ISRAEL castamanta yachayniyoq mozokunata rey Nabucodonosor Babiloniaman apasqanmantaqa ñam 10 wata masñam kachkan. ¡Qaway! Jerusalen llaqtatam kañachkanku, hinaptin mana wañuqkunam ichaqa presochasqa richkanku Babilonia nacionman.

Yuyariy, kayna ñakarinankutam Diosmanta willakuqkunaqa willarqaku mana allin rurasqankuta mana cambiaptinkuqa. Israel runakunam ichaqa willakuqkunapa nisqanta mana kasukurqakuchu. Paykunaqa Jehová Diosta yupaychanankumantaqa hinallam taytacha-mamachakunata yupaycharqaku. Chaymi allinpaq paykunataqa castigarunku. Israel runakunapa mana allin rurasqankutaqa yachanchik Diosmanta willakuq Ezequielpa willasqanwanmi.

¿Yachankichu pitaq karqa Ezequielqa? Jerusalenta manaraq puchukachichkaspanku 10 wata ñawpaqta Nabucodonosorqa Babiloniaman wakin mozokunatawan paytapas pusarqa. Chaynallataqmi Babilonia nacionman pusarqaku Danieltapas kimsantin amigonkunata, Sadracta, Mesacta chaynataq Abed-negotapas.

Babilonia nacionpim Jehová Diosqa Ezequielta qawachirqa Jerusalen llaqtapa templonpi mana allinkuna rurasqankuta. Cheqaptamá Ezequielqa Babilonia nacionpi kachkarqa, Jehová Diosmi ichaqa milagrota ruraspan templopi llapa ima pasasqanta qawachirqa. ¡Qawasqanqa millakunapaqmi!

Jehová Diosmá Ezequielta kaynata nirqa: ‘¿Qawachkankichum waknaña millakuypaq kaqkunata Israelpa castankuna temploypi rurasqanta? Chayman yaykuykuspa qaway muyuriqnin perqakunapi dibujasqa qasqonpa puriq animalkunata chaynataq wakin animalkunatapas. ¡Qawaytaq Israel casta runakuna chaypi yupaychachkaqta!’ nispa. Chaykunatam Ezequielqa rikurqa, hinaspanmi chaypi qawasqanta qellqarqa.

Chaymantam Jehová Diosqa Ezequielta kaynata tapurqa: ‘¿Qawachkankichu Israel castakunapa ancianonkuna pakasqallapi imam rurasqankuta?’ nispa. Chaytawanmá Ezequielqa qawarqa. Chaypiqa 70 runakunam taytacha-mamachakunata yupaychachkasqaku. Hinaspa nichkanku: ‘Jehová Diosqa manam qawawachkanchikchu chaynataq nacionninchikmantapas karunchakurunmi’ nispa.

Hinaptinmi Jehová Diosqa Ezequielta qawachirqa temploman yaykuna norte lawpi kaq zaguanpi warmikunata. Chaypim tiyachkasqaku Tamuz sutiyoq taytachata yupaychaspanku. ¡Hinaspa Jehová Diospa templonpa punkunpi qawarqa 25 runakunata! Chaymi paykunataqa Ezequielqa qawarqa ¡intipa qespimunan lawman qonqorakuykuspam Intita adorachkasqaku!

Chaymi Jehová Diosñataq nirqa: ‘Kay runakunaqa piñachiyllapi kawanku. ¡Kay naciontam mana allin rurayllawanña huntarachispanku temploymanpas hamunku kay millakuypaq kaqkunata ruranankupaq!’ nispa. Chaymi Jehová Diosqa nirqa: ‘Paykunamanmi piñakuyniyta kachaykusaq. Manapunim llakipayasaqchu paykunata puchukachichkaptinku’ nispa.

Ezequielman Jehová Diosqa qawachisqanman hina kimsa wata pasaruptillanmi, Juda nacionpi runakunaqa hatarirurqaku Nabucodonosorpa contranpi peleanankupaq. Chaymi rey Nabucodonosorqa paykunapa contranpi peleananpaq rirqa. Wata partellapim, Babilonia nacionpa soldadonkunaqa Jerusalenpa murallanta tuñirachispanku llaqtaman yaykuruspa llapa imankuta kañaykurqaku. Yaqa llapallankuta wañuchirqaku otaq presocharuspanku Babiloniaman pusarqaku.

¿Imanasqataq Jehová Diosqa Jerusalen llaqtapi Israel casta runakunata puchukarachinankuta saqerqa? Jehová Diosta chaynataq kamachikuyninkunatapas mana kasukuptinku. Kayqa qawachinmi Jehová Diospa ima nisqanta kasukuyqa ancha allin kasqanta.

Puchukarachisqanku qepataqa Juda nacionpi aschallaña runakunata qepanankupaq saqerqaku. Chay puchuq runakunamanta cuentallikunanpaqmi rey Nabucodonosorqa Juda llaqtayoq Gedaliasta churarqa. Ichaqa wakin castamasinkunallam Gedaliasta wañurachirqaku. Hinaspanmi mancharikurqaku Babilonia nacionmanta soldadokuna kutiramuspa llapallankuta puchukarachinankumanta. Hinaptinmi willakuq Jeremiasta pusarikuspanku Egipto nacionman lluptikurqaku.

Chaynapim Juda nacionmanta llapallan runakuna pasakurqaku. Juda nacionpiqa 70 watam mana pipas yacharqachu. Chaymi allpaqa purmasqa chunniqlla karqa. Jehová Diosmi ichaqa 70 wata cumplikuruptin Juda nacionman llaqtanta kutichinanpaq nirqa. Chaykamaqa, ¿imaynataq Diospa llaqtanqa Babilonia nacionpi karqaku? Qawasunchikyá.