APO pana piti nye nomvhura 10 kutunda apa hompa Nebukadenesara ga twere Vaisraeli navenye ava va lironga koBabironi. Tara asi yinke yina kuhoroka! Jerusarema kuna kuzihwika. Ano Vaisraeli ava va pilire kudipaga kuna kuvatwara ngovanadorongo koBabironi.

Diworoka, eyi yiyo va rondwere vaporofete vaJehova asi ngayi horoka nsene vantu kapi vana kupirura nonkedi dawo donondona. Nye Vaisraeli kapi va purakenene kovaporofete. Awo kwa twikilire ngorooro kukarera vakarunga woyimpempa montambo zokukerera Jehova. Yipo nye asi vantu ya va fililire yokuvatengeka. Ose kwa yi diva eyi morwa muporofete gwaKarunga Hesekiyeli kwa tu tantera ko yininke yimwe yoyidona eyi ngava rugana Vaisraeli.

Ono diva asi yilye Hesekiyeli? Age kuna kara gumwe govagaragona ava ga twere hompa Nebukadenesara koBabironi nomvhura 10 komeho zezonaguro lyaJerusarema eli lyenene. Ndaniyera novakwawo vatatu, oSaduraka naMesaka ntani naAbetenego, nawo kwa va twere koBabironi posiruwo seesi.

Hesekiyeli apa ana kara simpe moBabironi, Jehova ta mu likida yininke yoyidona eyi yina kuhoroka moJerusarema pontembeli. Jehova ta yi rugana eyi kupitira mositetu. Hesekiyeli mwene-mwene simpe kuna kara moBabironi, nye Jehova kwa mu ninkire a mone nayinye eyi yina kuhoroka kontembeli. Ano eyi ana kumona Hesekiyeli yokutukukisa!

Jehova ta tantere Hesekiyeli asi: ‘Tara yihuna eyi vana kurugana vantu apa pontembeli. Tara makuma aga gana zura mafano gomazoka noyikorama. Tara hena Vaisraeli ava vana kugatongamena!’ Hesekiyeli ta mono yininke nayinye eyi, makura ta yi tjanga.

Jehova ta pura Hesekiyeli asi: ‘To mono eyi vana kurugana vagendesi woVaisraeli mokahore-hore?’ Nhi, nage kuna kuyimona. Pana kara vagara 70, ano awo navenye kuna kukanderera vakarunga woyimpempa. Awo kuna kutanta asi: ‘Jehova kapi ana kutumona. Ga zumba sirongo.’

Jehova makura ta likida Hesekiyeli vakadi vamwe kerungavero lyokoMuzogo gontembeli. Awo kuna hingire oku tava kanderere karunga goyimpempa Tamusi. Tara hena vagara owo vana hingire pevero lyontembeli zaJehova! Awo kuna kara 25. Hesekiyeli ta va mono. Awo kuna kunyongamenena koUpumezuva va kanderere ezuva!

Jehova ta tanta asi: ‘Vantu ava kapi ava fumadeke nge. Awo kapisi kurugana tupu yininke yoyidona, nye kuwiza va ya yi ruganene moomu montembeli zange!’ Jehova makura ta tumbwidire asi: ‘Awo ngava mona nonkondo dehandu lyange. Ano ame kapi ngani va fira nkenda apa ngava va zonagura.’

Kwa pitire po tupu nomvhura ntatu konyima zapa Jehova ga likidire Hesekiyeli yininke eyi, makura Vaisraeli tava rwanesa hompa Nebukadenesara. Makura age ta zi a ka va rwise. Konyima zomvhura zimwe noukahe Vababironi tava hwilire moJerusarema nokuhwika sitata si mbandauke. Sinzi sovantu tava va dipaga ndi kuvatwara ngovanadorongo koBabironi.

Morwasinke Jehova ana pulisire ezonaguro lyedona ngesi li horokere Vaisraeli? Yimo, morwa awo kapi va purakena kwaJehova ntani kapi va limburukwire konoveta dendi. Eyi kuna kulikida asi ngapi omu ya kara nomulyo kwetu tu rugane eyi ana kutanta Karunga.

Pomuhowo vantu wovasesu kwa va pulisilire va kare mosirongo saIsraeli. Hompa Nebukadenesara ta tura Mujuda gedina Gedaliya a pangere vantu ava. Nye Vaisraeli vamwe makura tava dipaga Gedaliya. Vantu makura tava kara nowoma asi Vababironiya nava wiza va ya va zonagure morwa sininke sosidona esi sa horokere. Makura tava sininike Jeremiya a ze nawo, nokudukira koEgipite.

Eyi tayi sigi sirongo saIsraeli sa hana vantu. Kutupu ogu ana tungu mo nomvhura 70. Aso kwa kara mawoko-woko. Nye Jehova ta tumbwidire asi nga ka tengwida vantu vendi kosirongo esi konyima zonomvhura 70. Posiruwo nye esi, yinke yina kuhorokera vantu vaKarunga mosirongo saBabironi omu va va twere? Tu tareni.

2 Vahompa 25:1-26; Jeremiya 29:10; Hesekiyeli 1:1-3; 8:1-18.