KUA pou te 10 mataiti mei te taime mai i apai ei te Ariki ko Nebukaneza i te au tangata apii meitaki ravaia o te ngati Iseraela ki Babulonia. I teianei ka akara ana tatou i tei tupu! Kua ka a Ierusalema i te ai. E ko te au ngati Iseraela kare i mate kua apaiia ei au mouauri ki Babulonia.

E akamaara ana ra e, ko teia ta te au peroveta o Iehova i akamatakite e ka tupu me kare te iti tangata e taui i to ratou au mataara kino. Kare ra te ngati Iseraela i akarongo ana i te au peroveta. Kua akamori ua atu rai ratou i te au atua pikikaa kare ia Iehova. No reira kua tau rai te tangata kia akautungaia. Kua kite tatou i teia no te mea kua akakite mai te peroveta o te Atua ko Ezekiela kia tatou i te au apinga kino ta to Iseraela e rave ra.

Kua kite koe e koai a Ezekiela? Ko tetai o te au mapu tane ta te Ariki ko Nebukaneza i apai ki Babulonia, tere atu i te 10 mataiti i mua ake i te tupu anga teia takoreanga maata o Ierusalema. Kua apai katoaia a Daniela e tona au oa tokotoru ko Sadaraka, Meseka e Abedenego ki Babulonia i taua taime rai.

Ia Ezekiela e noo ra i Babulonia, kua akaari a Iehova kiaia i te au mea kino e tupu ra i roto i te iero i Ierusalema. Kua rave a Iehova i teia na roto i tetai temeio. Tei Babulonia rai a Ezekiela, inara kua akatika a Iehova iaia kia kite i te au mea ravarai e tupu ra i roto i te iero. E ko ta Ezekiela i kite e mea viivii tikai!

‘Akara ana i te au mea viivii ta te tangata e rave ra i konei i roto i te iero,’ i akakite ei a Iehova kia Ezekiela. ‘Akara ana i te au patu tei ki i te au tutu o te au ovi e tetai atu au manu. E e akara ana i te ngati Iseraela e akamori ra i te reira!’ Te kite ra a Ezekiela i teia au apinga, e kua tata aia i te au mea e tupu ra.

‘Te kite ra koe e eaa te rave munaia ra e te au arataki o te ngati Iseraela?’ i ui atu ei a Iehova kia Ezekiela. Ae, te kite katoa ra aia i teia. E 70 ngauru tangata, e akamori pouroa ra i te au atua pikikaa. Te karanga ra ratou e: ‘Kare a Iehova e kite mai ana ia matou. Kua akaruke aia i te enua.’

I reira kua akaari a Iehova kia Ezekiela i tetai au vaine i ko i te ngutupa i te pae tokerau o te iero. Te noo ra ratou i te akamori i te atua pikikaa ko Tamuza. E ka akara ana i te au tangata i ko i te ngutupa o te iero o Iehova! Mei te 25 te katoatoa ia ratou. Te kite atura a Ezekiela ia ratou. Te tupou ra ratou ki te pae itinga e te akamori ra i te ra!

‘Kare roa teia au tangata e akangateitei mai ana iaku,’ i karanga ai a Iehova. ‘Kare ko te au apinga kino ua ta ratou e rave ra, te aere katoa maira ratou ki roto i toku iero rave ei i te reira!’ No reira kua taputou a Iehova e: ‘Ka kite ratou i te ririnui anga o toku riri. E kare au e tangi ia ratou me takoreia ratou.’

E toru ua rai mataiti i muri mai i te akaari anga a Iehova kia Ezekiela i teia au mea, i akarongo kore ei te ngati Iseraela i te Ariki ko Nebukaneza. No reira kua aere atu aia i te tamaki ia ratou. Okotai e te apa mataiti i muri ake, kua vavaiia e to Babulonia te au patu paruru o Ierusalema e kua tau i te oire katoa ki te ai. Kua tamateia te maataanga o te tangata me kore kua apaiia ei au mouauri ki Babulonia.

Eaa ra a Iehova i akatika ai kia tupu teia takore anga rikarika ki to Iseraela? Ae, no te mea kare ratou i akarongo ia Iehova e kare i akono i tana au ture. Te akaari maira teia i te puapinga kia rave ua rai tatou i ta te Atua e tuatua maira.

I te akamataanga kua akatikaia tetai pae tangata kia noo ki te enua o Iseraela. Kua tuku te Ariki ko Nebukaneza i tetai ngati Iuda ko Gedalia te ingoa ei akaaere i te tangata. Inara kua tamateia a Gedalia e tetai au Iseraela. Teianei kua mataku te tangata e ka aere mai to Babulonia ka takore ia ratou pouroa no teia mea kino tei tupu. No reira ratou i maro ei ia Ieremia kia aru ia ratou, e kua oro ratou ki Aiphiti.

Kua vai ua i reira te enua o Iseraela ma te kore takiri e tangata. E 70 mataiti kare e tangata i runga i te enua. Kua pou takiri. Inara kua taputou a Iehova e ka akaoki akaou mai aia i tona iti tangata ki runga i te enua i muri ake i te 70 mataiti. Teia taime, eaa ra te tupu nei ki te iti tangata o te Atua i te enua o Babulonia te ngai i apaiia ai ratou? Ka akara tatou.