XA̱NI̱YA̱ʼA 10 ku̱i̱ya̱ ña̱ ki̱ʼin ta̱ rey Nabucodonosor na̱ ñuu Israel míí na̱ xíni̱ va̱ʼa ku̱a̱ʼa̱n xíʼinra ñuu Babilonia. Ta vitin koto na̱ʼná yóʼo, xíxi̱ ñuu Jerusalén ta na̱ ñuu Israel na̱ kǒo níxi̱ʼi̱ nda̱kiʼinnana ku̱a̱ʼa̱n xíʼinna chí ñuu Babilonia.

¿Á ndákaʼún ña̱yóʼo kúú ña̱ ni̱ka̱ʼa̱n na̱ profeta ndoʼo na̱yóʼo tá kéʼékana ña̱ kini? Ta na̱ ñuu Israel kǒo níxiniso̱ʼona ña̱ ni̱ka̱ʼa̱n na̱yóʼo. Chi inkava ndióxi̱ nda̱sakáʼnuna su̱ví Jehová níndasakáʼnuna. Xíni̱yó xa̱ʼa ña̱yóʼo chi ta̱ profeta Jehová ta̱ naní Ezequiel na̱túʼun xa̱ʼa ña̱ kini ña̱ xi̱keʼé na̱ ñuu Israel. Ta xa̱ʼa ña̱yóʼo nda̱kiʼinna iin castigo.

¿Á xíni̱ún ndáa ta̱a kúú ta̱ Ezequiel? Ta̱yóʼo kúútu iin ta̱ loʼo ta̱ nda̱kiʼin ta̱ Nabucodonosor ku̱a̱ʼa̱n xíʼinra chí ñuu Babilonia tá kúma̱níka 10 ku̱i̱ya̱ ndiʼi-xa̱ʼa ñuu Jerusalén. Ta míí tiempo saátu ku̱a̱ʼa̱n ta̱ Daniel xíʼin na̱ migora ta̱ Sadrac, ta̱ Mesac xíʼin ta̱ Abednego ñuu Babilonia.

Tá ndíka̱a̱ka ta̱ Ezequiel ñuu Babilonia, Jehová ni̱na̱ʼa̱ra nu̱úra ndiʼi ña̱ kini ña̱ kéʼé na̱ ñuu Israel ini templo ña̱ ñuu Jerusalén. Xíʼin iin milagro ni̱na̱ʼa̱ Jehová ña̱yóʼo, ña̱ va̱ʼa kuni ta̱ Ezequiel ña̱ kéʼéna ini templo. Ta ña̱ xi̱nira nina ña̱ kini kúú ña̱ kéʼéna.

ʼKoto ndiʼi ña̱ kini ña̱ kéʼéna ini templo yóʼoʼ, káchi Jehová xíʼinra. ʼKoto nama̱ veʼe yóʼo ni̱ka̱ʼyi̱ña xíʼin na̱ʼná tí ko̱o̱ xíʼin inkaka kití. Ta koto na̱ ñuu Israel ndásakáʼnunaríʼ. Ta̱ Ezequiel xi̱nira ndiʼi ña̱ kúu, ta ka̱ʼyí ndiʼira ña̱ xi̱nira.

Jehová ni̱nda̱ka̱tu̱ʼunra ta̱ Ezequiel, ʼ¿á xi̱ni̱ún ña̱ kéʼé se̱ʼé na̱ níʼi yichi̱ nu̱ú na̱ ñuu Israel?ʼ Xi̱nivara 70 ta̱a, ta ndiʼina ndásakáʼnuna ndióxi̱ vatá, ta káchina: ʼJehová kǒo xínira ña̱ kéʼéyó, chi kǒokara íyo ñuu yóʼoʼ.

Tasaá Jehová ni̱na̱ʼa̱ra nu̱ú ta̱ Ezequiel, ta xi̱nira ná si̱ʼí ndóoná yéʼé templo ña̱ ndásakáʼnuná ndióxi̱ vatá ña̱ naní Tamuz. Ta xi̱nitura 25 ta̱a ndóona yéʼé templo chí ndaʼa̱ kúaʼa nu̱ú ndóo ná si̱ʼí, ta xi̱nira náyóʼo xíkuxítíná ña̱ ndásakáʼnuná ña̱ Ñu̱ʼu chí nu̱ú kítaña.

ʼNa̱ yiví yóʼo kǒo íxato̱ʼóna yi̱ʼi̱ʼ, káchi Jehová. ʼTa su̱ví kuití ña̱ kini yóʼo kéʼéna chi nda̱a̱ temploi̱ va̱xina kéʼénañaʼ. Xa̱ʼa ña̱yóʼo ni̱ka̱ʼa̱n Jehová: ʼTaxii̱ castigo ndaʼa̱na, ta kǒo kuʼvi̱-inii̱ kuni̱i̱na tá ná ndiʼi-xa̱ʼanaʼ.

U̱ni̱ loʼo kuití ku̱i̱ya̱ ni̱ya̱ʼa tá ni̱na̱ʼa̱ Jehová ña̱yóʼo nu̱ú ta̱ Ezequiel, na̱ ñuu Israel kǒo níxiniso̱ʼona ña̱ ni̱ka̱ʼa̱n ta̱ rey Nabucodonosor. Ta xa̱ʼa ña̱yóʼo ki̱ta ta̱ rey kanitáʼanra xíʼinna. Tá ni̱ya̱ʼa iin ku̱i̱ya̱ sava, na̱ ñuu Babilonia sa̱ndúvana nama̱ ñuu Jerusalén ta xa̱ʼmina iníísaá ñuu. Ku̱a̱ʼání na̱ yiví ni̱xi̱ʼi̱ ta na̱ kǒo níxi̱ʼi̱ nda̱kiʼinnana ku̱a̱ʼa̱n xíʼinna chí ñuu Babilonia.

¿Ndachun ta̱xi Jehová ndi̱ʼi-xa̱ʼa na̱ ñuu Israel? Saáchi kǒo níxiniso̱ʼona ña̱ ni̱ka̱ʼa̱nra ta ni kǒo níkeʼéna ña̱ káʼa̱n leyra. Ña̱yóʼo náʼa̱ña nu̱úyó ña̱ xíniñúʼu kuniso̱ʼoyó ña̱ káʼa̱n Jehová.

Tá xa̱ʼa ta̱xina ni̱ndo̱o iin grupo loʼo nu̱ú ña̱ ñuʼú ñuu Israel. Ta̱ rey Nabucodonosor ni̱ka̱ʼa̱nra xíʼin iin ta̱ naní Guedalías ta̱ ñuu Judá ná kiʼinra kuenta xíʼinna. Ta sava na̱ ñuu Israel xa̱ʼnína ta̱yóʼo. Ta vitin yíʼvinína kixi na̱ ñuu Babilonia sandiʼi-xa̱ʼana miína xa̱ʼa ña̱ xa̱ʼnína ta̱yóʼo. Tasaá i̱xandúxana xíʼin ta̱ Jeremías ná ku̱ʼu̱nra xíʼinna, ta ke̱ena ku̱a̱ʼa̱nna ñuu Egipto.

Tá ku̱a̱ʼa̱n ndiʼi na̱yóʼo, ni iinna kǒo níndo̱oka ñuuna. Ta 70 ku̱i̱ya̱ ni̱xi̱yo miíña saá. Soo Jehová ni̱ka̱ʼa̱nra tá ná ya̱ʼa 70 ku̱i̱ya̱ saáví ndikó tukuna koona nu̱úña. Ta vitin ná kotoyó, ¿ndáaña ndóʼo na̱ ñuu Ndióxi̱ na̱ ndóo chí ñuu Babilonia?