76-нҗы хекая

Иерусалимиң йыкылмагы

НЕБУКАДНЕЗАР патышаның ысрайыллылардан иң билимли адамлары Бабыла әкиденине он йылдан говрак вагт гечди. Инди болян затлара бир серет! Иерусалим янып дур. Дири галан ысрайыллылары болса, тутуп Бабыла алып барярлар.

Ехованың пыгамберлериниң айдышы ялы-да болды. Эмма ысрайыллылар пыгамберлере гулак асмады. Ехова сежде этмегиң дерегине, олар ялан таңрылара сежде эдйәрдилер. Шонуң үчинем халка җеза берилмелиди. Биз Хезекиел пыгамбериң гүррүңинден ысрайыллыларың эрбет ишлери барада билерис.

Хезекиелиң кимдигини билйәңми? Ол Иерусалим йыкылмазындан он йыл өң, Небукаднезар патышаның Бабыла алып гиден йигитлериниң бириди. Шол вагт Даниел билен онуң үч досты Шадрагы, Мешагы ве Абеднегоны хем алып гидипдилер.

Хезекиел Бабылдака, Ехова оңа Иерусалим ыбадатханасында эдилйән эрбет ишлери гөркезйәр. Ол муны гудрат билен эдйәр. Хезекиел, хакыкатдан-да, Бабылда, йөне Ехова оңа ыбадатханадакы болян ишлери гөрмәге мүмкинчилик берйәр. Ол дийсең эрбет затлары гөрди!

Ехова Хезекиеле: «Халкың ыбадатханада эдйән эрбет ишлерини бир гөр. Даш-төверегиңдәки диварларың әхли еринде йыланларың ве башга хайванларың суратлары бар. Шейле-де ысрайыллылара серет, олар бу суратлара сежде эдйәрлер!» диййәр. Хезекиел гудрат аркалы гөрен затларының барысыны язып аляр.

«Ысрайыл яшулуларының гизлинликде эдйән ишини гөрйәңми?» дийип, Ехова Хезекиелден сораяр. Ол серетсе, ине, 70 адам дур. Оларың барысы ялан таңрылара сежде эдйәр. Олар: «Ехова хич зады гөренок. Ол юрдумызы ташлады» диййәрлер.

Соңра Ехова Хезекиеле ыбадатхананың демиргазык дервезесинде дуран бирнәче аяллары гөркезди. Олар Таммуз диен ялан таңра сежде эдйәрдилер. Соңра ыбадатхананың гирелгесиндәки адамлары гөркезди. Хезекиел гөрсе, такмынан 25 адам гүндогара бакып, Гүне сежде эдип дур!

Ехова: «Бу халк мени сыланок. Олар хатда ыбадатханама гелип, эрбет ишлери эдйәрлер. Шонуң үчин олара гахарым гелди. Олары ёк эдениме гынанмарын» диййәр.

Ехованың Хезекиеле бу затлары гөркезенине үч йыл гечди. Ысрайыллылар Небукаднезар патыша гаршы гозгалаң турузды. Шонда Небукаднезар олар билен урушды. Бир ярым йыл геченде, бабыллылар Иерусалимиң диварларыны йыкып, шәхери болса отлаярлар. Оларың көпүсини я өлдүрйәрлер, я-да тутуп Бабыла әкидйәрлер.

Ехова муңа нәме үчин ёл бердикә? Догры, себәби ысрайыллылар Ехова гулак асмадылар. Онуң канунына боюн болмадылар. Бу вака Ехованың буйругыны хемише ерине етирмегиң ваҗыпдыгыны гөркезйәр.

Ысрайыл юрдунда галмага башда диңе кәбир адамлара ругсат берилйәр. Небукаднезар патыша Гедаля атлы ехудыны олара ёлбашчы беллейәр. Йөне бираз вагтдан ысрайыллылар Гедаляны өлдүрйәрлер. Шу себәпли халк бабыллылардан горкяр. Шонуң үчин олар Еремияны хем өзлери билен Мүсүре гачмага меҗбур эдйәрлер.

Ысрайыл юрдунда екеҗе адам-да галмаяр. Бу ерде 70 йыллап хич ким яшамаяр. Юрт бүтинлей бошап галды. Йөне Ехова халкыны 70 йылдан юрдуна доландырҗагыны вада берйәр. Эмма Худайың Бабыл юрдуна әкидилен халкына нәме болдука? Гел, билели.

4 Патышалар 25:1—26; Еремия 29:10; Хезекиел 1:1—3; 8:1—18.