TLAPOUALISTLI 76

Okixpolojkej Jerusalén

YOPANOK kanaj majtlaktli xiuitl ijkuak ueyi tekiua Nabucodonosor okinuikak sekimej israelitas tlen okachi tlamatij itech Babilonia. ¡Uan axkan, xikita! Jerusalén tlatlatok, uan israelitas tlen amo mikij kinuikaj Babilonia ken tlakeualtin.

Xikilnamiki, ijkon okijtojkej teotlajtojkej panoskia tla amo kikauaskiaj tlamantli tlen amo kuali. Maski ijkon, israelitas amo okinkakilijkej teotlajtojkej. Ok okinueyichiuayaj teotsitsintin uan amo Jehová. Ik non, okinnamikiayaj ma tlajyouikan. Tikmatij pampa Ezequiel iteotlajtojki toTajtsin Dios techiluia tlen tlamantli tlen amo kuali okichiuayaj israelitas.

¿Tikmati akin okatka Ezequiel? Ye okatka se telpochtli itech akinmej Nabucodonosor okiuikak Babilonia, kanaj majtlaktli xiuitl achto kixpoloskiaj Jerusalén. Noijki ijkuakon Daniel uan eyi iyolikniuan, Sadrac, Mesac uan Abednego okinuikakej Babilonia.

Ijkuak Ezequiel ok okatka Babilonia, Jehová okititi tlamantli tlen amo kuali tlen israelitas okichijtokaj itech teokali tlen okatka Jerusalén. Jehová okimatilti ika se milagro. Maski Ezequiel ok okatka Babilonia, Jehová okikauili ma kita nochi tlen opanotoka itech teokali. ¡Tlen ye okitak melauak amo kuali!

Jehová okilui Ezequiel: ‘Xikita nochi tlamantli tlen sapanoa amo kuali tlen tlaltikpaktlakamej kichijtokej itech teokali. Xikita ken itech nochi tepamitl okintlapaluijkej koamej uan oksekimej yolkamej. ¡Uan xikita ken israelitas kinueyichijtokej!’. Ezequiel okitak nochi tlen opanotoka uan okijkuilo nochi tlen okitak.

Jehová okitlajtlani Ezequiel: ‘¿Tikita tlen kichijtokej san ichtaka tlayekankej israelitas?’. Kema, Ezequiel noijki okitak tlen okichiuayaj. Okatkaj 70 tlakamej, uan nochtin okinueyichiuayaj teotsitsintin. Yejuan okijtoayaj: ‘Jehová amo techita. Ayakmo yetok itech altepetl’.

Ijkuakon, Jehová okititi Ezequiel sekimej siuamej tlen okatkaj itech ikaltlatsakuil teokali tlen omokauaya ik norte. Ompa omotlaliayaj uan okiueyichiuayaj teotl Tamuz. ¡Uan okinmitak tlakamej tlen okatkaj itech ikaltlatsakuil iteokali Jehová! Okatkaj kanaj 25 tlakamej. Ezequiel okinmitak. ¡Omotlankuaketsayaj ik kanin kisaj Tonaltsin uan okiueyichiuayaj Tonaltsin!

Jehová okijto: ‘Ninmej tlaltikpaktlakamej amo nechtlakaita. ¡Amo san kichiuaj tlamantli tlen amo kuali, noijki uitsej itech noteokali uan ompa kichiuaj!’. Ik non, Jehová okijto: ‘Kitaskej ken nikualanis. Uan amo nimoyolkokos ijkuak kinmixpoloskej’.

Kanaj eyi xiuitl satepan Jehová okititi Ezequiel nochi nin, israelitas ayakmo okinekiayaj kitlakamatiskej ueyi tekiua Nabucodonosor. Ik non, Nabucodonosor okinteuito. Se xiuitl uan tlajko satepan, babilonios okitlamotlakej itepamitl Jerusalén uan okixotlatijkej nochi altepetl. Miakej tlaltikpaktlakamej omikej uan miakej okinuikakej Babilonia ken tlakeualtin.

¿Tleka Jehová okitekauili ma kinmixpolokan israelitas? Pampa amo okikakilijkej Jehová nion okitlakamatkej itlanauatiluan. Nin techititia moneki nochipa tikchiuaskej tlen kijtoa toTajtsin Dios.

Nabucodonosor okinkauili sekimej israelitas ma mokauakan itech altepetl Israel uan okinauati se judío tlen omotokayotiaya Guedalías ma kinyekana israelitas. Maski ijkon, sekimej israelitas okimiktijkej Guedalías. Axkan tlaltikpaktlakamej omomojtijkej, pampa babilonios uelis ualaskia uan kinmixpoloskiaj nochtin pampa okichijkej nin tlamantli amo kuali. Ik non, okichiualtijkej Jeremías ma uia imiuan uan ocholojkej itech ueyi altepetl Egipto.

Ik non, amo akaj omoka itech Israel. Itech 70 xiuitl amo akaj ochanti ompa uan amo itlaj omoka. Maski ijkon, Jehová okijto ialtepetl mokuepaskia 70 xiuitl satepan. Ijkuak ijkon opanotoka, ¿tlen okipanok ialtepetl toTajtsin Dios itech Babilonia? Ma tikitakan.

2 Reyes 25:1-26; Jeremías 29:10; Ezequiel 1:1-3; 8:1-18.