Sturka 76

Jerusalem Ra Sauhki Tikan

KING Nibyukadnisar mita, Israel uplika nani kul kau pain brin nani ra, Babilun ra brih wan ba wina 10 mani luan kan. Bara nanara kaiki kais dia taki ba! Jerusalem ba angkan, bara Israel uplika nani pruras kan nani ra silak uplika baku Babilun ra brih auya.

Prapit nani mita witin nani ra saura dauki ba wina ai kupia lakras sa kaka baku takbia win kan ba kupiam krauks. Sakuna Israel uplika nani ba prapit nani smalki kan ba bila walras kan. Witin nani gâd kuninkira nani ra ban mayuni kan, Jehova ra mayunaia watlika ra. Baku bara naha paniska ba briaia kan. Israel uplika nani saura dauki kan ba yawan pain nu sa, kan Isikiel Gâd prapitka ba mita wan wisa.

Man nu sma Isikiel ba ya? 10 mani baku kau Jerusalem ra sauhki tikras kan kainara, Nibyukadnisar mita wahma nani Babilun ra brihwan ba tilara kan. Danyal bara ai panika yuhmpa, Sadrak, Misak bara Abid–Negu nani ra, sim pyua ra Babilun ra brihwan.

Isikiel ba kau Babilun ra kan pyua ra, Jehova mita Jerusalem tempelka bilara diara saura nani dauki kan ba sut marikan. Bara naha ba, Jehova sain kum bakku dauki marikan. Isikiel ba rait pali kau Babilun ra kan, sakuna Jehova mita tempel bilara dia taki kan ba sut marikan. Bara witin dia kaikan ba saura pali kan!

Jehova mita Isikiel ra win: ‘Man upla nani tempel bilara diara saura nani dauki ba kais. Tempel tnaya nani ra, pyuta bara daiwan wala lilkika nani paski bangki dauki bri ba. Bara Israel uplika nani ba lilkika nani ra ai pura suni mayuni bangwi ba kais!’ Isikiel ba naha dukya nani sut taki kan ba sip kan kaiki bara ulbaia.

Jehova mita Isikiel ra makabi walan: ‘Man Israel ta uplika nani diara yukukan ra dauki ba kaikisma ki?’ Au, witin kaikaia sip kata. 70 waitna gâd kuninkira nani ra mayuni kan ba. Waitnika nani ba aisi kan: ‘Jehova yawan ra wan kaikras sa. Witin ba kuntri wina mahka wan sa.’

Ningkara Jehova mita Isikiel ra marikan mairin kum kum tempel durka yahbra tani bara iwi, gâd kuninkira Tamus ra mayuni kan ba. Bara waitna 25 Gâd tempelka dimaika ra ba kais! Isikiel baha nani ra sin kaikan. Bara witin nani ba lalma tani ra aimakupi, Lapta ra ai pura suni kan!

Bara Jehova win: ‘Naha uplika nani ai kulkras sa. Witin nani diara saura baman daukras, ban sakuna, tempelki pali kat bal dauki bangwisa!’ Baha mita Jehova pramis munan: ‘Lawanki tara karnika kaiki bangwbia. Bara witin nani ra sauhki tikbia taim kupi ra lukamna apia.’

Jehova Isikiel ra, naha marikan ba wina, mani yuhmpa bri kan pyua ra, Israel uplika nani ba king Nibyukadnisar mapara buan. Baku bara witin Israel uplika mapara wih aiklaban. Aiklabi mani kum pura bakriki bri kan pyua ra, Babilun uplika Jerusalem tnaya kutbanka bakku dimi, taunka ul angkan. Upla aihkika pruan, wala nani ba silak uplika baku Babilun ra brihwan.

Dia muni Jehova swin naha sauhki tikanka na Israel uplika nani ra takan? Kan witin nani Jehova bila walras bara ai lâka nani ba sin alki briras kan. Naha wan marikisa, Gâd dia wan wi ba bila wali daukaia ba, kulkanka bri ba.

Taura, upla daknika sirpi kum ra Israel tasbaia ra swin. Naha uplika nani na king Nibyukadnisar Ju uplika kum Gidalaia maki kan ba mihta ra swin. Sakuna Israel uplika kum kum mita Gidalaia ra ikan. Bara, upla nani ba sibri kan Babilun uplika nani ba bal sut ra ikbia wisi. Baha mita Jirimaia ra taibi munan witin nani aikuki wabia, bara Idsipt ra plapi bangwan.

Baku daukan ba mita Israel kuntrika ra upla apu takan. 70 mani bilara kuntrika ba ra upla kumi sin iwras kan. Bila baman kan. Sakuna Jehova pramis munan 70 mani lubia ningkara, ai uplika nani ra kli kuntrika ra brih wabia ba. Sakuna, Babilun tasbaia ra Gâd uplika nani kan ra, dia taki kan? Kaisa kaikaia.

2 King nani 25:1-26; Jirimaia 29:10; Isikiel 1:1-3; 8:1-18.