AK XNUMEʼK 10 chihabʼ naq laj Nabucodonosor kixkʼamebʼ li wankebʼ xnaʼlebʼ saʼ li tenamit Babilonia. Li tenamit Jerusalen kikʼatk. Abʼan ebʼ laj Israel li inkʼaʼ keʼkamk, keʼkʼameʼk choʼq moos saʼ li tenamit Babilonia.

Ebʼ laj kʼanjel chiru li Yos keʼxye naq chixjunil aʼin teʼxkʼul ebʼ laj Israel wi inkʼaʼ nekeʼxjal xnaʼlebʼ. Abʼan ebʼ laj Israel inkʼaʼ keʼabʼink ut inkʼaʼ keʼxkanabʼ xloqʼoninkil ebʼ li pechʼbʼil yos. Laj Ezequiel, laj kʼanjel chiru li Yos, kixye chixjunil li maaʼusilal li keʼxbʼaanu ebʼ laj Israel. Joʼkan naq xkʼulubʼebʼ chixjunil aʼin.

Ma nakaanaw ani laj Ezequiel? Aʼan jun rehebʼ li saaj al li kixkʼam laj Nabucodonosor saʼ li tenamit Babilonia naq toj maajiʼ nekeʼxsach li tenamit Jerusalen. Naq kikʼameʼk laj Ezequiel, keʼkʼameʼk ajwiʼ laj Daniel ut ebʼ li oxibʼ chi ramiiw.

Laj Ezequiel toj wank saʼ li tenamit Babilonia naq li Jehobʼa kixkʼut chiru rikʼin sachbʼachʼoolej li maaʼusilal li yookebʼ xbʼaanunkil saʼ li Rochoch li Yos aran Jerusalen. Kʼajoʼ xyiibʼal ru li kiril laj Ezequiel saʼ li sachbʼachʼoolej!

Li Jehobʼa kixye re laj Ezequiel: ‹Chaawil ebʼ laj Israel yookebʼ xtzʼajninkil saʼ li Wochoch. Xeʼxkʼe reetalil ebʼ li kʼantiʼ ut ebʼ li xul chiru li tzʼak. Ut yookebʼ xloqʼoninkilebʼ ru!› Laj Ezequiel kiril chixjunil li kiyeheʼk re xbʼaan li Yos ut kixtzʼiibʼa li yook chi kʼulmank.

Li Jehobʼa kixye re laj Ezequiel: ‹Ma nakaawil kʼaru yookebʼ xbʼaanunkil saʼ muqmu ebʼ li nekeʼkʼamok bʼe saʼ Israel?› Laj Ezequiel kiril ebʼ li 70 chi winq li yookebʼ xloqʼoninkil ebʼ li pechʼbʼil yos. Ut yookebʼ xyeebʼal: ‹Li Jehobʼa maaʼani chik saʼ li tenamit, joʼkan naq inkʼaʼ nokooril›.

Li Jehobʼa kixkʼut chiru laj Ezequiel naq chunchuukebʼ wiibʼ oxibʼ li ixq saʼ rokebʼaal li ochoch re loqʼonink ut yookebʼ xloqʼoninkil li pechʼbʼil yos Tamuz. Saʼ li xnim ruqʼebʼ li ixq wankebʼ tana 25 chi winq li yookebʼ chi xloqʼoninkil li Saqʼe.

Tojaʼ naq li Jehobʼa kixye: ‹Ebʼ laj Israel inkʼaʼ nekeʼroxloqʼi wu. Yookebʼ xbʼaanunkil li maaʼusilal ut yookebʼ ajwiʼ xbʼaanunkil saʼ li Wochoch. Joʼkan naq teʼxyal xkawil injosqʼil. Ut inkʼaʼ twil xtoqʼobʼaal ruhebʼ naq tinsachebʼ›.

Ak oxibʼ chihabʼ xnumik li eetalil li kixkʼut li Jehobʼa chiru laj Ezequiel, naq ebʼ laj Israel keʼxqʼet ribʼ chiru laj Nabucodonosor. Joʼkan naq laj Nabucodonosor kichalk chi yalok saʼ xbʼeenebʼ laj Israel. Naq kinumeʼk jun chihabʼ rikʼin waqibʼ po, ebʼ laj Babilonia keʼxtʼan li tzʼak ut keʼxkʼat li tenamit Jerusalen. Naabʼal keʼkamk ut wank keʼkʼameʼk choʼq moos saʼ li tenamit Babilonia.

Kʼaʼut naq li Jehobʼa kixkanabʼ naq ebʼ laj Israel teʼxkʼul li rahilal aʼin? Ebʼ laj Israel inkʼaʼ keʼrabʼi li Jehobʼa chi moko keʼxpaabʼ ta li xchaqʼrabʼ. Aʼin naxkʼut chiqu naq junelik tqabʼaanu li naxye qe li Yos.

Laj Nabucodonosor kixbʼaanu naq jun chʼuut chi poyanam teʼkanaaq saʼ li tenamit Israel. Ut kixxaqabʼ laj Guedalias, jun laj Judiiy, re naq t-iloq rehebʼ. Abʼan wiibʼ oxibʼ rehebʼ laj Israel keʼxkamsi laj Guedalias. Naq keʼxbʼaanu aʼin ebʼ laj Israel keʼok xxiw xbʼaan naq naru teʼkamsiiq xbʼaanebʼ laj Babilonia. Joʼkan naq keʼelelik ut keʼxkʼam laj Jeremias chirixebʼ saʼ li tenamit Egipto.

Joʼkan naq chiru 70 chihabʼ maaʼani chik kiwank saʼ li tenamit Israel. Li Jehobʼa kixye naq tnumeʼq 70 chihabʼ re naq teʼsutqʼiiq chaq ebʼ laj Israel saʼ li tenamit Jerusalen. Kʼaru yookebʼ xkʼulbʼal ebʼ laj Israel saʼ li tenamit Babilonia?