Chihande 76

Yelusalema Navayenyeka

HANAHICHI myaka yakuhambakana 10 kufuma haze Mwangana Nevukataneza atwalile vaIsalele vakutanga chikuma kuMbavilone. Jino tala chuma chinakusoloka! Yelusalema vanakuyocha. Kaha vaIsalele vavatonyi vanakuvatwala kuMbavilone muufunge.

Anuka, mukiko vambile vapolofweto jaYehova kachi nge vatu navakakana kuseza jijila jakuhenga. Oloze vaIsalele vakanyine kwivwilila vapolofweto. Valemeselenga lika tulunga vamakuli nakuseza Yehova. Shikaho vatu vatelele kuvazangamisa. Tunejiva ngocho mwomwo kapolofweto kaKalunga, Ezekele, atulweza vyuma vyavipi valingilenga vaIsalele.

Unamwijiva Ezekele tahi? Apwile havakweze vatwalile kuMbavilone kuli Mwangana Nevukataneza kuhambakana hamyaka 10 shimbu kanda chino kwenyeka chachinene chaYelusalema chisoloke. Yikiko shimbu nawa vavatwalile vaNdanyele namasepa jenyi vatatu, Shatalake, Meshake, Avete-nengo kuMbavilone.

Shimbu Ezekele achili muMbavilone, Yehova mwamumwenesa vyuma vyavipi vinakusoloka mutembele kuYelusalema. Yehova mwalinga ngocho kuhichila mujila yakukomwesa. Ezekele ali chikupu muMbavilone, oloze Yehova namulingisa amone vyosena vili nakulingiwa hatembele. Kaha Ezekele himwamona vyuma vyavipi chiyovo!

Yehova mwalweza Ezekele ngwenyi: ‘Tala vyuma vyaunyengwe vali nakulinga vatu hano hatembele. Talomu jimbango jinazale namivwimbimbi yamanoka natunyama. Kaha achivatale vaIsalele vali nakuvalemesa!’ Ezekele navimono vyosena, nakusoneka vinakusoloka.

Yehova mwahula Ezekele ngwenyi: ‘Wavimono vyuma vanakulinga vatwamina javaIsalele mumilima nyi?’ Eyo, navimono. Kuli malunga 70, kaha vosena vanakulifukula kutulunga vamakuli. Vanakwamba ngwavo: ‘Yehova keshi nakutumonako. Yehova naseze lyehi lifuchi.’

Jino Yehova mwalweza Ezekele mapwevo vamwe vali kuchikolo chatembele chakutala kunote. Vanatwame kuze nakulemesa kalunga wamakuli Tamuze. Kaha tala, vaze malunga vali kuwingililo watembele yaYehova! Vali kafwe 25. Ezekele himwavamona. Vanakufukama nakutalisa meso avo kumusamuko nakulifukula kulikumbi!

Yehova ngwenyi: ‘Vatu kaveshi nakunguvumbikako. Hakulinga vyuma vyavipi nakwiza nakuvilingila kutembele yami!’ Jino Yehova mwashika ngwenyi: ‘Navevwa ngolo jakulundundu yami. Kangweshi kuvatetelako hakuvenyeka.’

Omu hanahichi myaka yitatu kufuma hakumumwenesa Ezekele vyuma kana kuli Yehova, vaIsalele hikufumbukila Mwangana Nevukataneza. Kaha himwalyasa navo jita. Hamwaka umwe nachimbwa chamwaka vaka-Mbavilone vapulasanyine jikembwe jaYelusalema nakwocha nganda yosena ndolokoto. Vatu vavavulu vanavajihi chipwe kuvatwala kuMbavilone nakupwa vafunge.

Mwomwo ika Yehova netavila vaIsalele vavenyeke chikuma ngana? Enga, mwomwo kavamwivwililile Yehova nakwononoka jishimbi jenyiko. Echi chili nakusolola muchalema kulyetu kuzata mwanahanjika Kalunga.

Hakavanga vatu vamwe hinavavecha vatwame mulifuchi lyaIsalele. Mwangana Nevukataneza himwatongola kaYuleya, Ngetaliya kupwa nguvulu yavo. Oloze vaIsalele vamwe hinavatapa Ngetaliya. Jino vatu vanevu woma ngwavo vaka-Mbavilone naveza nakuvenyeka vosena hachuma kanechi chachipi chinasoloka. Vashinjilile Yelemiya ayenga navo, kaha vachinyinyine kuEjipitu.

Jino muIsalele mwapwile vatu pimbi. Nou atwaminemo wauchi hamyaka 70. Mwapwile mwanganavene. Oloze Yehova ashikile ngwenyi mwakakindulwisamo vatu jenyi hakukuma chamyaka 70. Oholyapwa, vyuma vika vinakusoloka kuvatu jaKalunga mulifuchi lyaMbavilone kuze vanavatwale? Tutalenu kanawa.

Vamyangana 2, 25:1-26; Yelemiya 29:10; Ezekele 1:1-3; 8:1-18.