Ili baali mu busya mu Babiloni, abaIsilaeli baalikwete ifyakwesya bucicetekelo bwabo ifingi. Syadilaci, Mesyaci na Abadinego baaliposelwe mwi siiko ilyalukwaka umulilo, pano baLesa baalibafumisyemo abalabi. Mukukonkapo, panuma Babiloni baicimfisye ku baMadai ne baPasai, Danyeli aliposelwe mwi cengo lya nkalamu, pano nakabili baLesa baalimupulwisye ili bafumbete utunwa twa nkalamu.

Mukupelako, Kolesi imfumu ya ku Pasai yalikakulwile abaIsilaeli. Baalibwelelemo ku calo cakwabo panuma ya myaka 70 lukoso iyakupintwa ku Babiloni mu busya. Icintu cimo ici batatikilepo ukucita ili babwelele ku Jelusalemi cali kutatika ukwibaka itempuli lya baYehoba. Nangabe’fyo, abapate babo balimakanikile umulimo wabo. Popele cali apepi ne myaka 22 panuma babwelele ku Jelusalemi eli mukupelako basilile itempuli.

Mukukonkapo, tulasambilila pa lwendo lwakwe Esila ulwa kubwelelamo ku Jelusalemi mu kuwamya itempuli. Iyi yali myaka 47 panuma itempuli lyasilile. Eli, imyaka 13 panuma ya lwendo lwakwe Esila, Neyamiya alyofwele ukwibaka nakabili ifibumba fya Jelusalemi ifyawile. Iciputusya ca BUFISANU cilukulabila pa myaka 152 iya lyasi lya kale ukufika na kuli ino mpindi.