Бабыл туткунунда жүргөндө ысрайылдыктардын ишеними көп жолу сыналат. Шадрах, Мейшах жана Абет-Негону күйүп турган мешке ыргытышат, бирок Кудай аларды сактап калат. Кийинчерээк, Бабылды мадайлыктар менен персиялыктар басып алгандан кийин, Даниел арстандар жаткан орго ыргытылат, бирок аны да Кудай куткарып калат.

Акыры Персия падышасы Кореш ысрайылдыктарды бошотот. Бабыл туткунунда туура 70 жыл жүргөндөн кийин алар мекенине кайтып келишет да, Иерусалимде Жахабанын ийбадатканасын кайра курууга дароо киришишет. Бирок көп өтпөй душмандар буга каршылык көрсөтүшөт. Ошондуктан ысрайыл эли Иерусалимге кайтып келгенден ийбадаткана толук курулуп бүткөнгө чейин 22 жыл өтөт.

Мындан сырткары, бул бөлүктөн курулуш иштери бүткөндөн 47 жылдай өткөндөн кийин, ийбадаткананы кооздоо үчүн Иерусалимге Эзранын келгени тууралуу окуйбуз. Андан 13 жыл өткөндөн кийин Иерусалимдин урап жаткан дубалын тургузууга Некемия жардам берет. БЕШИНЧИ бөлүктө жалпы жонунан 152 жылдык тарых камтылат.