequiel ie, aune kukwe ye tikabare kwe.

‘¿Nitre ji ngwanka Israel tä kukwe nuainne gore ye tuin mäi?’ Jehovakwe ngwanintari Ezequiel ie. Ye tuabare kwe arato. Nitre brare 70 tä yete, aune jökrä tä ngöbö ngwarbe mike täte. Tätre niere: ‘Ni ñaka tuin Jehová ie. Niara ñaka tä juta nete.’

Biti, jukwe ngwitärikri templo yete, meri ruäre nämene ye Jehová mikani tuare ie. Nämene täkäni yete ngöbö ngwarbe Tamuz ye mike täte. ¡Aune nitre brare tä jukwete templo Jehovakwe yete mike ñärärä! Nita 25 yete. Ezequiel käkwe tuani. ¡Tätre nikren tibien kädrikri Ñänä mike ngöböre jai!

‘Nitre ne ñaka ti mike ütiäte,’ Jehová niebare. ‘¡Ñaka tä kukwe käme ye aibe nuainne, ñakare aune tätre nüke nuainne templo tikwe nekänti!’ Yebätä Jehovakwe käbämikani: ‘Tita rubun krubäte ye rabai gare ietre. Niaratre gaite ye ngwane ñaka rabai tuin bobre tie.’

Jehovakwe kukwe ne mikani tuare Ezequiel ie ye bitikäre kä nikani komä ta, aune nitre Israel ja mikani rei Nabucodonosor ye rüere. Yebätä niara nikani rüre niaratre ye rüere. Kä kwati biti ötare ye bitikäre, ki Jerusalén yebiti dikaninte kwetre aune juta ye jökrä kukwani kwetre. Nitre jökrä bäsi ngatani aune ruäre jänikani ngite Babilonia.

¿Ñobätä Jehovakwe kukwe tare ye tuanimetre nemen bare nitre Israel yebätä? Ñaka Jehová kukwei mikani täte kwetre yebätä. Ne tä mike gare nie, Ngöbö kukwei mikadre täte käre ye ütiäte krubäte.

Kena nitre braibe tuanimetre nüne kä Israel känti. Rei Nabucodonosor käkwe ni iti judio kädeka nämene Gedalías mikani nitre ye ngübarebiti. Akwa ni iti Israel käkwe Gedalías kämikani. Kukwe yebätä nitre Babilonia jatadreta aune niaratre gadrete kwetre ye jürä namani bätätre. Yebätä niaratre käkwe Jeremías töi mikani niken jabe, aune ngitie kä Egipto känti.

Ye ngwane nitre ñaka namanina jire iti kä Israel yekänti. Kä nikani 70 ta angwane nitre ñaka nünanbare iti jire juta yete. Ni ñaka nämene jire kä yekänti. Akwa kä 70 ye bitikäre Jehovakwe juta Israel mikai nüketa ja täte käbämikani kwe. Akwa kä ye ngwane, ¿dre nämene nemen bare juta Ngöbökwe yebätä kä Babilonia känti? Ani mike gare jai.

2 Reyes 25:1-26; Jeremías 29:10; Ezequiel 1:1-3; 8:1-18.