KU NA ni malembe ya 10 ni ku hunza kusukela loku Nebukadnezzare a tekile vontlhe vaIsraeli va gonzileko nguvu a va yisa Babuloni. Makunu wona lezi zi mahekako! Jerusalema go hiswa. Ni vaIsraeli lava va nga kala ku dawa vo tekiwa kota tikhumbi va yiswa Babuloni.

Alakanya, lezo hi zona zi nga tivisiwa hi vaprofeti va Jehova ku ngalo zi wa ta maheka loku a vanhu va nga hunzuluki tindleleni tabye to biha. Kanilezi a vaIsraeli a va ingisangi vaprofeti. Vona va simamisile zalezo va khozela vanungungulu va mawunwa wutshanwini ga ku khozela Jehova. Hikwalaho a vanhu lavo va fanelwe hi kutsayiswa. Hi tiva lezo hakuva a muprofeti wa Nungungulu, Ezekieli, i hi byela hi zilo zo biha lezi a vaIsraeli va nga kari va zi maha.

Wa mu tiva a ku hi mani Ezekieli? Yena munwe wa majaha lawa Hosi Nebukadnezzare a ma tekileko a ma yisa Babuloni lomu ka ku hunza malembe ya 10 na ku nga se humelela a kuloviswa ka hombe ka Jerusalema. Danieli ni vanghana vakwe va vanharu, Xadrake, Mexake na Abed-nego, vonawu va yisilwe Babuloni hi xalexo xikhati.

Laha Ezekieli a ha hiko Babuloni, Jehova i mu komba zilo zo biha lezi zi mahekako le Jerusalema lomu tempeleni. Jehova i maha lezo hi ku tirisa xihlamaliso. Hi lisine Ezekieli wa ha hi Babuloni, kanilezi Jehova i mu maha a wona zilo zontlhe lezi zi mahekako le tempeleni. Zonake lezi Ezekieli a zi wonako zilo zo biha nguvu!

Jehova i byela Ezekieli ku ngalo: ‘Hi nga wona a manyala lawa a vanhu va ma mahako laha tempeleni. Wona a makhurisi ma teleko hi zifananiso za tinyoka ni zinwani zihari. Niku wona a vaIsraeli va zi khozelako!’ Ezekieli wa zi kota ku wona zontlhe zilo lezo, a tlhela a tsala lezi zi mahekako.

Jehova i wutisa Ezekieli aku: ‘Wa zi wona lezi a varangeli va Israeli va zi mahako lomu xihundleni ke?’ Ina, zonawu lezo yena wa zi kota ku zi wona. Ku na ni 70 wa vavanuna, vona vontlhe vo khozela vanungungulu va mawunwa. Vona ve ngalo: ‘Jehova a nga hi woni. Yena i tsikile a tiko.’

Zonake Jehova i komba Ezekieli a vavasati vo kari va nga laha nyangweni ya le nwalungu wa tempeli. Va tshamile kwalaho na va khozela a nungungulu wa mawunwa, Tammuza. Kasike hi nga wona vavanuna lavaya va nga laha nyangweni ya tempeli ya Jehova! Ku na ni xipimo xa 25 wa vona. Ezekieli wa va wona. Vo khizamela a tlhelo ga le mutsuwuka-gambo va khozela a gambo!

Jehova aku ngalo: ‘A vanhu lava a va nzi chavi. A hi zilo zo biha ntsena va zi mahako kanilezi vaya hi kuta hi kwalaha tempeleni ya mina va ta zi maha kona!’ Hikwalaho Jehova i tsumbisa ku ngalo: ‘Va tazwa a ntamu wa zanga ya mina. Niku nzi nga ta va zwela wusiwana xikhatini lexo va to loviswa.’

Ku na ni xipimo xa malembe manharu ntsena anzhako ka kuva Jehova a kombile zilo lezo ka Ezekieli laha a vaIsraeli va vukelako Hosi Nebukadnezzare. Hizalezo yena i famba a yalwa navo. Loku ku hunzile lembe ni khihlanya a vaBabuloni va khungumula a makhurisi ya Jerusalema va hisa a doropa gi ku mbo. Ku dawa vanhu vo tala kanilezi vanwani va yisiwa Babuloni kota tikhumbi.

Hikuyini Jehova a vumeleleko lezaku ku humelela a kuloviswa ka tshisela lego ka vaIsraeli ke? Ina, lezo zi maheka hakuva vona a va ingisangi Jehova niku a va hlayisangi milayo yakwe. Lezo zi komba ku ngalo za lisima a ku xontlhe xikhati hina hi maha lezi Nungungulu a wulako.

Hi kusanguleni ku vumelelwa lezaku ku sala vanhu vatsongwani lomu tikweni ga Israeli. Hosi Nebukadnezzare i veka a muJuda a vitwako Gedalia lezaku ava murangeli wa vanhu lavo. Kanilezi a vaIsraeli vo kari va daya Gedalia. Makunu a vanhu va chava lezaku a vaBabuloni va ta tshuka vata va ta lovisa vona vontlhe hi kota ya nchumu lowo wo biha wu mahekileko. Hikwalaho vona va kurumeta Jeremia lezaku a famba navo, va tsutsuma vaya Gipite.

Lezo zi maha lezaku a tiko ga Israeli gi tshama na gi nga hi na munhu hi kumbhelela. Ku hunza a 70 wa malembe na ku nga hanyi munhu tikweni legiya. Gona gi tshama gi hi phanga. Kanilezi Jehova i tsumbisa lezaku yena i ta tlhelisa vanhu vakwe tikweni legiya loku ku hunzile a 70 wa malembe. Ka xalexo xikhati, zini zi humelelako vanhu va Nungungulu le tikweni ga Babuloni lomu va yisilweko kona ke? A hi woneni.