ORUPA 5

Okuza komahuuriro mu Babilon nga komatungururiro yomakuma waJerusalem

Indu Ovaisrael ngunda ava ri mohuurire mu Babilon, owo va munine omarorero wongamburiro yawo. Sadrak, Mesak, na Abed-Nego va yumbwa mezuko ndaari yaka omuriro, nungwari Jehova we ve yama. Kombunda, indu Babilon tji tja taarwa i Ovamedi nOvapersi, Daniel wa yumbwa motjitoto tjozongeyama, nungwari Mukuru rukwao we mu yama mokupata ovinyo vyozongeyama.

Korusenina, ombara Kirus yaPersi ya kutura Ovaisrael. Ozombura 70 kombunda yaindu tjiva tji va twarerwe ku Babilon otjovahuurwa, owo otji va yaruka kehi rawo. Otjiṋa otjitenga tji va tjita indu tji va yaruka ku Jerusalem ya ri okutunga ondembeli. Nungwari ovanavita tjimanga va tjaera oviungura vyawo. Okutja ape ozombura 22 kombunda yaindu tji va yaruka ku Jerusalem otji va mana okutunga ondembeli yaJehova.

Okuzambo matu rihongo ohunga nouyenda waEsra tja yaruka ku Jerusalem okukaṱuna ondembeli. Ihi tja tjitwa ape ozombura 47 kombunda yondembeli tji ya manuka. Nu ozombura 13 kombunda youyenda waEsra, Nehemia wa vatera okutungurura omakuma yaJerusalem nga wire. Orupa ORUTJATANO maru kamburiremo ovitjitwa vyozombura 152 zomakuruhungi ngandu poruveze ndwi.