PAPICHILE myaka jikumi kufuma kimye Mfumu Nebukaneza kyo atwajile bena Isalela bafunda bulongo ku Babilona. Pano akimona kyamwekelenga! Muzhi wa Yelusalema bamusokele. Kabiji bena Isalela bo babujile kwipaya bebatwajile mu buzha ku Babilona.

Akivuluka, kino kyo kyaambilengapo bangauzhi ba Yehoba amba kyo kikamweka umvwe kya kuba bantu babula kuleka mashinda abo atama. Bino bena Isalela kechi baumvwijile byaambilenga bangauzhi ne. Batwajijiletu na kupopwela balesa ba bubela mu kifulo kya kupopwela Yehoba. Onkao mambo, bantu bakambwilwe. Twayuka kino mambo ngauzhi wa Lesa, aye Ezikyo witubula bintu byatama bena Isalela byo baubilenga.

Nanchi wamuyuka Ezikyo nyi? Wajinga umo wa mu bansongwalume Mfumu Nebukaneza bo atwajile ku Babilona kukilaila pa myaka jikumi Yelusalema saka akyangye konaunwa. Danyela ne balunda nanji basatu, abo ba Shadalaka, Meshaka ne Abedenego nabo bebatwajile ku Babilona pa kimye kimotu.

Ezikyo byo akijinga mu Babilona, Yehoba wamumwesheshe bintu byatama byamwekelenga mu nzubo ya Lesa ku Yelusalema. Yehoba waubile kino mu jishinda ja kukumya. Ezikyo wajinga mu Babilona, bino Yehoba wamulengejile kumona bintu byonse byaubiwenga mu nzubo ya Lesa. Kabiji bintu byo amwene Ezikyo byajinga bya kukumya!

Yehoba waambijile Ezikyo amba: ‘Akimona bintu bya bunya bantu byo babena kuba mu nzubo ya Lesa. Akitala ku lubumbu kwayula bipashañano bya miloolo ne banyama bakwabo. Kabiji akimona bena Isalela byo babena kwibipopwela!’ Ezikyo wibimwene bino bintu kabiji wanembele bintu byaubiwenga.

Yehoba wamwipwizhe Ezikyo amba: ‘Nanchi wamona bakulumpe ba kisaka kya bena Isalela byo babena kuba ku mbaji nyi?’ Ee, ne bino nabyo wibimwene. Kwajinga banabalume 70, kabiji bano bonse bapopwejilenga balesa ba bubela. Baambilenga’mba: ‘Yehoba kechi ubena kwitumona ne, wafumamo kala mu ino ntanda.’

Kabiji Yehoba wamwesheshe Ezikyo banabakazhi bamo baikajijile ku kibelo kya ku kabeta ka ku buyeke bwa nzubo ya Lesa. Baikele saka bapopwela lesa wa bubela, Tamuza. Kabiji akimona banabalume baji ku kibelo kya nzubo ya Yehoba! Banabalume bajinga 25. Ezikyo wibamwene. Bafukamine panshi ne kutala ku musela saka bapopwela juba!

Yehoba waambile’mba: ‘Bano bantu kechi banemeka amiwa ne. Kechi bobatu bintu byatama ne, bino beya ne konka ku nzubo yami ne kwibyubilako!’ Onkao mambo, Yehoba walayile’mba: ‘Nkebobila bukaji bukatampe. Kabiji kechi nkebomvwina lusa pa kwibonauna ne.’

Papichiletu myaka isatu kufuma kimye Yehoba kyo amwesheshe Ezikyo bino bintu, bena Isalela po po baishile kusatukila Mfumu Nebukaneza. Na mambo a kino, wayile na kwibalwisha. Pa kupitapo mwaka umo ne kichika, bena Babilona basabile nsakwa ya Yelusalema ne kubwela kusoka muzhi yense lokoto. Bantu bavula baipayiwe nangwa kwibatwala mu buzha ku Babilona.

Mambo ka Yehoba kyo alekejile luno lonaiko lukatampe kwiya pa bena Isalela? Ke na mambo a kuba’mba kechi baumvwijile jiwi ja Yehoba ne kukokela mizhilo yanji ne. Kino kimwesha byo kyanemapo ne atweba kuba byamba Lesa kimye kyonse.

Pa kutendeka bantu bacheche bebaswishishe kukikala mu ntanda ya bena Isalela. Mfumu Nebukaneza watongwele Muyudea, aye Gedaliya kwikala kitumbafumo wa bano bantu. Pano bino, bena Isalela bamo bamwipayile Gedaliya. Ponkapo, bantu bachiine’mba bena Babilona bakeya ne kwibepaya bonse na mambo a kino kintu kyatama kyaubiwe. Onkao mambo, bakanjikizhe Yelemiya kuya nabo kabiji banyemejile ku Ijipita.

Kino kyalengejile ntanda ya Isalela kushalatu kwa kubula bantu. Pa myaka 70, kafwako waikele mu yoya ntanda ne. Yashajiletu ke masala. Bino Yehoba walayile’mba ukabwezha bantu banji mu ntanda panyuma ya kupitapo myaka 70. Pano pa kyokya kimye, ki ka kyamwekelenga ku bantu ba Lesa bajinga bazha mu ntanda ya Babilona? Twaya tumone.