RŨGANO RWA 76
Jerusalemu Kwanangwo
RĨU nĩ mĩaka 10 mĩhĩtũku kuuma mũthamaki Nebukadinezaru aatwara Aisiraeli arĩa othe athomu mũno kũu Babuloni. Na rĩu tarora ũrĩa kũrekĩka! Jerusalemu nĩ gũcinwo rĩracinwo. Nao Aisiraeli arĩa matoragirũo magĩtwarũo Babuloni me mĩgwate.
Ririkana, ũũ nĩ ũrĩa mũnabii wa Jehova oigĩte ũngĩekĩkire andũ mangĩagire kũgarũrĩra mĩthiĩre yao mĩũru. O na kũrĩ ũguo Aisiraeli matiathikĩrĩirie anabii. Maathire na mbere gũthathaiya ngai cia maheni handũ ha Jehova. Na nĩũndũ ũcio andũ maagĩrĩirũo nĩ kũherithio. Nĩ tũĩ ũũ tondũ Ezekieli mũnabii wa Ngai atwĩraga maũndũ marĩa moru Aisiraeli mekire.
Hihi nĩ ũĩ Ezekieli nũũ? Aarĩ ũmwe wa andũ arĩa ethĩ arĩa mũthamaki Nebukadinezaru aatwarĩte Babuloni mĩaka 10 mbere ya kwanangwo kũu kũnene kwa Jerusalemu. Danieli na arata arĩa ake atatũ, Shadraka, Meshaka na Abedinego, o nao nĩ matwarĩtwo Babuloni ihinda-inĩ rĩu.
Ezekieli arĩ o kũu Babuloni-rĩ, Jehova nĩ aamwonirie maũndũ marĩa moru mekĩkaga thĩinĩ wa hekarũ o kũu Jerusalemu. Jehova eekire ũguo na njĩra ya kĩama. Kũna-rĩ, Ezekieli arĩ o Babuloni, ĩndĩ Jehova nĩ aamũhotithirie kuona maũndũ marĩa mekĩkaga thĩinĩ wa hekarũ. Na maũndũ marĩa Ezekieli onire maarĩ ma kũmakania!
Jehova eerire Ezekieli atĩrĩ, ‘Nĩ ũrona maũndũ manene ma thahu marĩa andũ mareka thĩinĩ wa hekarũ. Tarora thingo-inĩ wone mbica cia nyoka na nyamũ ingĩ. Tarora wone Aisiraeli magĩcihoya!’ Ezekieli nĩaahotire kuona indo icio, na akĩandĩka ũrĩa gwekĩkaga.
Ningĩ Jehova akĩũria Ezekieli atĩrĩ, ‘Nĩũkuona maũndũ marĩa athuri a Isiraeli mekagĩra hitho-inĩ?’ Ĩĩni, nĩahotire kuona o na maya mangĩ. Kwarĩ athuri 70, nao othe mathathaiyagia ngai cia maheni. Moigaga atĩrĩ: ‘Jehova ndegũtuona. Nĩatigĩte kũrũmbũiya ũhoro wa bũrũri ũyũ.’
Rĩu ningĩ Jehova akĩonia Ezekieli atumia amwe maarĩ kĩhingo-inĩ kĩa gathigathini ya hekarũ. Maikarĩte hau makĩhoya ngai ya maheni Tamuzu. Tawĩrorere andũ aarĩa me mũrango-inĩ wa hekarũ ya Jehova! Maarĩ andũ ta 25. Ezekieli nĩahotire kũmona. Mainamĩrĩirie mothiũ mwena wa irathĩro makĩhoya riũa!
Jehova akiuga atĩrĩ, ‘Andũ aya matindĩĩte. To maũndũ moru mekaga, ĩndĩ matonyete thĩinĩ wa hekarũ gatagatĩ kũmekĩra kuo!’ Na nĩ ũndũ ũcio Jehova akiuga ũũ: ‘Mekũnyua gĩkombe kĩa marakara makwa. Na ndikamaiguĩra tha rĩrĩa makanangwo.’
Nĩ ta thutha wa mĩaka ĩtatũ tu kuuma Jehova onia Ezekieli maũndũ macio, nĩrĩo Aisiraeli makararirie Mũthamaki Nebukadinezaru. Kwoguo agĩkĩmokĩrĩra. Thutha wa mwaka ũmwe na nuthu-rĩ, Ababuloni makĩmomora thingo cia Jerusalemu na magĩcina itũũra rĩu buru. Andũ aingĩ nĩmoragirũo kana magĩtwarũo me mĩgwate Babuloni.
Nĩkĩ gĩatũmire Jehova etĩkĩrie wanangĩku ũcio mũũru mũno wĩkwo Aisiraeli? Ĩĩni, tondũ matiathikĩrĩirie Jehova o na kana gwathĩkĩra watho wake. Ũndũ ũyũ ũtuonagia ũrĩa arĩ bata mũno hĩndĩ ciothe gwĩka ũrĩa Ngai oigĩte.
Mbere nĩ andũ anyinyi metĩkĩririo gũikara thĩinĩ wa bũrũri wa Isiraeli. Mũthamaki Nebukadinezaru aikarĩirie gĩtĩ Mũyahudi wetagwo Gedalia arũgamĩrĩre andũ. No ĩndĩ Aisiraeli amwe makĩũraga Gedalia. Andũ magĩgĩtigĩra nĩ ũndũ Ababuloni nĩmangĩokire mamanine tondũ wa ũndũ ũcio mũũru wekĩkĩte. Kwoguo magĩkuua Jeremia na hinya, na makĩũrĩra Misiri.
Ũndũ ũyũ watũmire bũrũri wa Isiraeli ũtiguo ũtarĩ na mũndũ o na ũmwe. Ihinda rĩa mĩaka 70, gũtirĩ mũndũ watũrire bũrũri-inĩ ũcio. Watigirũo ũkirĩte ngiria. Ĩndĩ Jehova eeranire atĩ andũ ake nĩmagaacoka bũrũri ũcio thutha wa mĩaka 70. No ĩndĩ mbere ya maũndũ macio-rĩ, nĩ atĩa gwekĩkire he andũ a Ngai bũrũri-inĩ wa Babuloni kũrĩa maatwarĩtwo? Reke tuone.
