JE TSʼATO te nó jaʼato nga kikao ya Babilonia je rey Nabucodonosor xti xi nda kinichjine. ¡Kʼoa chótsenlalai! Títí Jerusalén, kʼoa je chjota israelita xi tsín kʼien ya Babilonia tjíofinikatíonʼio.

A faʼaitsjenli, kui jebi xi tongini kitso nga koa̱n je chjota xi kinchjaya tʼatsʼe Niná tsa tsín sikatío jmeni xi chʼao tjíosʼín. Tonga je chjota israelita likui kinrʼoéle chjota xi kinchjaya tʼatsʼe Niná. Tosi tonda niná ndiso tsakʼétsʼoale ʼndele nga Jeobá kʼoetsʼoale. Kuinga bakinsínile kjoañʼai xi tsakʼaile. Kuinga ʼyañá xi tʼatsʼe jebi nga je Ezequiel xi kinchjaya tʼatsʼe Niná kʼoatsoná jmeni xi chʼaokisʼin je chjota israelita.

A ʼyaní ʼyáni xi Ezequiel tsakʼin. Jé jngo xti xi kikao rey Nabucodonosor ya Babilonia tongini te nó nga kjesa nikjesonjin Jerusalén. Daniel kʼoa kao nga jan miyole je Sadrac, Mesac, kao Abednego, kʼoati kʼia kichaní ya Babilonia.

Kʼianga yasa tíjna Babilonia je Ezequiel, je Jeobá tsakakóle jmeni xi chʼao kjima ya yo̱ngo̱ xi tíjna Jerusalén. Kao nganʼiole Jeobá tsakakónile. Ezequiel ya tíjna Babilonia, tonga Jeobá tsakakóle ngayeje jme xi chʼao kjima ya yo̱ngo̱. ¡Nʼio chʼaotjín xi tsabe!

Je Jeobá kitsole Ezequiel: “Chótsenlalai jmeni xi chʼao tjíosʼín chjota i̱ yo̱ngo̱. Chótsenlalai ya tʼaxjáo, kui kjoan sénle ye̱ kʼoa kao xi kjaʼai cho̱ tjíotʼale. ¡Kʼoa chótsenlalai je chjota israelita, kui tjíobʼétsʼoale!” Ezequiel tsabe jebi, kʼoa tsakʼétʼaxo̱n jmeni xi kjima.

Kitsongánile Jeobá je Ezequiel: “A tiʼyaní jmeni xi toʼma kʼoatjíosʼín je xi tjíotítjonle chjota israelita”. Jaon, kʼoati tsabe jebi. Jankan kao te chjota tsabe, kʼoa niná ndiso tjíobʼétsʼoale ngatsʼi. Kʼoa tjíotso: “Likui tíbená Jeobá. Je kitsjionkon naxinandá”.

Xijekoan, je Jeobá tsakakó kʼale Ezequiel je yánchjín xi ya tjío jña tíjna jngo xo̱ntjoale yo̱ngo̱. Ya tjío nga tjíobʼétsʼoale je niná ndiso xi Tamuz tsakʼin. ¡Kʼoa kan aon chjota tsabe Ezequiel, xi ya tjío ya jchxo xo̱ntjoa yo̱ngo̱le Jeobá! ¡Ya tjíobinyá xkóle jña bitjoni Tsʼuí kʼoa kui tjíobʼétsʼoale!

Jeobá kitso: “Je chjota xokjoan likui bexkónna. ¡Litsa tokuijin xi chʼaotjín kʼoatjíosʼín, saʼnda i̱ tjíofaʼai yo̱ngo̱na kʼoa i̱ kʼoatjíosʼín!”. Kuinga kitsosíni Jeobá: “Skoe nganʼiole kjoajtina. Kʼoa likui aon koa̱nna tʼatsʼe chjota xokjoan kʼianga kjoaʼai nikjeson”.

Kʼianga je kichoka jan nó nga tsakakóle Jeobá je Ezequiel xi tʼatsʼe kjoa jebi, je chjota israelita yátsʼi̱n tsakinyále je rey Nabucodonosor. Kʼoa rey jebi kinrʼoe nga kiskan. Xijekoanni jngo nó basen, je chjota babilonio kisixkoa̱ xjáo xi kjindai Jerusalén kʼoa tsakaká ngayeje naxinandá. Nʼio nkjín chjota kʼien kʼoa tochoasa tsʼangi, je xi tsʼangi ya kichaní Babilonia nga kinikatíonʼio.

Ánni kitsjoaʼndesíni Jeobá nga kʼoasʼin kichonikjeson je chjota israelita. Kuinga tsín kinrʼoéle Jeobá kʼoa nga tsín kisitjoson kjoatéxomale. Jebi kui xi bakóyaná nga nʼio chjíle nga kʼoasʼiaan ngantsjai jmeni xi tso Niná.

Nga títjon kitjoʼnde kʼale chjota israelita nga tsakatio ya Israel. Je rey Nabucodonosor jngo chjota judío xi Guedalías tsakʼin tsakánele nga kisikuinda chjota jebi. Tonga je chjota israelita tsakʼéxkó kʼa xínkjín kʼoa kisikʼien Guedalías. Kʼoa xijekoan, kitsokjon ngatsʼi chjota tsa je kuichonrʼoe chjota babilonio kʼoa sikjeson xi totʼatsʼe kjoa jebi. Kʼoa tsakʼénele Jeremías nga kikao, kʼoa Egipto tsakanga.

Kʼoa kuinga likui tiʼya chjota tsakationi ya Israel. Jankan kao te nó nga tsín ʼya xi ti kisʼeni. Jngokʼa to kisʼetia. Tonga Jeobá kʼoakitso nga sikjinroa ijngokʼani naxinandále nga je kjoaʼato xi jankan kao te nó. Tonga, jméni xi koantʼain naxinandále Niná ya Babilonia. Kataʼyala.