SAMBANO yaka yakupunda 10 yimasile, Nebukadinesala ali ŵajigele Ayisalayeli ŵakulijiganya cenene kwawula nawo ku Babelo. Sambano alole yayikutendekwa! Msinda wa Yelusalemu ukupya ni moto. Ayisalayeli ŵanganiŵawulaga akwajigalila ku ukapolo wa ku Babelo.

Akumbucile kuti ŵakulocesya ŵa Yehofa ŵakalamwisye ŵandu yakwamba yeleyi, naga jemanjajo ngakusinda yitendo yawo yakusakala. Nambo Ayisalayeli nganiŵapikanila ŵakulocesya. Ŵajendelecele kulambila milungu jaunami mmalo mwa kulambila Yehofa. Sambano ŵanduwo ŵasosekwaga kwapa cilango. Tukumanyilila yeleyi ligongo jwakulocesya jwa Mlungu Esekiyele akutusalila yakusakala yaŵatendaga Ayisalayeli.

Ana akumanyilila kuti Esekiyele ali nduni? Ali jumo jwa acanda ŵele mwenye Nebukadinesala ŵaŵajigalile ku Babelo yaka 10 munyumamu konasika kwakukulungwa kwa Yelusalemu mkanikutendekwe. Daniyele ni acimjakwe ŵatatu, Sadileki, Mesaki ni Abadinego, ŵajigalile ku Babelo pandaŵi jelejisoni.

Esekiyele pali ku Babelo, Yehofa akumlosya yindu yakusakala yayikutendekwa ku nyumba jakulambilila ku Yelusalemu. Yehofa akutenda yeleyi mwakusimonjesya. Esekiyele akutama ku Babelo, nambo Yehofa akumtendekasya kuyiwona yayikutendekwa pa nyumba jakulambilila. Yakuyiwona Esekiyele yili yakutengusya!

Yehofa akumsalila Esekiyele kuti: ‘Mlole yindu yakusakala yakutenda ŵandu pa nyumba jakulambililaji. Mlole yipupa yejambule majoka, soni yinyama yine. Soni mlole Ayisalayeliwo akuyilambila yinduyo!’ Esekiyele akuyiwona yosopeyo, ni akulemba yayikutendekwayo.

Yehofa akum’wusya Esekiyele kuti: ‘Ana mkuyiwona yakutenda acimlongola ŵa Ayisalayeli mwamtemelayo?’ Jwalakwe akuyiwonasoni yeleyi nditu. Apali acalume 70, soni wosopewo akulambila milungu jaunami. Jemanjajo akuŵeceta kuti: ‘Yehofa ngakutuwona. Jwalakwe ngakuyikosya yam’cilamboci.’

Kaneko Yehofa akumlosya Esekiyele acakongwe ŵane ŵali kucipata cakumpoto kwa nyumba jakulambilila. Jemanjajo atemi ni kulambilaga mlungu jwaunami Tamusi. Esekiyele akwawonasoni acalume ŵane pacipata cakwinjilila m’nyumba jakulambilila Yehofa! Apali ŵakwana ciŵandika 25. Jemanjaji akwinamila kungopoka lyuŵa nikulilambilaga lyuŵa!

Yehofa akuŵeceta kuti: ‘Ŵanduŵa ngakunjimbicisya une. Ngaŵaga kuti akwamba kutenda yakusakalayo nambo akuyitendela panyumba jangu jakulambilila!’ Sambano Yehofa akwasalila kuti: ‘Jemanjaji calole macili gakutumbila kwangu. Soni ngasinatendela canasa pakonasika.’

Pali pagambile kumala yaka ciŵandika yitatu Yehofa ali amlosisye Esekiyele yinduyi, Ayisalayeli akumjimucila mwenye Nebukadinesala. Sambano jwalakwe akwawula kukuputana nawo. Pacamasile caka cimo ni hafu a Babelo akonanga mapupa ga Yelusalemu nikwinjila mkati ni koca moto msinda wosope. Ŵandu ŵajinji akuwa, soni ŵane akwajigala kuŵa acikapolo ku Babelo.

Ana ligongo cici Yehofa akundile kuti konasika kwakogoyaku kwatendecele Ayisalayeli? Lili ligongo lyakuti jemanjaji nganapikanila Yehofa, soni nganakuya malamusi gakwe. Yeleyi yikulosya kuti kuli kwakusosekwa ndaŵi syosope kupikanila yakusasala Mlungu.

Kundanda ŵandu ŵamnono akwakunda kutama mu cilambo ca Yisalayeli. Mwenye Nebukadinesala akusagula m’Yuda jwine lina lyakwe Gedaliya kuti ŵaloleleje ŵanduwo. Nambo Ayisalayeli ŵane akum’wulaga Gedaliya. Sambano ŵandu akogopa kuti a Babelo caciyika ni kwajonanga jemanjajo wosope ligongo lya cindu cakusakala cacitendekweco. Sambano ŵanduwo akumkanganicisya Yelemiya kuti, atilile najo yimpepe ku Eguputo.

Yeleyi yikutendekasya kuti m’cilambo ca Ayisalayeli mukaŵa mundu jwalijose. Kwa yaka 70 pangali jwakutama m’cilamboco. Mwangali jwalijose. Nambo Yehofa akusala kuti ŵandu ŵakwe caciwujilasoni kumangwawo pambesi pa yaka 70. Sambano pandaŵi ajino, ana cici cacikwatendecela ŵandu ŵa Mlungu kucilambo ca Babelo kwaŵajigalile kula? Kwende tulole.