ပူ ၇၆
ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤ အဂ့ၢ်
နဘူၤကးန့စၢ် က့ၤကိးပှၤအံၣ်စရ့လးဖိ အပှၤကူၣ်ဘၣ်ကူၣ်သ့ကတၢၢ်တဖၣ်ဆူ ဘၤဘူၤလိၣ်န့ၣ် အိၣ်အနံၣ် ၁၀ လံန့ၣ်လီၤ. ခဲအံၤ တၢ်မၤအသးဒ်လဲၣ်န့ၣ် ကွၢ်တဘီ. ဝ့ၢ်ယရူၤၡလ့ၣ် ဘၣ်တၢ်ဒွဲၣ်အီၣ်ကွံာ်အီၤလၢမ့ၣ်အူလံ. ပှၤအံၣ်စရ့လးဖိ လၢတဘၣ်တၢ်မၤသံအီၤတဖၣ်န့ၣ်တခီ ဘၣ်တၢ်က့ၤဖီၣ်အီၤဆူ ဝ့ၢ်ဘၤဘူၤလိၣ်န့ၣ်လီၤ.
မ့ၢ်သုသ့ၣ်နီၣ်ထီၣ်က့ၤဒံးလၢ ယဟိဝၤအဝံစံးဝဲဒၣ် ပှၤလၢအတဆီတလဲ အကျဲအၢတဖၣ်န့ၣ် ကမၤအသးဒ်အံၤလီၤန့ၣ်ဧါ. ပှၤအံၣ်စရ့လးဖိတဖၣ် တဒိကနၣ်ဝဲသ့ၣ် ဝံတဖၣ်အတၢ်ကတိၤ လ့ၤတက့ၤဘၣ်. လၢကဘူၣ်ဘါယဟိဝၤအလီၢ်န့ၣ် တဘါဝဲသ့ၣ်ဘၣ်ဒီး ဂုာ်ဘါဝဲသ့ၣ် တၢ်ဘူၣ်ကမၣ် ဘါကမၣ်တခီန့ၣ်လီၤ. လၢတၢ်န့ၣ်အဃိ အဝဲသ့ၣ် ကြၢးဘၣ်တၢ်စံၣ်ညီၣ်အီၤန့ၣ်လီၤ. အဂ့ၢ်ဒ်အံၤ, ပသ့ၣ်ညါတၢ်အံၤလၢ ယွၤအဝံယဃ့းစက့လး တဲဘၣ်ပှၤ တၢ်အၢတဖၣ်လၢ ပှၤအံၣ်စရ့လးဖိမၤဝဲသ့ၣ် အဃိန့ၣ်လီၤ.
ယဃ့းစက့လး မ့ၢ်မတၤလဲၣ်န့ၣ် သုသ့ၣ်ညါဧါ. အဝဲပၣ်ဃုာ်ဒီး ပှၤသးစၢ်တဖၣ်လၢ နဘူၤကးန့စၢ်က့ၤဖီၣ်ဆူ ဘၤဘူၤလိၣ်, တချုးဝ့ၢ်ယရူၤၡလ့ၣ် ဘၣ်တၢ်မၤဟးဂီၤကွံာ်အီၤ အဒိၣ်အမုာ်ဒ်အံၤဒံးဘၣ်အခါ, ဖဲအပူၤကွံာ်အနံၣ် ၁၀ န့ၣ်လီၤ. ဒၤနံးယ့လးဒီး အတံၤသကိးသၢဂၤလၢအမ့ၢ် ၡၤဒရး, မ့ၤၡးဒီး ဧဘ့ၤဒနကိၤတဖၣ်စ့ၢ်ကီး ဖဲအကတီၢ်န့ၣ် ဘၣ်တၢ်က့ၤဖီၣ်အီၤဆူ ဘၤဘူၤလိၣ်န့ၣ်လီၤ.
ဖဲယဃ့းစက့လးအိၣ်လၢ ဘၤဘူၤလိၣ်အကတီၢ်န့ၣ် ယဟိဝၤဒုးနဲၣ်အီၤ တၢ်အၢတၢ်သီလၢ တၢ်မၤအသးဒီး ဝ့ၢ်ယရူၤၡလ့ၣ် အတၢ်လုၢ်ဟံၣ်ပူၤန့ၣ်လီၤ. ယဟိဝၤဒုးနဲၣ်အီၤ ခီဖျိလၢအစိကမီၤန့ၣ်လီၤ. နီၢ်နီၢ်တခီ ယဃ့းစက့လးအိၣ်ဒၣ်ဝဲလၢ ဘၤဘူၤလိၣ်န့ၣ်လီၤ. ဘၣ်ဆၣ်သနာ်က့ ယဟိဝၤဒုးထံၣ်အီၤ တၢ်မၤအသးခဲလၢာ်လၢ တၢ်လုၢ်ဟံၣ်အပူၤန့ၣ်လီၤ. တၢ်လၢ ယဃ့းစက့လးထံၣ်ဝဲတဖၣ်န့ၣ် လီၤပျံၤလီၤဖုးဒိၣ်မးန့ၣ်လီၤ.
ယွၤစံးဘၣ် ယဃ့းစက့လးလၢ ‘ကွၢ်တၢ်လီၤသးဘၣ်အၢတဖၣ်လၢ ပှၤမၤလၢ တၢ်လုၣ်ဟံၣ်အပူၤန့ၣ်တက့ၢ်. ကွၢ်လၢတၢ်အဒူၣ်တဖၣ်အလိၤန့ၣ် ပှဲၤဒီး ဂုၢ်သ့ၣ် ဒီးဆၣ်ဖိကီၢ်ဖိအဂၤတဖၣ် အဂီၤန့ၣ်တက့ၢ်. ကွၢ်ပှၤအံၣ်စရ့လးဖိတဖၣ် ဘါတၢ်တဖၣ်အံၤန့ၣ်တက့ၢ်’ န့ၣ်လီၤ. ယဃ့းစက့လးထံၣ်ဘၣ်ဝဲ တၢ်တဖၣ်အံၤဒီး ကွဲးနီၣ်ဃာ်ဝဲ တၢ်မၤအသးသ့ၣ်တဖၣ်န့ၣ်လီၤ.
ယဟိဝၤသံကွၢ်ယဃ့းစက့လးလၢ ‘နထံၣ်တၢ်လၢ ပှၤအံၣ်စရ့လးဖိအခိၣ်တဖၣ် မၤလၢတၢ်ခူသူၣ်အပူၤန့ၣ်စ့ၢ်ကီးဧါ.’ မ့ၢ်ဝဲလီၤ. ယဃ့စက့လးထံၣ် တၢ်တဖၣ်အံၤစ့ၢ်ကီးလီၤ. ပှၤအိၣ်ဝဲ အဂၤ ၇၀ လီၤ. အဝဲသ့ၣ်ခဲလၢာ် ဘူၣ်ထီၣ်ဘါထီၣ်ဝဲ ယွၤလၢအကမူၤကမၣ်တဖၣ်န့ၣ်လီၤ. ဒီးစံးဝဲသ့ၣ်လၢ ‘ယဟိဝၤတထံၣ်ပှၤဘၣ်. အဝဲဒၣ်ညိကွံာ်ပထံပကီၢ်လံ’ န့ၣ်လီၤ.
ဝံၤဒီး, ယဟိဝၤဒုးနဲၣ်ကဒီးဝဲ ပိာ်မုၣ်တနီၤလၢ တၢ်လုၢ်ဟံၣ်ကလံၤစိးအပဲတြီန့ၣ်လီၤ. ပိာ်မုၣ်တဖၣ်အံၤ ဆ့ၣ်နီၤဒီး ဘူၣ်ထီၣ်ဘါထီၣ် ယွၤလၢအကမူၤကမၣ် တးမူး န့ၣ်လီၤ. ဒီးဒုးနဲၣ်အီၤစ့ၢ်ကီး ပိာ်ခွါတဖၣ်လၢ ယဟိဝၤအတၢ်လုၢ်ဟံၣ်အကျဲစၢၤန့ၣ်လီၤ. အိၣ်ဝဲ ၂၅ ဂၤဃၣ်ဃၣ်လီၤ. ယဃ့းစက့လးထံၣ် အဝဲသ့ၣ်လီၤ. အဝဲသ့ၣ်တဖၣ်န့ၣ် တီၤလီၤအခိၣ်ဆူမုၢ်ထီၣ်ဒီး ဘါထီၣ်ဝဲသ့ၣ်မုၢ်န့ၣ်လီၤ.
ယဟိဝၤစံးဝဲဒၣ် ‘ပှၤတဖၣ်အံၤ တယူးယီၣ်ပာ်ကဲယၤဘၣ်. တမ့ၢ်ထဲအမၤတၢ်တဂ့ၤတဘၣ်န့ၣ်ဘၣ်. ဟဲမၤတၢ်ဒဲးဘးတုၤလၢ ယတၢ်လုၢ်ဟံၣ်အပူၤန့ၣ်လီၤ.’ လၢတၢ်န့ၣ်အဃိ ယဟိဝၤစံးပာ်ဝဲဒၣ် ‘အဝဲသ့ၣ်န့ၣ် ကတူၢ်ဘၣ် ယတၢ်သးထီၣ်အတဟီၣ်န့ၣ်လီၤ. ဖဲအဝဲသ့ၣ် ဘၣ်တၢ်မၤဟးဂီၤအီၤအခါ ယတသးကညီၤအဝဲသ့ၣ်ဘၣ်’ န့ၣ်လီၤ.
ယဟိဝၤဒုးနဲၣ်ယဃ့းစက့လး တၢ်သ့ၣ်တဖၣ်အံၤဝံၤ အိၣ်ဒံးဒၣ်သၢနံၣ်အခါ ပှၤအံၣ်စရ့လးဖိတဖၣ် ပူထီၣ်ဝဲသ့ၣ် နဘူၤကးန့စၢ်န့ၣ်လီၤ. လၢတၢ်န့ၣ်အဃိ အဝဲဒၣ်လဲၤဒုးအဝဲသ့ၣ်န့ၣ်လီၤ. ယံာ်တနံၢ်တခီဝံၤအလီၢ်ခံ ပှၤဘၤဘူၤလိၣ်ဖိတဖၣ် ဘၢၣ်ဖျိဝ့ၢ်ယရူၤၡလ့ၣ်အတၢ်ဒူၣ်ဝံၤ ဒွဲၣ်အီၤကွံာ်အီၤလၢမ့ၣ်အူ တုၤအကဲထီၣ်ဖၣ်ဆါန့ၣ်လီၤ. ပှၤလၢအအါတဖၣ်ဘၣ်တၢ်မၤသံအီၤ ဒီးပှၤတနီၤ ဘၣ်တၢ်စၢဃာ်ဒီးက့ၤကိးအီၤဆူ ဘၤဘူၤလိၣ်န့ၣ်လီၤ.
ဘၣ်မနုၤအဃိ ယဟိဝၤဟ့ၣ်အခွဲးဒီး ဒုးဟဲလီၤဘၣ် တၢ်လီၤပျံၤလီၤဖုး အၢအၢသီသီလၢ ပှၤအံၣ်စရ့လးဖိတဖၣ် အဖီခိၣ်ဒ်အံၤန့ၣ်လဲၣ်. မ့ၢ်လီၤ. အဝဲသ့ၣ် တဒိကနၢ်ယွၤဒီး တတိၢ်န့ၢ်ဝဲစ့ၢ်ကီး ယွၤအတၢ်သိၣ်တၢ်သီတဖၣ်အဃိန့ၣ်လီၤ. တၢ်အံၤပာ်ဖျါထီၣ်န့ၢ်ပှၤလၢ ပကမၤ တၢ်လၢယွၤမၤလိာ်ပှၤ ထီဘိန့ၣ် အကါဒိၣ်ထဲလဲၣ်န့ၣ်လီၤ.
လၢအခီၣ်ထံးန့ၣ် စီၤပၤနဘူၤကးန့စၢ်ဟ့ၣ်အခွဲးလၢ ပှၤကအိၣ်ဒၣ်ထဲစှၤဂၤလၢ အံၣ်စရ့လးအကီၢ်န့ၣ်လီၤ. ပာ်ဝဲ ကဒါလယၤ, လၢအမ့ၢ်ပှၤယူဒၤဖိတဂၤ, ကပၢပှၤတဖၣ်န့ၣ်လီၤ. ဘၣ်ဆၣ်သနာ်က့ လၢခံန့ၣ် ပှၢ်အံၣ်စရ့လးဖိတနီၤ ကူၣ်မၤသံကွံာ် ကဒါလယၤန့ၣ်လီၤ. မ့မ့ၢ်ခဲအံၤ အဝဲသ့ၣ်မၤ တၢ်မၤအအၢအသီဒ်အံၤအဃိ ပျံၤဝဲသ့ၣ်လၢ ပှၤဘၤဘူၤလိၣ်ဖိ ကဟဲမၤဟးဂီၤကွံာ်အီၤ ခဲလၢာ်န့ၣ်လီၤ. လၢတၢ်န့ၣ်အဃိ ကိးဆူၣ်ဝဲသ့ၣ် ယံးရမံယၤဒီး ဃ့ၣ်ထီၣ်ကွံာ်ဝဲသ့ၣ်ဆူ ကီၢ်အဲၤကူပတူးန့ၣ်လီၤ.
လၢတၢ်န့ၣ်အဃိ လၢကီၢ်အံၣ်စရ့လးအပူၤန့ၣ် ပှၤတအိၣ်နီတဂၤလၢၤဘၣ်. အနံၣ် ၇၀ အတီၢ်ပူၤ ပှၤတအိၣ်နီတဂၤ ဒီးအိၣ်သယုၢ်ဝဲဒၣ်န့ၣ်လီၤ. ဘၣ်ဆၣ်သနာ်က့ ယဟိဝၤအတၢ်အၢၣ်လီၤအီလီၤအိၣ်ဝဲဒၣ်လၢ အနံၣ် ၇၀ မ့ၢ်ပှဲၤထီၣ်န့ၣ် ကဆှၢက့ၤဝဲအပှၤတဖၣ် ဆူအကီၢ်ဒၣ်ဝဲန့ၣ်လီၤ. အကတီၢ်အဝဲန့ၣ်တချုးဘၣ်အခါ ယွၤအပှၤဂီၢ်မုၢ် လၢအဘၣ်တၢ်က့ၤဖီၣ်အီၤတဖၣ် မၤအိၣ်မၤဆိးလၢ ဘၤဘူၤလိၣ်ဒ်လဲၣ်အဂ့ၢ်န့ၣ် ပကကွၢ်သကိးတက့ၢ်.
