Historia 76

Kixoxotoniaj Jerusalén

YOPANOKEJ majtlaktli xiuitl ijkuak tekiuaj Nabucodonosor kinuika ipan ueyikalpan Babilonia, israelitas akin melak kuajli okiselijkej tlamachtijli. ¡Niman aman, xkita! Jerusalén tlatlatika, israelitas akin xomijkej kinuikaj Babilonia niman kintekitiltiaj kentla tlakeualtin.

Xkilnamiki, yejuin tlen iteotlajtokauan Jehová okimijlikej panoskia, tla yejuamej xkikajkauaj kichiuaj tlen xkuajli. San ika, israelitas xokintlakamatkej. Ok okinueyichiujkej tajtsitsintin niman okilkaujkej Jehová. Kuakon kinamiki matlajyouikan. Tikmatstokej pampa Ezequiel iteotlajtokauj toTajtsin, okijkuilo tlemach tlen xkuajli kichiuayaj israelitas.

¿Tikmatstika akinon katka Ezequiel? Yejua se telpochtli akin Nabucodonosor okuikak Babilonia, ijkuak poliuiya majtlaktli xiuitl ika kipopoloskiaj Jerusalén. Daniel niman akin iuan nouika, Sadrac, Mesac iuan Abednego, noijki ipan yejon tonajli okinuikakej Babilonia.

Ijkuak Ezequiel ok nemiya Babilonia, Jehová kititia tlen xkuajli panotika Jerusalén, ipan teopan. Jehová kichiua yejuin ika se milagro. Maski Ezequiel nemi Babilonia, Jehová kikauilia makita nochi tlen panotika ipan teopan. ¡Melak temomojti tlen kita!

‘Xkita tlen melak xkuajli kichiujtokej tlaltikpakchanejkej nikan ipan teopan’, Jehová kijlia Ezequiel. ‘Xkita kenon ipan tepantin yokitlapajlotijkej kouamej niman oksekimej yolkamej. ¡Niman xkita israelitas kenon kinueyichiujtokej!’ Ezequiel ueli kita nochi yejuin, niman kijkuiloua tlen panotika.

‘¿Tikita tlen kichiujtokej ichtaka akin kinyekanaj israelitas?’ Jehová kitlajtoltia Ezequiel. Kema, yejua noijki ueli kita yejuin. Nemij 70 tlakamej, niman nochimej kinueyichiujtokej tajtsitsintin. Kijtouaj: ‘Jehová xkita tlen tikchiujtokej. Yejua yotechtlalkaui’.

Kuakon Jehová kititia Ezequiel sekimej siuamej akin nemij ipan ipuerta teopan tlen nokaua ika tlakpak. Ompa yeuatokej kiueyichiujtokej intajtsin Tamuz. ¡Niman xkita tlakamej akin nemij ikalakiayan iteopan Jehová! Nemij kanaj 25. Ezequiel kimita. ¡Notlakuanketsaj ikisayan tonajli niman kiueyichiujtokej Tonajli!

‘Yejuin tlaltikpakchanejkej xnechtlakaitaj’, kijtoua Jehová. ‘Xsan kichiuaj tlen xkuajli, noijki uajlauej ipan noteopan kuajchiuaj!’ Ika yejon, Jehová kijtoua: ‘Kimatiskej kenon nikualani. Niman xnechajmanas ijkuak kinpopoloskej’.

Ijkuak Jehová kititia Ezequiel nochi yejuin, panoua yeyi xiuitl niman israelitas xkitlakamatij tekiuaj Nabucodonosor. Kuakon yejua yauj niman kominixnamiki. Panoua se xiuitl uan tlajko, babilonios kixoxotoniaj itepanuan Jerusalén niman kitlatiaj ueyikalpan. Melak miyekej mikij, oksekimej kimasij niman kinuikaj Babilonia.

¿Tleka Jehová okinkauili makinpopolokan israelitas? Pampa xokichiujkej tlen Jehová yokijtoka nion xokitlakamatkej itlanauatiluan. Yejuin techititia ika melak noneki nochipa matikchiuakan tlen Jehová kijtoua.

Ijkuak panoua yejuin, kinkauiliaj san sekimej manokauakan Israel. Tekiuaj Nabucodonosor kitlalia Guedalías makinyekana israelitas. San ika, sekimej kimiktiaj Guedalías. Aman israelitas nomojtiaj mauajlakan babilonios niman makinmiktikan nochimej. Kuakon kichiualtiaj Jeremías imiuan macholo, niman yauej Egipto.

Yejuin kichiua maka yakaj manokaua ipan Israel. 70 xiuitl xakaj chanti ipan yejon país niman xtlaj onka. San ika, Jehová kijtoua ika kichiuas ikalpan oksejpa manokuepakan, ijkuak yopanok 70 xiuitl. Aman, ¿tlenon ipan nochiua ikalpan toTajtsin ijkuak nemij Babilonia? Matikitakan.

2 Reyes 25:1-26; Jeremías 29:10; Ezequiel 1:1-3; 8:1-18.