CHƆŊ a teleŋ masaa Nɛbukanɛɛsa biu wanaa sinaa yauwa Isɔluɛi mbo kuaŋnuŋ a nda Babilɔŋndo, wɔsilaŋ tɔ laa hiou niŋ ni. Kɛ tofawɔ niko nyɛ cho yɔŋnɔŋndo naŋndo. A mal Chulusalɛm o yiŋ, okoŋ ma wa kɔlaŋ a Isɔluɛitiiyaa nda diu lia o chɛleŋ niŋ Babilɔŋ.

Loonuŋ maa lende wanaa suaa le Jɛhowaa ndaa dimi ni, maa hei cho nda yɔŋnɔŋ ni te a mel nɛila ndala yɔŋ wɔɔŋndaŋ te. Kɛ Isɔluɛitiiya yeŋ pɛŋ nda lani le. Ma puɛɛŋ pɔli a Jɛhowa, okoŋ ma wa hiouwɔɔ lachi tuŋ a mɛlɛkaa lachoowaa sooloo. Lelaŋ, waŋnda haa nɔ ma sɔla nyɛpalaa. Ŋ sina hei lapɛŋgu, kanifuule, mi Ɛsikiɛl wana suaa le Mɛlɛka wo dimul naa a sɔɔŋ wɔɔŋ Isɔluɛitiiya wa tosaa woŋ okɔɔ.

A sina pa wana Ɛsikiɛl wa wo? O wa waŋndo pilɛ o puaa feleŋguaa Nɛbukanɛɛsa kuɛ Babilɔŋnda tɛɛŋ. A boondii pilɛi keŋ kpe nda kuɛ a Daniɛl vɛlɛa chaaŋaa nduaa yaa wa, Sedaaki, Misiaki a Bɛniŋgo Babilɔŋ ni. Mɛɛ hei yɔŋnuŋ, ndoo hiou wɔsilaŋ tɔ tuupa mi Chulusalɛm sɔla tambii bɛnduei hei.

Boondii Ɛsikiɛl wa Babilɔŋnde, mi Jɛhowa chɔm ndu sɔɔŋ wɔɔŋ wa yɔŋnɔŋndo o maaŋ ndɔɔ niŋ Chulusalɛmndoŋ. Kaamaa Jɛhowa ndoo tosa hoo ni. Ma che bɛɛ naa Ɛsikiɛl wa wɔ Babilɔŋ, kɛ mi Jɛhowa tosa mbo cha nyɛ o nyɛ wa yɔŋnɔŋndo o maaŋndo niŋ. Nduyɛ nyɛ Ɛsikiɛl che wo wa bɔɔ o wɔɔŋ.

Mi Jɛhowa dimul Ɛsikiɛl aa: ‘Tofawɔ sɔɔŋ wɔɔŋ waŋnda cho tosaa o maaŋndo niŋndoŋ. Tofawɔ vɛlɛ mɛɛ nda holi holi fotueila kɛuwa a visiaa o maaŋndo yɛ. Nduyɛ tofa Isɔluɛitiiya laŋ sooloo!’ Nyɔŋ muŋ kpou, o yilɛŋnde niŋ Ɛsikiɛl wa muŋ chɔɔ yɔŋnɔŋndo ni, nduyɛ mbo poonyiaa muŋ kpede.

Mi Jɛhowa nyuna vɛlɛ Ɛsikiɛl aa: ‘Acho pa chɔɔ sɔɔŋ simlachiaa Isɔluɛitiiya cho tosaa o sɔɔ sɔɔyɛi niŋndo?’ Muŋ bɛɛ Ɛsikiɛl wa chɔɔ. Laŋgbaa 70 wa mɛlɛkaa lachoowaa sooloo ni. A wa dimio aa: ‘Jɛhowa cho naa chɔ le. O faŋaŋ o lɛŋndeŋ niŋ.’

Okoŋ kɔɔli, mi Jɛhowa chɔm Ɛsikiɛl waŋlaanduaa apum o dio cho o maaŋndo kpeŋgii ba luaŋndo ve. A cho ichali loŋ Tamuusi sooloo, mɛlɛka lachoowaa. Tofawɔ vɛlɛ puaa 25 o maaŋ Jɛhowaa sondoo! Mi Ɛsikiɛl cha vɛlɛ kaŋ. A tuŋnduŋ ma wa paaleŋ sooloo kpeŋgii le chaŋnde!

Mi Jɛhowa dimi aa: ‘Waŋnda haa nɔ lebɛɛ le ya le. O cho lɛ le sɔɔŋ wɔɔŋ nda cho tosaa woŋ te, kɛ hunɔɔ muŋ tosaa o maaŋ nuu niŋ kpeekpei!’ Le hei mi Jɛhowa dimi aa: ‘A nɔ le hunɔɔ kɔl ni tuuwo dombioo. Nduyɛ a sɔla bɛɛ tambei, mɔnɛi bii ya niŋ le nda le.’

Naapum wɔsilaŋ layaa laa hiou niŋ ni chɔŋ a boondii Jɛhowa chɔm Ɛsikiɛl nyɛm muŋnde. Mɛɛ a boondii keŋ mi Isɔluɛitiiya tosal masaa Nɛbukanɛɛsa nila kalulaŋ. Le hei, mbo kɔ del nda choo a chɔulabaa. Wɔsio pilɛ hiouwɔɔ a tɛndaa tɛɛŋ, mi Babiloniaŋnda huŋ piɔl kpakio Chulusalɛm wɔ, nduyɛ ma luam chioo chilikɔ. Ma diu wanaa bɔɔ bɔɔ, kɛ a nda mɛi yoomu wa, ma kua a atiŋ o chɛleŋ niŋ Babilɔŋ.

Le sabu yɛɛ Jɛhowa chɛllɛ mi Isɔluɛitiiya sɔla tambii waa naa? Kanifuule a yeŋ Jɛhowa nilaŋ te, nduyɛ a bii sawala ndɔlaŋ te. Hei cho naa chɔmndo maa lɔɔ lɔɔ fee o cho suɛi sɔwɛ le miŋ tosa nyɛ Mɛlɛka dimul naa wo.

Kɛ o tasela ndɔlaŋ, mi masaa Nɛbukanɛɛsa mɛi waŋnda atiŋ o lɛŋnde Isɔluɛileŋ niŋ. Mɛɛ mbo hɛli Chuunɔɔ opilɛ diolaŋ aa Kedalaya le mbo wa nda bolleŋ. Kɛ mi Isɔluɛitiiya apum dii Kedalaya. Mɛɛ mi sioonde bii niko waŋnda tau le suɛi wɔɔŋ yɔŋnuŋ hei ve, maa Babiloniaŋnda cho hunɔɔ nda diu kpou. Le hei, ma kindila Chɛlimaya le ma nyaanuŋ nda ndaa Ichipi.

Mi hei tosa waŋndo opilɛ bɛɛ lo o lɛŋnde Isɔluɛileŋ niŋ te. Le wɔsilaŋ 70 lɛŋndeŋ le waŋnuŋ fondo fuu. Kɛ mi Jɛhowa mɛi lediom maa wɔsila 70 laŋ la hiou pɛ, o cho wanaa nduaa miŋgi o lɛŋnde ndaleŋ niŋ pila. Kɛ tuupa mi hei yɔŋnuŋ, yɛɛnɛ cho yɛ yɔŋnɔŋndo a wanaa Mɛlɛkaa nda hiŋ o chɛleŋ niŋ Babilɔŋnda? Ŋ tofaŋndɔ.