UKRI vrẹ ikpe 10 no nọ Nebukadneza Ovie o ro mu Ahwo-Izrẹl kpobi nọ a mai wo eriariẹ kpobọ Babilọn. Enẹna who ri oware nọ o be via! A be mahe Jerusalem fihọ otọ. Yọ Ahwo-Izrẹl nọ akpe he a bi mua’i kpobọ Babilọn.

Kareghẹhọ, onana họ onọ eruẹaro Jihova evẹvẹ unu riẹ nọ o rẹ te via otẹrọnọ ahwo na a gbe nwene idhere iyoma rai hi. Rekọ Ahwo-Izrẹl a gaviezọ kẹ eruẹaro na ha. Abiobọ nyẹ Jihova kọ eghẹnẹ erue a ruẹrẹ abọ họ ẹ gọ. Fikiere u te epanọ a rẹ rọ kẹ ahwo na uye. Ma riẹ onana keme na Izikiẹl ọruẹaro Ọghẹnẹ ọ ta kẹ omai kpahe eware iyoma nọ Ahwo-Izrẹl a je ru.

Kọ whọ riẹ ohwo nọ Izikiẹl ọ rọ? Ọ ye họ omọvo emoha nọ Nebukadneza Ovie o mu kpobọ Babilọn nọ ukri vrẹ ikpe 10 no tao re ọraha ologbo Jerusalem ọnana ọ tẹ tẹ via. Daniẹl avọ egbẹnyusu esa riẹ Shedrak, Mishak gbe Abẹdinigo okioke ovo na a ro mua’i kpobọ Babilọn re.

Okenọ Izikiẹl ọ gbẹ jọ evaọ Babilọn, Jihova o ro dhesẹ eware iyoma nọ e rẹ via evaọ tẹmple obọ Jerusalem rọ kẹe. Jihova o ru onana edhere igbunu. Izikiẹl ọ ghinẹ gbẹ rọ evaọ Babilọn, rekọ Jihova o te rue’i ruẹ koware koware nọ o rẹ via evaọ tẹmple na. Yọ eware nọ Izikiẹl ọ ruẹ igbunu!

‘Rri eware etọtọ nọ ahwo a re ruo evaọ tẹmple na,’ ere Jihova ọ ta kẹ Izikiẹl. ‘Rri igbẹhẹ nọ evọ avọ iwoho erao imuomu gbe erao efa. Rri Ahwo-Izrẹl nọ a be gọ ae!’ Izikiẹl ọ ruẹ eware enana, o te kere eware nọ erẹ via na fihọ otọ.

‘Kọ whọ ruẹ eware nọ isu Ahwo-Izrẹl a bi ru evaọ edidi?’ Ere Jihova ọ nọ Izikiẹl. Ẹhẹ, ọ rẹ sae ruẹ onana re. Ezae 70 erọ, yọ ai kpobi a rọ eghẹnẹ erue ẹ gọ. A tẹ be ta nnọ: ‘Jihova ọ rọ omai ẹruẹ hẹ. Ọ nya se otọ na ba no.’

Kẹsiẹe Jihova o te dhesẹ eyae jọ kẹ Izikiẹl evaọ unu ẹkpẹlobọ ọre tẹmple na. A keria etẹe be gọ Tammọz ọghẹnẹ ọrue na. Je ri ezae eyena evaọ unu tẹmple Jihova! Owọhọ nọ a bu te ahwo 25 rai. Izikiẹl ọ rue rai. Akigwẹ ri obọ ovathaọre a tẹ be gọ ọre!

‘Ahwo ọnana a kẹ omẹ orro ho,’ ere Jihova ọ tae. ‘Orọnikọ eware iyoma ọvo a re ruo ho, rekọ evaọ tẹmple mẹ a nyaze ti rua’e!’ Fikiere Jihova ọ tẹ y’eya nọ: ‘Ogaga ofu mẹ u re ti tai oma. Yọ me re ti weri kai hi, oke nọ a re ti kpai.’

Nọ Jihova odhesẹ eware nana kẹ Izikiẹl no, oware wọhọ ikpe esa ọvo evrẹ re Ahwo-Izrẹl a tẹ wọso Nebukadneza Ovie. Fikiere o te mua’i họ elele họre. Nọ ẹgbukpe gbe ubro ọze vrẹ no ahwo Babilọn a te kporo igbẹhẹ Jerusalem lafi a tẹ mahe okpẹwho na muotọ. Ibuobu akpe hayo mu kpobọ Babilọn.

Fikieme Jihova ọ jẹ kẹ uvẹ re ọraha ologbo otiọna ọ via kẹ Ahwo-Izrẹl? Ẹhẹ, fiki epanọ a yo ẹme kẹ Jihova ha a gbe je yo izi riẹ hẹ. Onana udhesẹ epanọ u wo uzou te re ma ru onọ Ọghẹnẹ ọ tae ẹsikpobi.

Evaọ oke ọsosuọ ahwo kakao a kẹ uvẹ re a ria evaọ otọ Izrẹl. Nebukadneza Ovie o te fi ohwo i Ju nọ a re se odẹ riẹ Gẹdelaya re ọ jọ osu ahwo ọnana. Rekọ Ahwo-Izrẹl jọ a te kpe Gẹdelaya. Enẹna ozọ otẹ rọ ahwo na emuo nnọ ahwo Babilọn a rẹ te tha ti kpai kpobi no fiki nọ oware uyoma onana ovia. Fikiere a tẹ gba Jerimaya họ nya lelai a tẹ dhẹ kpobọ Ijipti.

Onana u te ru otọ Izrẹl fihọ epanọ ahwo ọvuọvo a gbẹ rọ ja riẹe vievie he. Ikpe 70 ohwo ọvuọvo ọ ria evaọ otọ na ha. O rọ ufofe tẹtẹtẹ. Rekọ Jihova ọya eya nọ ikpe 70 evrẹ no ọ rẹ te wariẹ zihe ahwo riẹ ze otọ na. Evaọ oke onana, eme ọ rọ ahwo Ọghẹnẹ ẹvia kẹ evaọ otọ Babilọn nọ amu rai kpohọ na? J’oma ruẹ.