Вавилон пщылІыпІэм щыщыІам щыгъуэ израиль цІыхухэм яІа фІэщхъуныгъэр зэкъым зэрагъэунэхуар. Седрах, Мисах, Авденаго сымэ хьэку гъэплъам ирадзэри зыри къащымыщІыу Алыхьым къригъэлащ. Мидианхэмрэ Персхэмрэ Вавилон къазэури зэман дэкІа нэужь, Даниил аслъэнхэр зэрыс мащэм ирадзащ. Апщыгъуэм Алыхьым ар къригъэлащ, аслъэнхэм я жьэр зэтригъапІэри.

ИкІэм-икІэжым израиль цІыхухэр Кир зи цІэ пащтыхьым щхьэхуит ищІыжащ. Абыхэм я хэкур щалъэгъужар илъэс 70 дэкІа нэужьщ. Иерусалим щагъэзэжам, псом япэу абыхэм Иеговэ и унэшхуэр ящІыжын щІадзащ. Ауэ куэд дэмыкІыу бийхэм яхузэфІэкІащ а Іуэхугъуэр къагъэувыІэн. Абы щхьэкІэ Иерусалим зэрагъэзэжрэ илъэс 22 дэкІа нэужьщ унэшхуэр щащІыжыфар.

Иджыри дэ къэтщІэнущ Ездрэ унэшхуэр игъэдэхэн щхьэкІэ Иерусалим къызэрыкІуар. Ар къыщыхъуар унэшхуэр зэраухуэжрэ илъэс 47 дэкІа нэужьщ. Ездрэ зэрыкІуэжрэ илъэс 13 дэкІа нэужь, Неемие ядэІэпыкъуурэ яригъэщІыжащ Иерусалим и блын къутахэр. Псори зэхэплъхьэжмэ, ЕТХУАНЭ Іыхьэм тхыдэм щыщу илъэси 152–рэ къызэщІеубыдэ.