Jerusalem matji yandekwa
EHUNGI 76
Jerusalem matji yandekwa
PA KAPITA ozombura 10 kombunda yaindu ombara Nebukadnesar tja twara Ovaisrael mba hongerwe nawa tjinene ku Babilon. Nambano tara ku imbi mbi mavi tjitwa! Jerusalem matji nyosiwa. Nu Ovaisrael imba mbe ha zeperwe va toorwa otja ovakamburwa okutwarewa ku Babilon.
Zemburuka kutja ovaprofete vaJehova va rakiza kutja ihi matji tjitwa indu otjiwaṋa tji tji hi nokurundurura ozongaro zawo ozombi. Nungwari Ovaisrael kave puratenene kovaprofete. Owo va kayenda komurungu okurikotamena koomukuru vovisenginina poruveze rwokurikotamena ku Jehova. Okutja otjiwaṋa aatji sokuverwa. Eṱe matu tjiwa oviṋa mbi mena rokutja omuprofete waMukuru Esekiel we tu raera ohunga noviṋa ovivi Ovaisrael mbyaave tjiti.
Ove mo tjiwa kutja Esekiel owaṋi? Eye i umwe wovarumendu omitanda ombara Nebukadnesar mba twara ku Babilon ozombura 10 komurungu yomayandekero waJerusalem. Daniel nomapanga we yetatu Sadrak, Mesak na Abed-Nego, wina va twarerwe ku Babilon moruveze otjingero.
Esekiel ngunda a ri mu Babilon, Jehova we mu raisira oviṋa ovivi mbyaavi tjitwa mu Jerusalem pondembeli ye. Jehova ihi we tji tjita mokupitira motjihimise. Esekiel tjiri ngunda wa ri mu Babilon, nungwari Jehova wa tjita kutja eye ma mune oviṋa avihe mbyaavi tjitwa pondembeli. Nu oviṋa Esekiel mbya muna vya ri ovitirise!
Jehova wa raera Esekiel na tja: ‘Tara oviṋa oviyaukise ovandu mbi mave ungura pondembeli yandje. Tara komakuma nga kororwa novisanekero vyozonyoka novipuka vyarwe. Nu tara kOvaisrael mbu mave rikotamene ku vyo!’ Esekiel aa munu oviṋa mbi, neye wa tjanga avihe mbyaavi tjitwa.
Jehova wa pura Esekiel na tja: ‘Ove mo munu imbi ovanane vaIsrael mbi mave tjiti monyondwi?’ Otjiperi kutja eye ee vi munu wina. Opo pa ri novarumendu 70, nu avehe aave rikotamene koomukuru vovisenginina. Owo aave tja: ‘Jehova ke nokutumuna. Eye ke mo mehi.’
Okuzambo Jehova wa raisira Esekiel ovakazendu tjiva mba ri pomuvero wekeyuva kokunene wondembeli. Owo va ri ava haama mbo amave rikotamene ku mukuru wawo Tamus. Nu pa ri ovarumendu pomahitiro wondembeli. Opo pa ri 25 vawo. Esekiel ee ve munu. Owo aave woro ozongoro nave tara komuhuka nave rikotamene keyuva!
Jehova arire tja tja: ‘Ovandu mba kave nondengero na ami. Owo mave tjiti oviṋa ovivi nu mave vi tjitire mondembeli yandje!’ Okutja Jehova wa kwizika na tja: ‘Owo mave munu omasa womazenge wandje. Nu ami hi nokuveṱira ondjenda owo tji va yandekwa.’
Kombunda yozombura ape ndatu indu Jehova tja za nokuraisira Esekiel oviṋa mbi, Ovaisrael otji va uta okupirukira ombara Nebukadnesar. Okutja eye wa ya okukarwa nawo. Kombunda yombura imwe nohinga Ovababilon va teya omakuma yaJerusalem ave hiti nave kanyosa otjihuro atjihe. Ovandu ovengi va zepewa poo va twarewa ku Babilon otjovakamburwa.
Omena ratjike Jehova tja yandjera omayandekero omatirise nga ye tjitwe kOvaisrael? Omena rokutja owo kave puratenene ku Jehova nu kave ṱakamisire omatwako we. Ihi matji tu raisire kutja ounahepero kweṱe okutjita aruhe imbi Mukuru mbi ma hungire.
Rutenga ovandu ovaṱiṱi va yandjerwa okukara mehi raIsrael. Ombara Nebukadnesar wa twa po Omujuda wena Gedalja kutja ma tjevere ovandu mba. Nungwari Ovaisrael tjiva va zepa Gedalja. Nambano otjiwaṋa aatji tira kutja Ovababilon mave ye kuveyandeka avehe mena rotjiṋa otjivi hi tji tja tjitwa. Okutja owo va ṋiṋikiza Jeremia kutja me ye puna wo, nu owo va taurira ku Engipte.
Ihi tja tjita kutja ehi raIsrael ri isiwe nokuhi novandu kaparukaze. Oure wozombura 70 kape nomundu ngwa turire mehi. Oro ra ri tjo. Nungwari Jehova wa kwizika kutja ma kotora otjiwaṋa tje kehi ndi kombunda yozombura 70. Nu moruveze ndwi otjiwaṋa tjaMukuru matji tjitwa tjike kehi raBabilon ku va twarewa? Indjeye tu tare.
