Ilyo abena Israele bali mu busha mu Babiloni, kwalecitika ifintu ifyalelenga cishibikwe nga ca kuti bali ne citetekelo icakosa nelyo iyo. Shadraki, Meshaki na Abednego balibapoosele mu mulilo uwalebilima. Lelo Lesa alibacingilile, tabafwile. Pa numa, Daniele balimupoosele mu cilindi ca nkalamo, lelo Lesa aisele utunwa twa nkalamo pa kuti shimulya. Ici cacitike ninshi abena Madai na bena Persia balyonaula umusumba wa Babiloni.

Na mu kulekelesha Sailasi, imfumu ya bena Persia aebele abena Israele ukubwelelamo ku Yerusalemu. Balibwelelemo ninshi palipita imyaka 70 ukutula apo babasendele ku Babiloni. Ico babalilepo ukucita ilyo bafikile ku Yerusalemu, kukuula itempele lya kwa Yehova. Lelo abalwani babo balengele baleke ukukuula. E ico ilyo abena Israele babwelele ku Yerusalemu, papitile imyaka 22 pa kuti fye bapwishe ukukuula itempele.

Twalasambilila na pali Esra no bulendo bwakwe ubwa kubwelela ku Yerusalemu ku kuwamya itempele. Apa ninshi palipita imyaka 47 apo bapwilile ukukuula itempele. Lyena, pa numa ya myaka 13 ukutula apo Esra abwelele ku Yerusalemu, Nehemia alibombeleko umulimo wa kukuula ifibumba fya musumba wa Yerusalemu ifyawile. ICIPANDE 5 cilelanda pa fyacitike mu myaka 152.