Na ngoi so azo ti Israël ade na Babylone, aye mingi atara mabe ti ala. A bi Sadrac, Mésac na Abed-Nego na yâ ti mbeni kota four ti wâ so agbi ngangu, me Nzapa azi ala na lê ni. Na peko ti so aMède na aPerse ahon Babylone na ngangu, a bi Daniel na yâ ti dû ti abamara, me Nzapa abata nga lo na lege so lo kanga yanga ti abamara ni.

Na nda ni, Cyrus, gbia ti Perse, azi azo ti Israël. Ala kiri na kodoro ti ala tâ gi angu 70 na peko ti so a gue na ala na ngbâa na Babylone. Tongana ala si na kodoro ti ala awe, kozo ye so ala sara ayeke ti leke temple ti Jéhovah si a ga nzoni. Me kete na pekoni, awato ti ala akaï kusala ti ala. Ni la, ala hunzi ti leke temple ni ngu 22 na peko ti so ala kiri na Jérusalem.

Ngu 47 na peko ti so a hunzi ti leke temple ni, Esdras akiri na Jérusalem ti leke ni si a ga pendere. Ngu 13 na peko ti gango ti Esdras, Néhémie amû maboko ti tene a kiri a leke gbagba ti Jérusalem so akungbi awe. MBAGE 5 so asara tënë ti aye so asi na yâ ti angu 152 juska na ngoi ti sarango gbagba ti Jérusalem.