PAPITA omanima 10 tunde etyi Nambukondonosole atyinda ova Isilayeli vokuatanga nawa okuvetuala Kombambilonia. Pahe tala etyi tyikahi nokupita polutalatu olu. O Jelusalei ikahi nokupia. Ova Isilayeli vana vahaipaelwe, vekahi nokutualwa koukonde Kombambilonia.

Hinangela okuti etyi, otyo ovauuli va Yehova valondolele okuti matyikapita, inkha ovanthu kavayekepo okulinga ovipuka ovivi. Anthi, ova Isilayeli kavatehelele ovauli ovo. Vatualeleko okufenda ono huku mbomatutu, tyipona okufenda Yehova. Moluotyo, ovanthu ankho vatokala okuhitiswa. Etyi onthue tutyii, mokonda Ezekiele omuuli wa Huku, utupopila kombinga yovipuka ovivi ankho vilingwa nova Isilayeli.

Ezekiele umwii? Omukuendye umue wapolelue mo Jelusalei no Hamba Nambukondonosole kumue na Daniele na Sadrake, na Mesake, na Abedeneku eveeta Kombambilonia. Pomuvo oo, ankho kuakambela omanima 10 opo o Jelusalei ihanyaunuepo.

Puetyi Ezekiele ekahi Kombambilonia, Yehova wemulekesa ovipuka ovivi ankho vilingwa mondyuo ya Huku, ko Jelusalei. Yehova wemulekesa ovipuka ovio nehuviso. Ezekiele ankho ukahi Mombambilonia. Mahi Yehova emuyeke atale ovipuka aviho ankho vilingwa mondyuo ya Huku. Ovipuka Ezekiele amona, ovivi unene.

Yehova wapopila Ezekiele ati: ‘Tala ovipuka ovivi ovanthu valingila mondyuo ya Huku. Tala ovimato vieyula omalutalatu ononyoka no vinyama ovikuavo. Iya tala ova Isilayeli vekahi nokuvifenda.’ Ezekiele ovipuka ovio aviho wevimona, evihoneka.

Yehova apulu Ezekiele okuti: ‘Uluete etyi ononkhalamutue mbova Isilayeli valingila pokamphengi?’ Enga, natyo Ezekiele ankho utyiete. Ankho pena ovalume 70, vafenda ono huku mbomatutu. Avati: ‘Yehova ketueete. Otyilongo wetyisapo.’

Yehova alekesa vali Ezekiele ovakai vamue, ankho veli kombundi yokokulio kuondyuo ya Huku. Ankho vaumphama, vafenda o huku yomatutu itiwa o Tamus. Tupu, ankho kuna ovalume 25, vekahi pombundi yondyuo ya Yehova. Ezekiele wevemona vapilukila koutundilo, ankho vaika omitue pohi vafenda ekumbi.

Yehova ati: ‘Ovanthu ava vetupu onthilo naame. Mokonda kavalingi vala ovipuka ovivi. Mahi, veya okuvilingila mondyuo yange!’ Moluotyo, Yehova walaa okuti: ‘Mavamono ononkhono mbonyengo yange. Himakala nokankhenda navo, putyina vahanyaunuako.’

Papita vala omanima etatu, tunde etyi Yehova alekesa Ezekiele ovipuka ovio. Iya ova Isilayeli avatyitukilapo Ohamba Nambukondonosole. Moluotyo, Nambukondonosole aende okukevelwisa. Etyi papita enima nomeya, omafualali Ombambilonia aanyingila mo Jelusalei. Epundaumbo aliho avelipake otupia, ovanthu ovanyingi avaipawa. Ovakuavo avatualwa ko Mbambilonia ngo nonkhuatwa.

Omokonda yatyi Yehova ayekela ova Isilayeli vapite mehanyauno eevi ngolio? Omokonda ova Isilayeli kavatehelele Yehova, no kutavela ovitumino viae. Otyo tyitulekesa okuti, tyakolela unene tulinge apeho etyi Huku apopia.

Potete mo Isilayeli ankho muesalele vala ovanthu vehehi. Ohamba Nambukondonosole aholovona Gedaliya, opo atumine ovanthu ovo. Anthi, ova Isilayeli vamue vaipaa Gedaliya. Pahe ovanthu avakala nouoma, wokuti voko Mbambilonia maveya okuveipaa aveho, mokonda yotyipuka otyo otyivi. Iya avakuluminya Jeremia aende navo, nkholo ko Egitu.

Moluotyo, otyilongo tyo Isilayeli tyesala tyihena omunthu nawike mokuenda kuomanima 70. Ankho nawike vali ukala motyilongo otyo. Mahi, Yehova walaa okuti konyima yomanima 70, makondola ova Isilayeli motyilongo tyavo. Anthi, puetyi nkhele omuvo oo wehenehikepo, oityi tyapita novanthu va Huku, ko Mbambilonia oko vatualwa? Tutalei.