Tej ateʼtoq aj Israel toj Babilonia, nim ok qʼuqbʼel kykʼuʼj tuj malbʼil. E okx qʼoʼn qe Sadrac, Mesac ex Abednego toj jun horno nkʼantteq qʼaqʼ tuj, naqtzen tuʼnj mitiʼ xi tqʼoʼn Dios ambʼil tuʼn kykyim. Yajxitl, tej tkubʼ kyiʼj aj Babilonia kyuʼn qejo aj Media ex qeju aj Persia, kux qʼoʼn Daniel tuj jun jul kyxol bʼalun (león), ax ikx ok t-xqʼuqin Dios Daniel tej tok tlamoʼn (tjpuʼn) kytziʼ bʼalin.

Tej tbʼet ambʼil, i etz ttzaqpiʼn Ciro ajo ajkawil te Persia qe aj Israel. E ajtz meltzʼaj juntl maj aj Israel tuj kytnam tej otaqxi tzikʼ 70 abʼqʼi kyxilen qʼiʼn toj Babilonia. Kyxol qeju bʼant kyuʼn aj Israel tnejelku, aju jaw kybʼinchaʼn juntl maj ja te nabʼil Dios toj Jerusalén. Naqtzun aju weʼ aqʼunl kyuʼn ajqʼoj. Tuʼntzunju, tzmaxe tej tikʼ 22 abʼqʼi kyulen meltzʼaj aj Israel tuj Jerusalén pon bʼaj twiʼ aqʼuntl kyuʼn tiʼj ja te nabʼil Dios.

Yajxitl, kʼelel qnikʼ tiʼj Esdras tej tul juntl maj toj Jerusalén, tuʼn tbʼaj bʼinchet ja te nabʼil Dios te tbʼanelxix. Bʼaj jlu tej otaqxi tzikʼ 47 abʼqʼi tbʼajlen bʼinchaʼn ja te nabʼil Dios. Tikʼtzuntl 13 abʼqʼi tulen meltzʼaj Esdras, onin Nehemías tuʼn kyjaw bʼinchet qe tmuro Jerusalén aqejo oteq che kubʼ tzʼaq. Aju TJWEʼYIN Kʼloj txʼolbʼabʼil lu nxi tiʼn 152 abʼqʼi.