KWASE kwendlule iminyaka lengu-10 iNkhosi Nebukhadnezari itsetse onkhe ema-Israyeli lanemfundvo lencono, yawayisa eBhabhulona. Buka manje kutsi kwentekani lana esitfombeni! LiJerusalema liyabhujiswa. Ema-Israyeli langakabulawa atfunjelwa eBhabhulona.

Khumbula kutsi baphrofethi baJehova becwayisa ngekutsi liJerusalema litawubhujiswa uma bantfu bangalaleli. Kodvwa ema-Israyeli awazange abalalele baphrofethi. Achubeka akhonta bonkulunkulu bemanga esikhundleni saJehova. Abefanele kutsi ajeziswe. Siyati ngaloku ngoba umphrofethi waNkulunkulu Hezekeli uyasitjela ngetintfo letimbi ema-Israyeli labetenta.

Uyati kutsi kwakungubani Hezekeli? Kwakungulomunye walabafana labancane iNkhosi Nebukhadnezari leyabatfumbela eBhabhulona, eminyakeni lengu-10 ngembi kwekubhujiswa kweJerusalema. Danyela nebangani bakhe labatsatfu, boShadraki, Meshaki kanye na-Abednego, nabo batfunjelwa eBhabhulona ngaleso sikhatsi.

Kwatsi nje solo aseBhabhulona Hezekeli, Jehova wamtjengisa tintfo letimbi letatenteka emuva ethempelini eJerusalema. Wakwenta loku ngesimangaliso. Hezekeli abesolo aseBhabhulona, kepha Jehova wamenta wabona konkhe lokwakwenteka ethempelini. Lakubona Hezekeli kwametfusa kakhulu.

Jehova watjela Hezekeli watsi: ‘Buka letintfo letimbi kangaka labantfu labatentako lapha ethempelini. Buka letindvonga tinanyekwe tintfombe tetinyoka naletinye tilwane. Buka ema-Israyeli ayatikhonta.’ Hezekeli watibona letintfo, futsi wakubhala phasi konkhe lokwakwenteka.

Jehova wambuta: ‘Uyababona baholi bema-Israyeli kutsi bentani lapha esitse?’ Yebo, Hezekeli wababona. Emadvodza langu-70 abekhulekela bonkulunkulu bemanga. Abetsi: ‘Jehova akasiboni. Sowulishiyile lelive.’

Jehova wabese ukhombisa Hezekeli labanye bafati esangweni lelingasenyakatfo yelithempeli. Bebahleti lapho bakhonta nkulunkulu wemanga Thamuzi. Emadvodza lacishe abengu-25, labesekungeneni kwelithempeli laJehova, wona abekhulekela lilanga.

Jehova watsi: ‘Labantfu abangihloniphi. Abagcini nje ngekwenta tintfo letimbi, kodvwa batentela ekhatsi ethempelini lami.’ Ngako wetsembisa: ‘Bataweva emandla entfukutselo yami, futsi angeke ngibahawukele nababhujiswa.’

Kwedlula iminyaka lemitsatfu Jehova atjengise Hezekeli tonkhe letintfo, ema-Israyeli abese ayahlubuka eNkhosini Nebukhadnezari. Ngako wahamba wayolwa nawo. Ngemuva kwemnyaka nesigamu, baseBhabhulona bangena eJerusalema, balishisa lelidolobha balicedza nya. Banyenti bantfu labafa, kwatsi labo labasindza batfunjelwa eBhabhulona.

Wakuvumelelani Jehova kutsi ema-Israyeli abhujiswe kabuhlungu kangaka? Kungoba awazange amlalele, futsi akawuhloniphanga umtsetfo wakhe. Loku kusikhombisa kutsi kubaluleke kakhulu kutsi ngaso sonkhe sikhatsi sikwente loko Nkulunkulu lakufunako.

Ekucaleni bantfu labambalwa bavunyelwa kutsi basale ka-Israyeli. INkhosi Nebukhadnezari yabeka umJuda ligama lakhe lokunguGedaliya kutsi awagadze. Kodvwa ema-Israyeli ambulala Gedaliya. Emuva kwaloku esaba kakhulu ngoba abecabanga kutsi baseBhabhulona batawuta bawabulale onkhe, ngenca yalentfo lembi labeyentile. Ngako atsi kuJeremiya akahambe nawo ngenkhani, futsi abaleka aya eGibhithe.

Manje live laka-Israyeli lasala lingenamuntfu. Iminyaka lengu-70 kwakute lohlala khona. Kwakukhala libhungane. Kodvwa Jehova wetsembisa kutsi ngemuva kweminyaka lengu-70, utawubuyisela bantfu bakhe eveni labo. Ngalesikhatsi bantfu baNkulunkulu baseseBhabhulona, kwakwentekani kubo? Ase sibone encenyeni lelandzelako.