OOMVULA dhi vulithe 10 odha piti po okuza sho Omukwaniilwa Nebukadnesar a fala aalongwantu ayehe Aaisrael kuBabilon. Nongashingeyi tala shoka tashi ningwa po! Jerusalem otashi fikwa po. Aaisrael mboka inaaya dhipagwa otaa falwa kuBabilon oyo oonkwatwa.

Dhimbulukwa, osho shoka aaprofeti yaJehova ya londodha tashi ka ningwa ngele aantu itaya lundulula omikalo dhawo omiwinayi. Ihe Aaisrael inaya pulakena kaaprofeti. Yo oya tsikile nokulongela iikalunga pehala lyokulongela Jehova. Ano aantu oyi ilongele egeelo. Tse otu shi shi, oshoka omuprofeti gwaKalunga Hesekiel ote tu hokololele kombinga yiinima iiwinayi mbyoka Aaisrael ya ningi.

Owa tseya kutya Hesekiel oye lye? Oye gumwe gwomaalumentu aagundjuka mboka Omukwaniilwa Nebukadnesar a fala kuBabilon oomvula dhi vulithe po 10 komeho yehanagulo ndika enene lyaJerusalem. Daniel nookuume ke yatatu, Sadrak, Meshak na-Abednego, pethimbo opo tuu mpono nayo wo oya falwa kuBabilon.

Manga Hesekiel e li muBabilon, Jehova ote mu ulukile iinima iiwinayi mbyoka tayi ningwa potempeli muJerusalem. Jehova ote shi ningi mokupitila moshikumithalonga. Hesekiel oku li lela natango muBabilon, ihe Jehova ote mu monitha ayihe mbyoka tayi ningwa potempeli. Niinima mbyoka Hesekiel e wete oyo iitilithi!

‘Tala kiinima yiihuna mbyoka aantu taa ningi mpaka potempeli,’ Jehova ta lombwele Hesekiel. ‘Tala komakuma ga andekwa nomafano gomayoka niinamwenyo yilwe. Nou tale nkene Aaisrael taye yi galikana!’ Hesekiel ota vulu okumona iinima mbika, nota nyola shoka tashi ningwa.

‘Ou wete shoka aaleli Aaisrael taa ningi meholamo?’ Jehova ta pula Hesekiel. Eeno, ye ota vulu wo oku shi mona. Opu na aalumentu 70, ayehe otaa galikana iikalunga. Yo otaa ti: ‘Jehova ke tu wete. Ye okwa thiga po oshilongo.’

Opo nduno Jehova otu ulukile Hesekiel aakiintu yamwe peyelo lyokuumbangalantu lyotempeli. Yo oya kuutumba mpoka notaa galikana oshikalunga Tammus. Tala kaalumentu mbeyaka mehale lyotempeli yaJehova! Opu na 25 lwaampono. Hesekiel oku ya wete. Yo otaa petama ya taalela kuuzilo notaa galikana etango!

‘Aantu mbaka kaye na esimaneko nangame,’ Jehova ta ti. ‘Yo itaa longo owala uuwinayi, ihe otaye ya ye u ningile lelalela potempeli yandje!’ Ano Jehova otu uvaneke: ‘Yo otaa ka mona nkene ngame nda geya. Noitandi ke ya etela ohenda uuna yo taa hanagulwa po.’

Konyala konima owala yoomvula ndatu okuza sho Jehova u ulikile Hesekiel iinima mbika, Aaisrael oya tsu ondumbo nOmukwaniilwa Nebukadnesar. Ano ye ota yi e ke ya kondjithe. Konima yomvula netata Aababilon otayu ulula omankolokuma gaJerusalem notaa fike po oshilando ashihe. Aantu oyendji otaa dhipagwa nenge taa falwa kuBabilon oyo oonkwatwa.

Omolwashike mbela Jehova a pitika ehanagulo ndino lyAaisrael etilithi? Omolwashoka yo inaa pulakena kuJehova noinaa vulika koompango dhe. Otashi ulike nkene sha simana kutya tse tu longe aluhe shoka Kalunga ta ti.

Tango aantu aashona oyo taa pitikwa ya kale muIsrael. Omukwaniilwa Nebukadnesar ota tula po Omujuda gwedhina Gedalia okutonatela aantu mbaka. Ihe opo nduno Aaisrael yamwe otaa dhipaga Gedalia. Ngashingeyi aantu oya tila kutya Aababilon otaye ke ya ye ya hanagule po ayehe molwoshilonga shika oshiwinayi. Ano yo otaa yi ontuku kuEgipiti notaa thiminike Jeremia a ye pamwe nayo.

Otashi kalitha oshilongo shaIsrael shaa na aantu. Uule woomvula 70 moshilongo mwaa na omuntu. Oshi li owalaelela. Ihe Jehova otu uvaneke kutya ye ota ka galulila oshigwana she koshilongo konima yoomvula 70. Oshike mbela tashi ningilwa oshigwana shaKalunga pokati mpono moshilongo shaBabilon hoka yo ya falwa? Natu tale.