MPANJI 76

Yerusalema Anamujilumuni

MUNAHITI dehi yaaka kubadika ha 10 kufuma hasendeliyi Mwanta Nebukaneza antu amuIsarela asweja kutaña nakuyitwala muBabiloni. Dichi dinu talaña chuma chinakuzatika! Yerusalema anamwochi dehi. Dichi aIsarela abuliliwu kujaha ayisendeli neyi ankoli muBabiloni.

Anukaku, ichi dichahosheliwu atuprofwetu aYehova nawu chikamwekana neyi antu hiyakuhimpa yililu yawu yatamaku. Ilaña aIsarela hiyayitiyilili atuprofwetuku. Atwalekelihu nakudifukula kudi anzambi akutwamba chatela kudifukula kudi Yehova. Dichi antu ateleli kuyibabesha. Tuneluki chumichi muloña kaprofwetu kaNzambi Ezekeli natuleji yuma yatama yelileñawu aIsarela.

Wunamwiluki Ezekeli? Hiwumu hadi anyikwezi asendeliwu kudi Mwanta Nebukaneza muBabiloni yaaka 10 yinahitihu henohu iku kukisañana kweneni kwaYerusalema kanda kumwekani. Danyeli nimabwambu jindi asatu, niShadaraki, niMeshaki, niAbedinego niwena ayisendeli kuBabiloni hampinji yoyimu.

Henohu Ezekeli wuchidi muBabiloni, Yehova hakumumwekeshela yuma yatama yinakuzatika kuYerusalema hatembeli. Yehova hakwila ñana kuhitila muchihayamisha. Ezekeli wuchidi mwamweni muBabiloni, ilaña Yehova hakumwiteja kumona yuma yejima yinakuzatika hatembeli. Niyuma yinakumonayi Ezekeli yakuhayamisha!

Yehova hakumuleja Ezekeli nindi, ‘Talaña yishimashima yinakwilawu antu hatembeli. Talaña hambañu hakujikajika nanyevulu yatupela nianyama amakwawu. Nawa talaña aIsarela anakuyifukamina!’ Ezekeli hakumona iyi yuma dichi hakusoneka yuma yinakuzatika.

Yehova hakumwihula Ezekeli nindi, ‘Wunakumona chanakwilawu anlomboli awaIsarela kumbadi?’ Eña, niyena nakuyimona. Kudi amayala 70, nawa wejima wawu anakudifukula kudi anzambi akutwamba. Anakuhosha nawu: ‘Yehova hanakutumonaku. Nafumi mwituña.’

Dichi Yehova hakumumwekeshela Ezekeli ambanda amakwawu adi kuchinsu chakukabeta kaluwunda chatembeli. Anashakami kuna nakudifukula kudi nzambi wakutwamba Tamuzi. Talaña cheñi ana amayala kuwiñililu watembeli yaYehova! Adi kwakwihi na 25. Ezekeli hakuyimona. Anakufukamina nakutalisha kumusela nakudifukula kwitañwa!

Yehova hakuhosha nindi, ‘Awantu hiyanakunlemeshaku. Hiyakoñaña yuma yatama hohuku ilaña anakwinza kutembeli yami nakuyikoñelaku!’ Dichi Yehova hakusanyika nindi: ‘Akatiya ñovu yakuhila kwami. Nawa hinakayitiyila luwi neyi anayijilumuniku.’

Munahiti hohu yaaka yisatu hanyima yakwila Yehova namumwekesheli dehi Ezekeli yuma iyi, aIsarela hiyakudikaña naMwanta Nebukaneza. Dichi hakuya nakuyilwisha. Hanyima yachaaka chimu nachikunku eniBabiloni hiyakuhumuna mpwembu yaYerusalema nakwocha musumba shitu. Antu amavulu ayijahili hela kuyisenda neyi ankoli kuBabiloni.

Muloñadi Yehova chanetejeli ichi chuma chatama chiyimwekeni aIsarela? Eña, muloña hiyanamutiyilili Yehovaku nawa hiyovwahilili nshimbi jindiku. Ichi chinakumwekesha nawu chikwikala chalema kudetu mpinji yejima kwilaña chanakutulejayi Nzambi.

Hakusambila antu antesha ayitejeli kushakama mwituña daIsarela. Mwanta Nebukaneza hakwikamu kaYudeya mukulumpi wakutala awa antu wejina daGedaliya. Ilaña aIsarela amu hiyakumujaha Gedaliya. Ichi dinu antu hiyakutiya woma nawu eniBabiloni akwinza nakuyijilumuna wejima wawu muloña wanichi chuma chatama chinazatiki. Dichi hiyakumukanjikija Yeremiya kuya nawu, nawa hiyakutemukila kuEjipitu.

Hiyakushiya ituña daIsarela chakubula hela muntu. Hadi yaaka 70 kwosi muntu hela wumu wunakushakama mwituña. Mwosi muntu niwumu. Ilaña Yehova hakukana nindi wakayifuntisha antu jindi neyi munahiti dehi yaaka 70. Indi hayinu mpinji, chumanyi chinakuyimwekena antu jaNzambi mwituña daBabiloni munayitwaliwu? Tutalenu ntahi.

2 Anyanta 25:1-26; Yeremiya 29:10; Ezekeli 1:1-3; 8:1-18.