KUNNGIP Nebukadnezarip Israelikkut pikkorinnersaannik Babylonimukaassineraniit ukiut qulit sinnerlugit qaangiussimapput. Maannalu qanoq pisoqartoq takoriaruk! Jerusalem ikuallappoq. Israelikkullu toqutaanngitsut aallarussaallutik tigusatut Babylonimukaanneqarput.

Eqqaamajuk Jehovap pruffiitiisa mianersoqqussutigisimagaat tamanna piumaartoq inuit inuunerlunnertik allanngortinngippassuk. Israelikkulli pruffiitit naalanngilaat. Jehova pallorfiginagu guutipilussiortuaannarput. Taamaattumik pillartariaqarput. Tamanna nalunngilarput Guutip pruffiitiata Ezekielip Israelikkut ajortuliaannik oqaluttuummatigut.

Ezekiel kinaasoq nalunngiliuk? Jerusalemip piuneerussaanissaa ukiut qulit sinnerlugit sioqqullugu inuusuttut kunngi Nebukadnezarip Babylonimut aallarussaasa taanna ilagaat. Daniel ikinngutaalu pingasut, Sjadrak, Mesjak Abed-Negolu, aamma taamanikkut Babylonimut aallarunneqarput.

Ezekiel Babylonimiitillugu Jehovap ajortunik Jerusalemimi naalaffimmi pisartunik takorruuisippaa. Jehova tupinnartuliornikkut taamaaliorpoq. Ezekiel Babylonimiikkaluarpoq, naalaffimmili pisartunik tamanik Jehovap takutippaa. Ezekielillu takusai kanngunaqaat!

’Inuit naalaffimmi iliuusaat maajunnartut takukkit,’ Jehovap Ezekiel oqarfigaa. ’Takuuk iikkat pulateriaarsuit uumasullu allat assinginik ulikkaarlugit qalipaaffigineqarsimasut. Takukkillu Israelikkut tamakkuninnga pallorfiginnittut!’ Ezekielip tamakku takusinnaavai, pisullu allattorlugit.

’Israelikkut siulersuisuisa isertortukkut qanoq iliornerat takuiuk?’ Jehovap Ezekiel aperaa. Aap, tamannattaaq takusinnaavaa. Angutit 70-iupput, tamarmillu guutipilussiorput. Oqarput: ’Jehovap isiginngilaatigut. Nuna qimassimavaa.’

Taava arnanik naalaffiup isaaffiani avannarlermiittunik Jehovap Ezekiel takutippaa. Guutipiluk Tammuz pallorfigaat. Angutillu Jehovap naalaffiata isaaffianiittut takukkit! 25-t missaanniipput. Ezekielip takusinnaavai. Kangimut saallutik pallorput seqinerlu guutisiorfigalugu.

’Inuit ukua ataqqinngilaannga,’ Jehova oqarpoq. ’Ajortunik iliuuseqaannanngillat aammattaarli naalaffinni allaat taamaaliorlutik!’ Taava Jehova neriorsuivoq: ’Kamannerma sakkortussusia misigissavaat. Piuneerunneqarpatalu misigeqatigissanngilakka.’

Jehovap Ezekielimut tamakkuninnga takutitsinerata ukiut pingasuinnaat missiliorlugit kingornagut Israelikkut kunngimut Nebukadnezarimut pikitsitsipput. Taava saassukkiartorpai. Ukiup aappaa qiteqqullugu qaangiummat Babylonimiut Jerusalemip qarmarsua putullugu isaapput illoqarfillu nunguillugu ikuallatsillugu. Inuit amerlanersaat toqunneqarput Babylonimulluunniit aallarunneqarlutik.

Suna pillugu Jehovap Israelikkut taama amiilaarnartigisumik piuneerussaanerat akueraa? Naalanngimmanni inatsisinilu maleruanngimmatigik. Tamatuma takutippaa qanoq pisariaqartigisoq Guutip oqaasii tamatigut naalattassallugit.

Aallaqqaataani inuppaaluit Israelimiiginnarnissaminnut akuerineqarput. Kunngip Nebukadnezarip juuti Gedaljamik atilik taakkununnga nakkutilliisunngortippaa. Kisianni Israelikkut ilaasa Gedalja toquppaat. Taava inuit siooralerput Babylonimiut aggissasoralugit piuneerukkiartorlutik ajortumik iliornertik tamanna pillugu. Taamaattumik Jeremias pinngitsaalivaat ilageqqullutik, Egyptenimullu qimaallutik.

Taava Israel inuerulluinnarpoq. Ukiut 70-it nuna inoqanngilaq. Jehovali neriorsuivoq ukiut 70-it qaangiuppata innuttani nunamut utertikkumaarlugit. Nunalli inoqanngikkallarnerani Guutip innuttai Babylonimut aallarussaasimasut qanoq ingerlappat? Takoriartigu.