Vaisraeli apa va kere mounkwate moBabironi kwa gwanekerere nomaheteko gepuro lyawo gomanzi. Saduraka naMesaka naAbetenego kwa va zuguminine mesuga lyokutwera mundiro, nye Karunga ta va pwagesa mo awo vazuni. Konyima, apa Babironi va zi fundire Vamede noVaperesiya, Ndaniyera kwa mu zuguminine mekero lyovanyime, nye nage Karunga kwa mu poperere mokupata tuna tovanyime.

Mouhura, hompa goVaperesiya Koresi ta mangurura Vaisraeli. Awo kwa tengwire kosirongo sawo konyima tupu zonomvhura 70 kutunda apa va va twere koBabironi ngononkwate. Sininke simwe sokuhova esi va rugene apa va tengwire koJerusarema kwa kere etameko lyokutungurura ntembeli zaJehova. Nye konyima zosiruwogona, nonkore tadi hagekesa yirugana yawo. Ayo kwa kwete nye nomvhura 22 konyima zokukatengura kwawo koJerusarema dogoro apa va ya mene kutunga ntembeli.

Kutunda opo, tatu lirongo kuhamena rugendo rwaEsira rokutengura koJerusarema a ka fuulise ntembeli. Eyi kwa horokere nomvhura 47 konyima zapa va mene kutunga ntembeli. Makura, konyima zonomvhura 13 kutunda porugendo rwaEsira, Nehemiya kwa vaterere mokutungurura makuma gaJerusarema aga ga tekaukire nokugwaagwa. Ruha RWAUTANO kwa kwatakanesa histoli zonomvhura 152 dogoro posiruwo esi.